ಬೀಟೆ ಮರ (ರೋಸ್ವುಡ್) ಅತ್ಯುತ್ತಮ ಜಾತಿಯ ಮರಗಳಲ್ಲಿ ಒಂದಾಗಿದ್ದು, ಶ್ರೀಗಂಧ (ಸ್ಯಾಂಡಲ್ವುಡ್) ಮರದ ನಂತರ ಬೆಲೆಬಾಳುವ ಮರವಾಗಿದೆ. ದೀರ್ಘಕಾಲ ಬಾಳಿಕೆ ಬರುವ ‘ಬೀಟೆ ಮರ’ವನ್ನು ಕೆತ್ತನೆ ಕೆಲಸಗಳಿಗೆ, ಫಲಕಗಳ ತಯಾರಿಕೆಗೆ ಬಳಸಲಾಗುತ್ತದೆ. ಇದರ ತೆಳು ಪದರವು ಇತ್ತೀಚೆಗೆ ಒಳಾಂಗಣ ಅಲಂಕಾರದಲ್ಲಿ ಹೆಚ್ಚು ಬೇಡಿಕೆ ಪಡೆದುಕೊಂಡಿದೆ. ಬೀಟೆ ಒಂದು ಪರ್ಣಪಾತಿ ಮರ. ಕರ್ನಾಟಕದಲ್ಲಿ ಸುಮಾರು 100 ರಿಂದ 200 ಸೆ.ಮೀ. ಮಳೆಯಾಗುವ ಪ್ರದೇಶದಲ್ಲಿ ಕಂಡುಬರುತ್ತದೆ. ತೇವಾಂಶ ಹೆಚ್ಚಿರುವ ಪ್ರದೇಶಗಳಲ್ಲಿ ನಿತ್ಯಹರಿದ್ವರ್ಣ ವೃಕ್ಷವಾಗಿರುತ್ತದೆ. ಈ ಮರ ಹಳದಿ ಮಿಶ್ರಿತ ಬಿಳಿಯ ಬಣ್ಣದ ಹೂವು ಬಿಡುತ್ತದೆ. ಇದರ ದಾರುವು ಗಡುಸಾಗಿದ್ದು, ಬಲಯುತವಾಗಿದೆ. ಇದರ ತಿರುಳು ಕರಿ ನೇರಳೆ ಬಣ್ಣದಿಂದ ಕೂಡಿದ್ದು, ಕರಿಗೆರೆಗಳೊಂದಿಗೆ ಆಕರ್ಷಕವಾಗಿ ಹೊಳಪಿನಿಂದ ಕೂಡಿರುತ್ತದೆ. ಮರದಿಂದ ಮಾಡುವ ಹುದುಗು ಚಿತ್ರ (ಇನ್ವೇ) ಅತ್ಯಾಕರ್ಷಕ, ಮೈಸೂರಿನಲ್ಲಿ ಹೆಚ್ಚು ಕಲಾವಿದರಿದ್ದಾರೆ.
