ಹೀಗಿದ್ದರೂ ಎಲ್ಲೋ ಅಲ್ಲಲ್ಲಿ ನಿಜವಾದ ಅರ್ಥದಲ್ಲಿ ಅಧ್ಯಾತ್ಮ ಸಾಧಕರನ್ನು ಕಾಣಬಹುದಾಗಿದೆ. ಆದರೆ ಬಹುತೇಕರಲ್ಲಿ ಅಧ್ಯಾತ್ಮ ಸಾಧನೆ, ಜೀವನ ಧರ್ಮಯೋಗ, ಆತ್ಮಾನುಸಂಧಾನ ಇತ್ಯಾದಿಗಳ ಬಗ್ಗೆ ಪೂರ್ಣ ಮಾಹಿತಿಯೇ ಇಲ್ಲ. ನಿಜವಾದ ಅರ್ಥದಲ್ಲಿ ಅಧ್ಯಾತ್ಮ ವಿಚಾರಧಾರೆಗಳು ಕ್ರಮೇಣ ಈ ಪೃಥ್ವಿಯಿಂದ ಮಾಯವಾಗುತ್ತಾ ಬರುತ್ತಿವೆ. ಇದಕ್ಕೆ ಮೂಲ ಕಾರಣ ಹುಡುಕಿದಾಗ ಸಾಮಾನ್ಯವಾಗಿ ನಮಗೆ ದೊರೆಯುವ ಉತ್ತರ ‘ಸಮಯವೆಲ್ಲಿದೆ?’ ಎಂದು. ಹಾಗಾದಲ್ಲಿ ನಾವು ಕಾಣುವ ಬ್ರಹ್ಮಜ್ಞ ಪುರುಷರು, ಸಂತರು, ಮಹಾತ್ಮರು, ಯೋಗಿಗಳು, ಭಕ್ತಾಗ್ರಣ್ಯರುಗಳಿಗೆ ಸಮಯವೆಲ್ಲಿ ಬಂತು? ಭಗವಾನ್ ಶ್ರೀರಾಮಕೃಷ್ಣ ಪರಮಹಂಸರು, ದಯಾನಂದ ಸರಸ್ವತಿ, ರಮಣ ಮಹರ್ಷಿಗಳು, ದಾಸವರೇಣ್ಯರು, ತುಕಾರಾಂ, ಮೀರಾಬಾಯಿ, ಅಕ್ಕಮಹಾದೇವಿ ಆದಿಯಾಗಿ ಭಕ್ತವರೇಣ್ಯ ರುಗಳು, ಅನ್ನಮಾಚಾರ್ಯ, ಭದ್ರಾಚಲ ರಾಮದಾಸರಂತಹ ಅನೇಕಾನೇಕ ಬ್ರಹ್ಮಜ್ಞ ಪುರುಷರಿಗೆ ಸಮಯವೆಲ್ಲಿ ದೊರೆಯಿತು? ಅವರೂ ಸಹ ಮಾನವರಾಗಿಯೇ ಈ ಜಗತ್ತಿನಲ್ಲಿ ಇರಲಿಲ್ಲವೇ? ಎಂಬ ಸಂದೇಹಗಳು ಬರುವುದು ಸಹಜ!.
