ಭಯೋತ್ಪಾದನೆ ರಫ್ತು ಮಾಡುವ ಪಾಕಿಸ್ತಾನಕ್ಕೆ ಇತ್ತೀಚಿನ ದಿನಗಳಲ್ಲಿ ಭಾರತ ದಿಟ್ಟ ಉತ್ತರ ನೀಡಿರುವುದಲ್ಲದೆ, ಪ್ರಮುಖ ಭಯೋತ್ಪಾದಕ ಸಂಘಟನೆಗಳಿಗೆ ಮರ್ವಘಾತ ನೀಡಿದೆ. ಉಗ್ರರ ಹಣಕಾಸಿನ ಮೂಲಗಳಿಗೂ ಕೊಡಲಿಪೆಟ್ಟು ಬಿದ್ದಿದೆ. ಪಾಕ್ ಈಗ ಹತಾಶವಾಗಿದೆ. ಆಕ್ರಮಣಕಾರಿ ಚೀನಾಕ್ಕೂ ಭಾರತ ತಿರುಗೇಟು ನೀಡಿದೆ. ಹಲವು ರಾಷ್ಟ್ರಗಳು ಕೂಡ ಡ್ರಾ್ಯಗನ್ ರಾಷ್ಟ್ರದ ವಿರುದ್ಧ ತಿರುಗಿ ಬಿದ್ದಿವೆ. ವಿಸ್ತರಣೆಯ ದಾಹಕ್ಕೆ ಪೆಟ್ಟು ಬಿದ್ದಿರುವುದರಿಂದ ಚೀನಾ ಕೂಡ ಚಡಪಡಿಸುತ್ತಿದೆ. ಪಾಕಿಸ್ತಾನದ ಹೆಗಲಿನ ಮೇಲೆ ಅದು ಬಂದೂಕಿಟ್ಟು, ಸದಾ ಭಾರತವಿರೋಧಿ ಚಟುವಟಿಕೆಗಳಿಗೆ ಚಿತಾವಣೆ ನೀಡುತ್ತದೆ ಎಂಬುದು ಗೊತ್ತಿರುವಂಥದ್ದೇ. ಆದರೆ, ತೀರಾ ಆಘಾತಕಾರಿ ಸಂಗತಿ ಎಂದರೆ ಚೀನಾ ಮತ್ತು ಪಾಕಿಸ್ತಾನ ಎರಡೂ ಸೇರಿ ಭಾರತ ಮತ್ತು ಪಾಶ್ಚಿಮಾತ್ಯ ರಾಷ್ಟ್ರಗಳ ವಿರುದ್ಧ ಜೈವಿಕ ಯುದ್ಧಕ್ಕೆ ತಯಾರಿ ನಡೆಸಿವೆ. ಬೇಹುಗಾರಿಕಾ ಮೂಲಗಳಿಂದ ಈ ವಿಷಯ ದೃಢಪಟ್ಟಿರುವುದಲ್ಲದೆ, ಚೀನಾ- ಪಾಕ್ನ ಅಪಾಯಕಾರಿ, ವಿನಾಶಕಾರಿ ಹೆಜ್ಜೆಯ ಬಗ್ಗೆ ರಕ್ಷಣಾ ತಜ್ಞರೊಬ್ಬರು ವಿಸ್ಕೃತ ಲೇಖನ ಬರೆದಿದ್ದಾರೆ.
