ಅಪ್ರತಿಮ ಯೋಧನೆನಿಸಿದ್ದ ಛತ್ರಪತಿ ಶಿವಾಜಿ ಕೋಟ್ಯಂತರ ಜನರಿಗೆ ಪ್ರೇರಣೆ: ಪ್ರಧಾನಿ ನರೇಂದ್ರ ಮೋದಿಯವರಿಂದ ಗೌರವ ಸಮರ್ಪಣೆ

ನವದೆಹಲಿ: ಇಂದು ಛತ್ರಪತಿ ಶಿವಾಜಿಯ 390ನೇ ಜಯಂತಿ. ರಾಷ್ಟ್ರಾದ್ಯಂತ ಆಚರಣೆ ಮಾಡಲಾದರೂ, ಮಹಾರಾಷ್ಟ್ರದಲ್ಲಿ ವೀರ ಮಹಾರಾಜನ ಜನ್ಮದಿನವನ್ನು ಅದ್ಧೂರಿಯಾಗಿ ನಡೆಸಲಾಗುತ್ತದೆ.

ಪ್ರಧಾನಿ ನರೇಂದ್ರ ಮೋದಿಯವರು ಛತ್ರಪತಿ ಶಿವಾಜಿಯವರಿಗೆ ಗೌರವ ಸಮರ್ಪಿಸಿದ್ದಾರೆ. ಶಿವಾಜಿಯವರ ಪುತ್ಥಳಿಗೆ ತಲೆಬಾಗಿ ನಮಸ್ಕರಿಸುತ್ತಿರುವ ತಮ್ಮ ಫೋಟೋವನ್ನು ಟ್ವೀಟ್ ಮಾಡಿದ ಮೋದಿಯವರು, ಭಾರತ ಮಾತೆಯ ಶ್ರೇಷ್ಠ ಪುತ್ರನಿಗೆ ಹೃದಯಪೂರ್ವಕ ನಮಸ್ಕಾರಗಳು. ಶೌರ್ಯ, ಸಹಾನುಭೂತಿ, ಅತ್ಯುತ್ತಮ ಆಡಳಿತಕ್ಕೆ ಛತ್ರಪತಿ ಶಿವಾಜಿ ಮಹಾರಾಜರು ನಿದರ್ಶನ. ಇಂದಿಗೂ ಅನೇಕಾನೇಕ ಜನರಿಗೆ ಅವರೇ ಸ್ಫೂರ್ತಿ ಎಂದು ಹೇಳಿದ್ದಾರೆ.

ಛತ್ರಪತಿ ಶಿವಾಜಿಯವರು ಅಪ್ರತಿಮ ಯೋಧನಾಗಿ ಛಾಪು ಮೂಡಿಸಿದ್ದಾರೆ. ಅದ್ಭುತ ಆಡಳಿತಗಾರ. ಸದೃಢ ನೌಕಾಪಡೆಯನ್ನು ನಿರ್ಮಿಸುವುದರಿಂದ ಹಿಡಿದು, ಅನೇಕ ಜನಪರ ನೀತಿಗಳನ್ನು ಜಾರಿಗೊಳಿಸಿದ್ದಾರೆ. ಪ್ರತಿಕ್ಷೇತ್ರವನ್ನೂ ಅತ್ಯುತ್ತಮವಾಗಿ ನಿಭಾಯಿಸಿದ್ದರು. ಅನ್ಯಾಯ ಮಾಡುವವರನ್ನು ಹಾಗೂ ಸುಮ್ಮನೆ ಭಯ ಹುಟ್ಟಿಸುವವರನ್ನ ಬಲವಾಗಿ ವಿರೋಧಿಸುತ್ತಿದ್ದರು. ಇದೇ ಕಾರಣಕ್ಕೆ ಎಂದಿಗೂ ನೆನಪಿನಲ್ಲಿ ಉಳಿಯುವ ವ್ಯಕ್ತಿತ್ವ ಶಿವಾಜಿ ಎಂದು ನರೇಂದ್ರ ಮೋದಿ ಟ್ವೀಟ್ ಮಾಡಿದ್ದಾರೆ. (ಏಜೆನ್ಸೀಸ್​)