ದಾಲ್ಚಿನ್ನಿಗೆ ರೋಗನಿರೋಧಕ ಶಕ್ತಿ ಹೆಚ್ಚಿಸುವ ಮತ್ತು ಹಲವು ರೀತಿಯ ವೈರಸ್ಗಳನ್ನು ನಿರೋಧಿಸುವ ಗುಣವಿದೆ. ಇದು ಜೀರ್ಣಕ್ರಿಯೆ ಸರಿಯಾಗಿ ಆಗುವಂತೆ ನೋಡಿಕೊಳ್ಳುತ್ತದೆ. ಗ್ಯಾಸ್ ತುಂಬುವುದು, ಹೊಟ್ಟೆನೋವು, ಸರಿಯಾಗಿ ಹಸಿವಾಗದ ಸಮಸ್ಯೆಗಳಲ್ಲಿ ಇದರ ಬಳಕೆ ತುಂಬ ಪ್ರಯೋಜನಕಾರಿ. ಭೇದಿ, ಆಮಶಂಕೆಯಂತಹ ಸಮಸ್ಯೆಗಳಲ್ಲಿಯೂ ಇದನ್ನು ಬಳಸಬಹುದು. ಶ್ವಾಸಾಂಗವ್ಯೂಹಕ್ಕೆ ಸಂಬಂಧಿಸಿದ ಬಹುತೇಕ ಎಲ್ಲ ಸಮಸ್ಯೆಗಳಲ್ಲೂ ಇದರಿಂದ ಅನುಕೂಲವಾಗುತ್ತದೆ. ಕೆಮ್ಮು, ಕಫ, ದಮ್ಮು ಮತ್ತು ಶ್ವಾಸಕೋಶಕ್ಕೆ ಸಂಬಂಧಿಸಿದ ಇತರ ಹಲವು ಸಮಸ್ಯೆಗಳಲ್ಲಿ ಇದು ಸಹಕಾರಿ. ಸ್ವರವನ್ನು ಸುಧಾರಿಸುತ್ತದೆ. ಗಂಟಲುನೋವನ್ನು ಕಡಿಮೆ ಮಾಡುತ್ತದೆ. ಪದೇಪದೆ ಕಾಡುವ ಅಲರ್ಜಿಯನ್ನು ಬೇಗ ಹತೋಟಿಗೆ ತರುತ್ತದೆ. ಆಯುರ್ವೆದದ ಪ್ರಸಿದ್ಧ ‘ಸಿತೋಪಲಾದಿ’ ಚೂರ್ಣದಲ್ಲಿ ಇದೂ ಒಂದು ಘಟಕ. ಕ್ಯಾನ್ಸರ್ ಸಮಸ್ಯೆಯಲ್ಲಿ ಇದರ ಬಳಕೆ ದೊಡ್ಡ ಪ್ರಮಾಣದಲ್ಲಿ ಆಗುತ್ತಿದೆ. ಭಾವಪ್ರಕಾಶ ನಿಘಂಟುವಿನಲ್ಲಿ - ಇದು ವೀರ್ಯದ ಗುಣವನ್ನು ಹೆಚ್ಚಿಸುತ್ತದೆ, ಲೈಂಗಿಕ ಶಕ್ತಿಯನ್ನು ವರ್ಧಿಸುತ್ತದೆ, ಬಲವನ್ನು ಮತ್ತು ಚರ್ಮದ ಕಾಂತಿಯನ್ನು ಹೆಚ್ಚಿಸುತ್ತದೆ ಎಂದಿದ್ದಾರೆ. ದಿನಕ್ಕೆ ಒಂದರಿಂದ ಮೂರು ಗ್ರಾಂ ದಾಲ್ಚಿನ್ನಿಯನ್ನು ಅಡುಗೆಯಲ್ಲಿ ಬಳಸಬಹುದು. ಬೆಳಗ್ಗೆ ಖಾಲಿಹೊಟ್ಟೆಯಲ್ಲಿ ಅರ್ಧ ಚಮಚ ಪುಡಿಗೆ ಒಂದು ಚಮಚ ಜೇನುತುಪ್ಪ ಹಾಕಿ ಸೇವಿಸುವುದರಿಂದ ಅಲರ್ಜಿ, ಕೆಮ್ಮು, ಬೊಜ್ಜು, ಮೂತ್ರಪಿಂಡದ ಸಮಸ್ಯೆಗಳು, ಹೊಟ್ಟೆ ಉಬ್ಬರದಂತಹ ಜೀರ್ಣಕ್ರಿಯೆಗೆ ಸಂಬಂಧಿಸಿದ ಸಮಸ್ಯೆಗಳಿರುವವರಿಗೆ ತುಂಬ ಅನುಕೂಲವಾಗುತ್ತದೆ. ಮಧುಮೇಹಿಗಳು ಬಿಸಿನೀರಿನಲ್ಲಿ ಸೇವಿಸಬಹುದು. ಕಫ, ಕೆಮ್ಮು, ಗಂಟಲು ಕೆರೆತ, ಗಂಟಲು ಮತ್ತು ಬಾಯಿ ಒಣಗುವ ಸಮಸ್ಯೆ ಇದ್ದಾಗ ಅರ್ಧ ಚಮಚ ಚಕ್ಕೆ ಪುಡಿ, ಒಂದು ಚಮಚ ಏಲಕ್ಕಿ, ಎರಡು ಚಮಚ ಹಿಪ್ಪಲಿ ಪುಡಿಯನ್ನು ಸೇರಿಸಿ ಕಾಲು ಚಮಚದಷ್ಟು ಈ ಮಿಶ್ರಣವನ್ನು ದಿನಕ್ಕೆ ಮೂರು ಬಾರಿ ಆಹಾರದ ಮೊದಲು ಜೇನುತುಪ್ಪದಲ್ಲಿ ತೆಗೆದುಕೊಳ್ಳಬೇಕು. ಇವೆಲ್ಲವೂ ಆಯುರ್ವೆದ ಅಥವಾ ಗ್ರಂಧಿಗೆ ಅಂಗಡಿಗಳಲ್ಲಿ ಸಿಗುತ್ತವೆ. ಆದರೆ ಚಕ್ಕೆಯನ್ನು ಅಂಗಡಿಗಳಲ್ಲಿ ತೆಗೆದುಕೊಳ್ಳುವಾಗ ಕಾಳಜಿ ಅಗತ್ಯ. ಕೆಲವು ಕಡೆ ಯಾವುದೋ ಮರದ ತೊಗಟೆಗೆ ಕೃತ್ರಿಮ ಪರಿಮಳವನ್ನು ಸೇರಿಸಿ ಮಾರಾಟ ಮಾಡಲಾಗುತ್ತದೆ. ಮಲೆನಾಡಿನಲ್ಲಿ ಈ ಮರ ಸುಲಭವಾಗಿ ಕಾಣಸಿಗುತ್ತದೆ.
