ಉತ್ತರ ಕನ್ನಡ ಜಿಲ್ಲೆಯ ಕರಾವಳಿಯ ನಾಲ್ಕು ತಾಲೂಕುಗಳಲ್ಲಿ ಮಾತ್ರ ಇರುವ ಹಾಲಕ್ಕಿ ಒಕ್ಕಲಿಗ ಜನಾಂಗಕ್ಕೆ ತುಳಸಿ ಗೌಡ ಸೇರಿದವರು. ರವಿಕೆ ಹಾಕದೇ ಬೆನ್ನು ಕಾಣುವಂತೆ ಸೀರೆಯುಟ್ಟು, ಕುತ್ತಿಗೆಯ ತುಂಬ ಕರಿಮಣಿ ಸರ ಹಾಕಿಕೊಳ್ಳುವುದು ಸಮುದಾಯದ ಹೆಣ್ಣುಮಕ್ಕಳ ಸಂಪ್ರದಾಯ. ತುಳಸಿ ಅವರೂ ಅದೇ ವೇಷಭೂಷಣ ಧರಿಸುತ್ತಿದ್ದರು. ಶಿಕ್ಷಣ, ಉದ್ಯೋಗ, ರಾಜಕೀಯ ಮುಂತಾದ ಕ್ಷೇತ್ರದಲ್ಲಿ ಹಾಲಕ್ಕಿ ಒಕ್ಕಲಿಗರು ಸಾಕಷ್ಟು ಹಿಂದುಳಿದಿದ್ದಾರೆ. ಆದರೆ, ಸಂಪ್ರದಾಯ, ಸಂಸ್ಕೃತಿ ಹಾಗೂ ಕಾಡಿನ ಜ್ಞಾನದಲ್ಲಿ ಸಮುದಾಯ ಸಾಕಷ್ಟು ಶ್ರೀಮಂತವಾಗಿದೆ. ಈ ಸಮುದಾಯದ ಜನರಲ್ಲಿರುವ ವಿಶಿಷ್ಟ ಕಾಡಿನ ಜ್ಞಾನ, ಮತ್ತು ಮುಗ್ಧತೆ ಅವರಿಗೆ ಗೊತ್ತಿಲ್ಲದೇ ತುಳಸಿ ಅವರನ್ನು ಎತ್ತರಕ್ಕೆ ಕೊಂಡೊಯ್ದಿತು.
