ಕೌಟುಂಬಿಕ ಕಲಹಗಳಾಗಲಿ ವಿವಾಹ ವಿಚ್ಛೇದನಗಳಾಗಲಿ ಇರುತ್ತಿರಲಿಲ್ಲ. ಸಾಮಾಜಿಕವಾಗಿಯೂ ಎಲ್ಲರೂ ಪ್ರೀತಿ ಪ್ರೇಮ ಅನ್ಯೋನ್ಯತೆ, ಸೌಹಾರ್ದ, ಸಾಮಾಜಿಕ ಸಾಮರಸ್ಯದಿಂದ ಜೀವನ ನಡೆಸುತ್ತಿದ್ದರು. ಎಲ್ಲೂ ಬಡವರಾಗಲಿ, ಭಿಕ್ಷುಕರಾಗಲಿ, ಭ್ರಷ್ಟರಾಗಲಿ, ಭಯೋತ್ಪಾದಕರಾಗಲಿ ಕಾಣಸಿಗುತ್ತಿರಲಿಲ್ಲ. ಕೊಲೆ ಕಳ್ಳತನ ಸುಲಿಗೆ ದರೋಡೆಗಳ ಪ್ರಮೇಯಗಳು ಅಪರೂಪವಾಗಿದ್ದ ಕಾರಣ, ಪೊಲೀಸರಿಗೆ, ಕೋರ್ಟು ಕಚೇರಿಗಳಿಗೆ ಕೆಲಸವೇ ಇರುತ್ತಿರಲಿಲ್ಲ. ಜೈಲುಗಳು ಕೈದಿಗಳಿಲ್ಲದೆ ಖಾಲಿ ಇರುತ್ತಿದ್ದವು. ಅಪರೂಪಕ್ಕೆ ಏನಾದರೂ ಕಳ್ಳತನದ ಪ್ರಕರಣ ಸಾಬೀತಾದರೆ ಕಠಿಣ ಶಿಕ್ಷೆಯನ್ನು ವಿಧಿಸಲಾಗುತ್ತಿತ್ತು. ಅಕಾಲ ಮೃತ್ಯುವೆಂಬುದೇ ಇಲ್ಲದೆ ಜನರು ದೀರ್ಘಾಯುಗಳಾಗಿದ್ದರು.
