ಭಾರತೀಯ ಷೇರುಪೇಟೆ ಕಾಲಕಾಲಕ್ಕೆ ಕುಸಿತ ಕಂಡರೂ ಬೇಗನೆ ಸಾವರಿಸಿಕೊಂಡು ಚೇತರಿಕೆಯ ಹಾದಿಯಲ್ಲಿ ಸಾಗಿರುವುದು ವಿಶೇಷ. ಮೊದಲೆಲ್ಲ, ಚೇತರಿಕೆಗೆ ಕೆಲ ವರ್ಷ ತೆಗೆದುಕೊಳ್ಳುತ್ತಿದ್ದ ಷೇರುಪೇಟೆ ಈಗ ಕೆಲವೇ ತಿಂಗಳುಗಳಲ್ಲಿ ಮೊದಲಿನ ಸ್ಥಿತಿಗೆ ತಲುಪುತ್ತಿದೆ ಎಂಬುದು ಗಮನಾರ್ಹ. ವಾಸ್ತವದಲ್ಲಿ ಷೇರುಪೇಟೆ ಅಪ್ಪಟ ವಾಣಿಜ್ಯ ವಹಿವಾಟು ಆಗಿದ್ದರೂ, ಇದು ಭಾವನೆಗಳ ಮೇಲೆ ಅವಲಂಬಿತವಾಗಿದೆ. ಹೀಗಾಗಿ, ಭಾರತದೊಳಗಿನ ಬೆಳವಣಿಗೆಗಳು ಮಾತ್ರವಲ್ಲದೆ, ಹೊರದೇಶಗಳಲ್ಲಿನ ಘಟನೆಗಳೂ ಪರಿಣಾಮ ಬೀರುತ್ತವೆ. ಯುದ್ಧಭೀತಿ, ಸಾಂಕ್ರಾಮಿಕ ಕಾಯಿಲೆ, ಹಣದುಬ್ಬರ ಹೆಚ್ಚಳ, ರಾಜಕೀಯ ನೇತೃತ್ವ ಬದಲಾವಣೆ, ಆರ್ಥಿಕ ಹಿಂಜರಿತ ಇಂಥ ಸಂದರ್ಭಗಳಲ್ಲೆಲ್ಲ ಷೇರುಪೇಟೆಯಲ್ಲಿ ‘ಕರಡಿ’ಯದ್ದೇ ಕಾರುಬಾರು. ಆದರೆ, ಕುಸಿತ ಕಂಡಾಗ ಹೂಡಿಕೆದಾರರು ಧೃತಿಗೆಡದೆ ತಾಳ್ಮೆ ವಹಿಸುವುದೇ ಜಾಣತನ ಎನ್ನುತ್ತಾರೆ ಮಾರುಕಟ್ಟೆ ತಜ್ಞರು. ಮಾರುಕಟ್ಟೆ ಕುಸಿತ ದೀರ್ಘಾವಧಿಗೆ ಮುಂದುವರಿಯಲಾರದು, ಪಾರಸ್ಪರಿಕ ತೆರಿಗೆ ಪರಿಣಾಮದ ಚಿತ್ರಣ ಕೆಲ ದಿನಗಳಲ್ಲಿ ಸ್ಪಷ್ಟಗೊಂಡ ಬಳಿಕ ಷೇರುಪೇಟೆ ಹಳಿಗೆ ಮರಳಲಿದೆ ಎಂಬುದು ಮಾರುಕಟ್ಟೆ ವಿಶ್ಲೇಷಕರ ಅಭಿಪ್ರಾಯ.
