ನವದೆಹಲಿ: ನೂತನ ಆರ್ಥಿಕ ವರ್ಷದ ಮೊದಲ ದಿನದಿಂದಲೇ ಬದುಕು ದುಬಾರಿ ಆಗುತ್ತಿದೆ. ಜನರ ಬದುಕಿನ ಮೇಲೆ ಪರಿಣಾಮ ಬೀರುವಂತಹ ಹಲವಾರು ಬದಲಾವಣೆಗಳು ಏ.1ರಿಂದಲೇ ಜಾರಿಯಾಗುತ್ತಿದೆ. ಹೆದ್ದಾರಿ ಟೋಲ್, ಔಷಧ, ಕಾರು, ವಿದೇಶಿ ಶಿಕ್ಷಣ, ವೀಸಾ ಶುಲ್ಕ ಹೆಚ್ಚಳದ ಜತೆಗೆ ಹಾಲು, ವಿದ್ಯುತ್, ಸಿಎನ್ಜಿ ದರ ಕೂಡ ಏರಿಕೆ ಆಗುತ್ತಿದೆ. ಇದರ ಜತೆಗೆ ಜನರ ಖರ್ಚುವೆಚ್ಚಕ್ಕೆ ಸಂಬಂಧಿಸಿದ ಹಲವು ರಿಯಾಯಿತಿ, ವಿನಾಯಿತಿ, ನಿಯಮ- ನಿಬಂಧನೆಗಳು, ಹೊಸ ಪದ್ಧತಿ ಜಾರಿ ಆಗುತ್ತಿದೆ.
ಹೆದ್ದಾರಿ ಟೋಲ್ ಶುಲ್ಕ ಒಂದೇ ವರ್ಷದಲ್ಲಿ 2ನೇ ಬಾರಿ ಹೆಚ್ಚಳವಾಗುತ್ತಿದೆ. 2024ರ ಜೂನ್ನಲ್ಲೂ ಏರಿಕೆಯಾಗಿತ್ತು. ಮಾ. 31ರ ಮಧ್ಯರಾತ್ರಿಯಿಂದಲೇ ಜಾರಿಗೆ ಬರುವಂತೆ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ (ಎನ್ಎಚ್ಎಐ) ಆದೇಶ ಹೊರಡಿಸಿದೆ. ವಿವಿಧ ಟೋಲ್ ಪ್ಲಾಜಾಗಳಿಗೆ ಎಷ್ಟು ದರ ಏರಿಕೆ ಆಗುತ್ತದೆ ಎಂಬುದರ ವಿಸ್ತೃತ ಮಾಹಿತಿಯನ್ನು ಸಂಬಂಧಿಸಿದ ಅಧಿಸೂಚನೆಯಲ್ಲಿ ನಮೂದಿಸಿದೆ. ಇದರಿಂದ ಈ ಹೆದ್ದಾರಿಗಳಲ್ಲಿ ಸಂಚರಿಸುವ ಸಾರ್ವಜನಿಕರು ಮತ್ತು ವಾಣಿಜ್ಯ ವಾಹನಗಳ ಮಾಲೀಕರಿಗೆ ಹೊರೆಯಾಗಲಿದೆ.
