ಕೋಲಾರ ಜಿಲ್ಲೆಯಲ್ಲಿ ನಿಲ್ಲದ ವಕ್ಫ್​ ಕಾಟ

ಕಿರುವಾರ ಎಸ್​.ಸುದರ್ಶನ್​ ಕೋಲಾರ

ರಾಜ್ಯಮಟ್ಟದಲ್ಲಿ ವಕ್ಫ್​ಗೆ ಆಸ್ತಿ ಬದಲಾವಣೆ ವಿಚಾರ ಭಾರಿ ಸದ್ದು ಮಾಡುತ್ತಿರುವ ಬೆನ್ನಲ್ಲೇ ಜಿಲ್ಲೆಯಲ್ಲೂ ಈ ವಿಚಾರ ಮತ್ತೊಮ್ಮೆ ಮುನ್ನೆಲೆಗೆ ಬಂದಿದೆ.

ರೈತರ ಜಮೀನು, ಮಠ-ಮಂದಿರ, ದೇವಾಲಯಗಳ ಆಸ್ತಿಯನ್ನು ವಕ್ಫ್​ ಹೆಸರಿಗೆ ಬದಲಾವಣೆ ಮಾಡಲು ತೆರೆ ಮರೆಯಲ್ಲಿ ಕಸರತ್ತು ನಡೆಯುತ್ತಿದೆಯೇ ಎಂಬ ಸಂದೇಹಕ್ಕೆ ಪೂರಕ ಎಂಬಂತೆ ಜಿಲ್ಲೆಯ ಕೆಲ ತಾಲೂಕುಗಳಲ್ಲಿ ವಕ್ಫ್​ಗೆ ಸೇರಲಿದೆ ಎನ್ನಲಾದ ಆಸ್ತಿ ಪಟ್ಟಿ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದ್ದು, ಸಾರ್ವಜನಿಕ ವಲಯದಲ್ಲಿ ಆತಂಕ ಸೃಷ್ಟಿಸಿದೆ.

ರಾಜ್ಯ ವಕ್ಫ್​ ಮಂಡಳಿಯಿಂದ ಜಿಲ್ಲಾ ವಕ್ಫ್​ ಕಚೇರಿಗೆ ಪತ್ರ ಬಂದ ಬೆನ್ನಲ್ಲೇ ತಾಲೂಕು ವ್ಯಾಪ್ತಿಯಲ್ಲಿನ ಹೋಬಳಿ ಕೇಂದ್ರ, ಪಂಚಾಯಿತಿ ಕೇಂದ್ರ ಹಾಗೂ ಗ್ರಾಮಗಳಲ್ಲಿನ ಆಸ್ತಿಗಳನ್ನು ಗುರುತು ಮಾಡಿದ್ದು, ಹಾಲಿ ಹೆಸರು, ಬದಲಾಗಬೇಕಾಗಿರುವ ಹೆಸರಿನ ಕಲಂಗೆ ತಕ್ಕಂತೆ ರಾಜಸ್ವ ನಿರೀಕ್ಷಕರು (ಆರ್​ಐ) ಪಟ್ಟಿ ಸಿದ್ಧಪಡಿಸಿ ಜಿಲ್ಲಾ ವಕ್ಫ್​ ಅಧಿಕಾರಿಗಳಿಗೆ ಸಲ್ಲಿಸಿದ್ದಾರೆ. ಈ ಪೈಕಿ ಮಾಲೂರು ತಾಲೂಕಿನ 65 ಕಡೆ ಹಾಗೂ ಕೋಲಾರ ತಾಲೂಕಿನ 112 ಕಡೆ ದೇವಾಲಯ, ರೈತರ ಆಸ್ತಿಗಳನ್ನು ವಕ್ಫ್​ ಹೆಸರಿಗೆ ಖಾತೆ ಬದಲಾವಣೆ ಮಾಡುವ ಬಗ್ಗೆ ಪ್ರಸ್ತಾಪಿಸಿರುವುದು ವಿವಾದಕ್ಕೆ ಎಡೆಮಾಡಿದೆ.

* ಅಧಿಕಾರಿಗಳಿಂದ ಹಾರಿಕೆ ಉತ್ತರ

ಅಧಿಕಾರಿಗಳು ಸಿದ್ಧಪಡಿಸಿರುವ ಪಟ್ಟಿಯಲ್ಲಿ ಬಹುತೇಕ ರೈತರ ಹೆಸರುಗಳು, ಸರ್ವೇ ನಂಬರ್​ಗಳು ಇವೆ. ಈ ವಿಚಾರದ ಬಗ್ಗೆ ಆರ್​ಐ ಕೇಳಿದರೆ ಮೇಲಧಿಕಾರಿಗಳು ಸೂಚಿಸಿರುವ ಕೆಲಸ ಮಾಡಿದ್ದೇವೆ. ಇದಕ್ಕೂ ನಮಗೂ ಸಂಬಂಧವಿಲ್ಲ ಎಂದು ನುಣುಚಿಕೊಳ್ಳುತ್ತಾರೆ ಎಂದು ರೈತರು ಆರೋಪಿಸಿದ್ದಾರೆ. ಈ ಬೆಳವಣಿಗೆಯಿಂದ ಸಾರ್ವಜನಿಕರು ಜಮೀನು ಕಳೆದುಕೊಳ್ಳುವ ಭೀತಿಯಲ್ಲಿ ಸೈಬರ್​ ಕೇಂದ್ರಗಳತ್ತ ದೌಡಾಯಿಸಿ ಪಹಣಿ ಪರಿಶೀಲಿಸಿಕೊಳ್ಳಲು ಮುಂದಾಗುತ್ತಿದ್ದಾರೆ.

* ಪಿತ್ರಾರ್ಜಿತ ಆಸ್ತಿ ಕೈ ತಪ್ಪುವ ಭೀತಿ

ಮಾಲೂರು ತಾಲೂಕಿನ ಪ್ರಸಿದ್ಧ ಯಾತ್ರಾ ಸ್ಥಳವಾದ ಚಿಕ್ಕತಿರುಪತಿಯಲ್ಲಿ ಒಂದೇ ಒಂದು ಮುಸ್ಲಿಂ ಕುಟುಂಬ ಇಲ್ಲ. ಆದರೂ ಗ್ರಾಮದ ಖಾಸಗಿ ಹಾಗೂ ಪಿತ್ರಾರ್ಜಿತ ಆಸ್ತಿಗಳ ಸರ್ವೇ ನಂಬರ್​ಗಳಲ್ಲಿ ವಕ್ಫ್​ ಹೆಸರನ್ನು ನಮೂದಿಸಲಾಗಿದೆ. ಅಂತೆಯೇ, ತಾಲೂಕು ವ್ಯಾಪ್ತಿಯಲ್ಲಿನ ವಕ್ಫ್​ ಮಂಡಳಿಯ ಜಮೀನುಗಳನ್ನು ವಕ್ಫ್​ ಹೆಸರಿಗೆ ಖಾತೆ ಬದಲಾವಣೆ ಮಾಡುವಂತೆ ಉಲ್ಲೇಖ (1)ರಲ್ಲಿ ಸ್ವೀಕೃತವಾದ ಪತ್ರದಂತೆ ಪರಿಶೀಲಿಸಿ ಸ್ವತ್ತುಗಳನ್ನು ಖಾತೆ ಮಾಡುವ ಬಗ್ಗೆ ರಾಜಸ್ವ ನೀರಿಕ್ಷಕರು ಸೆಪ್ಟೆಂಬರ್​ನಲ್ಲಿ ವರದಿ ಸಿದ್ಧಪಡಿಸಿದ್ದಾರೆ ಎನ್ನಲಾಗಿದೆ. ಇದರ ನಡುವೆ, ನಮೂದಿಸಲಾದ ಭೂಮಿ ಹಿಡುವಳಿ ಜಮೀನು ಆಗಿರುವುದರಿಂದ ಸದರಿ ಹಿಡುವಳಿದಾರರೇ ಅನುಭವದಲ್ಲಿದ್ದು, ಸಕ್ಷಮ ಪ್ರಾಧಿಕಾರದಲ್ಲಿ ಮೇಲ್ಮನವಿ ಸಲ್ಲಿಸಿಕೊಂಡು ಖಾತೆ ಮಾಡಿಕೊಳ್ಳುವ ಬಗ್ಗೆ ಪರಿಹಾರ ಕಂಡುಕೊಳ್ಳಬಹುದಾಗಿದೆ ಎಂದು ತಹಸೀಲ್ದಾರ್​ ಬರೆದ ಪತ್ರವೊಂದು ವೈರಲ್​ ಆಗಿದೆ.

* ಮಾಲೂರು ತಾಲೂಕಿನಲ್ಲಿ ಗುರುತಿಸಲಾದ ಭೂಮಿ

ತಾಲೂಕಿನ ಚಿಕ್ಕತಿರುಪತಿ, ಚಿಕ್ಕಇಗ್ಗಲೂರು, ನೆಲ್ಲಹಳ್ಳಿ, ಹುಳದೇನಹಳ್ಳಿ, ಮಾಕಾರಹಳ್ಳಿ, ತೊರಲಕ್ಕಿ, ಕೊಂಡಶೆಟ್ಟಿಹಳ್ಳಿ, ಮಾಸ್ತಿ, ಟೇಕಲ್​, ಕೊಂಡನಹಳ್ಳಿ, ಯಲವುಗುಳಿ, ಮಾಲೂರು ಪಟ್ಟಣ, ಉಪ್ಪಾರಹಳ್ಳಿ, ಅಗರ, ತೊರಲಕ್ಕಿ, ಸೀತಹಳ್ಳಿ, ಯಶವಂತಪುರ, ಚೊಕ್ಕಂಡಹಳ್ಳಿ, ಚವ್ವೇನಹಳ್ಳಿ, ಅರಳೇರಿ, ಕುಡಿಯನೂರು ಗ್ರಾಮಗಳ ಹಲವು ಸರ್ವೇ ನಂಬರ್​ಗಳನ್ನು ಗುರುತು ಮಾಡಲಾಗಿದೆ. ಈಗಾಗಲೆ ಕೆಲ ಪಹಣಿಗಳಲ್ಲಿ ವಕ್ಫ್​ ಸ್ವತ್ತು, ಖಬರಸ್ತಾನ್​ ಎಂದು ನಮೂದಿಸಿದ್ದು, ಸಾರ್ವಜನಿಕರು ನಾಡಕಚೇರಿ ಹಾಗೂ ತಹಸೀಲ್ದಾರ್​ ಕಚೇರಿಗಳಿಗೆ ಅಲೆದಾಡುವಂತಾಗಿದೆ.

* ಕೋಲಾರ ತಾಲೂಕಿನ ಗುರುತಿಸಲಾದ ಭೂಮಿ

ಹೋಳೂರು ಹೋಬಳಿ ವ್ಯಾಪ್ತಿಯ ನುಕ್ಕನಹಳ್ಳಿ, ನಾಯನಹಳ್ಳಿ, ಹುತ್ತೂರು ವ್ಯಾಪ್ತಿಯ ಶಾಪೂರು, ನದಂಬಳಿ, ಸುಗಟೂರು ವ್ಯಾಪ್ತಿಯ ಕಿತ್ತಂಡೂರು, ಅಲೇರಿ, ವೇಮಗಲ್​ ವ್ಯಾಪ್ತಿಯ ಕುರಗಲ್​, ಹಾರ್ಜೇನಹಳ್ಳಿ, ವೇಮಗಲ್​, ಚನ್ನಂಚರ, ಬೀಚಗಾನಹಳ್ಳಿ, ವಕ್ಕಲೇರಿ ವ್ಯಾಪ್ತಿಯ ಮುದುವತಿ, ತಲಗುಂದ, ದೊಡ್ಡಯೂರು, ಅರಾಭಿಕೊತ್ತೂರು. ಕಸಬಾ ವ್ಯಾಪ್ತಿಯ ಅಮೇಹಳ್ಳಿ ಕೊಳತಿಮ್ಮನಹಳ್ಳಿ, ಮಾರ್ಜೇನಹಳ್ಳಿ, ಸಂಗೋಂಡಹಳ್ಳಿ, ಖಾದ್ರಿಪುರ, ಕೊಂಡರಾಜನಹಳ್ಳಿ, ಸುಲ್ತಾನ್​ ತಿಪ್ಪಸಂದ್ರ ಗ್ರಾಮಗಳಲ್ಲಿ ವಕ್ಫ್​ಗೆ ಬದಲಾಯಿಸಬೇಕಾಗಿರುವ ಸರ್ವೇ ನಂಬರ್​ಗಳನ್ನು ಗುರುತು ಮಾಡಲಾಗಿದೆ.

* ಮುಸ್ಲಿಂ ಕುಟುಂಬ ಇಲ್ಲದಿದ್ದರೂ ಜಾಗ ಗುರುತು

ಕೆಲ ಗ್ರಾಮಗಳಲ್ಲಿ ಒಂದೇ ಒಂದು ಮುಸ್ಲಿಂ ಕುಟುಂಬ ಇಲ್ಲದಿದ್ದರೂ ವಕ್ಫ್​ಗೆ ಆಸ್ತಿ ಬದಲಾಯಿಸಬೇಕಾಗಿರುವ ರೈತರ ಜಮೀನುಗಳನ್ನು ಅಧಿಕಾರಿಗಳು ಗುರುತಿಸಿದ್ದಾರೆ. ಕ್ರಮ ಸಂಖ್ಯೆ, ಹೋಬಳಿ, ಗ್ರಾಮ, ವಿಸ್ತಿರ್ಣ, ಹಾಲಿ ಹೆಸರು, ಬದಲಾಗಬೇಕಾಗಿರುವ ಹೆಸರು ಹೀಗೆ ಕಲಂ ಪ್ರತಿಯಲ್ಲಿ, ಆಯಾ ಹೋಬಳಿಯ ಆರ್​ಐ ಸೇರಿ ಇತರ ಅಧಿಕಾರಿಗಳು ತೆರೆ ಮರೆಯಲ್ಲಿ ಪಟ್ಟಿ ಸಿದ್ಧಪಡಿಸಿರುವುದು ಸಾರ್ವಜನಿಕ ವಲಯದಲ್ಲಿ ಚರ್ಚೆಗೆ ಗ್ರಾಸವಾಗಿದೆ. ವಕ್ಫ್​ ವ್ಯಾಪ್ತಿಗೆ ಒಳಪಡುವ ಮಕಾನ್​ ಇನಾಂ, ಈದ್ಗಾ, ಮಸೀದಿ, ಖಬರಸ್ತಾನ್​ ಹೀಗೆ ಹಲವು ಹೆಸರುಗಳಿಗೆ ಬದಲಾವಣೆ ಮಾಡಲು ಸಿದ್ಧತೆ ನಡೆದಿದೆ.

ಬಾಕ್ಸ್​...

* ಹೋರಾಟದ ಎಚ್ಚರಿಕೆ

ಪಿತ್ರಾರ್ಜಿತವಾಗಿ ಬಂದ ಜಮೀನು ದಾಖಲೆಗಳಲ್ಲಿ ವಕ್ಫ್​ ಬೋರ್ಡ್​ ಹಾಗೂ ಖಬರಸ್ತಾನ್​ ಎಂಬ ಹೆಸರು ನಮೂದಿಸುತ್ತಿರುವುದು ಸರಿಯಲ್ಲ. ಇದೇ ರೀತಿ ಮುಂದುವರಿದರೆ ಸರ್ಕಾರದ ವಿರುದ್ಧ ಬೃಹತ್​ ಹೋರಾಟ ಮಾಡಲಾಗುವುದು. ಈ ರೀತಿ ನಮೂದು ಮಾಡಿ ಆದೇಶಿಸಿದವರು ಯಾರು?. ಏಕೆ ಈ ರೀತಿ ದಾಖಲೆಗಳಲ್ಲಿ ವಕ್ಫ್​ ಹೆಸರು ನಮೂದಿಸಿ ರೈತರನ್ನು ಕೆಣಕುತ್ತಿದ್ದಾರೆ. ತಪು$್ಪ ಸರಿಪಡಿಸದಿದ್ದರೆ ಮುಂದಿನ ದಿನಗಳಲ್ಲಿ ತಕ್ಕ ಉತ್ತರ ನೀಡಲಾಗುವುದು ಎಂದು ನೊಂದ ರೈತರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಕೋಟ್​...

ವಕ್ಫ್​ಗೆ ಜಮೀನುಗಳನ್ನು ಖಾತೆ ಮಾಡಲಾಗುತ್ತಿದೆ ಎಂಬ ಆರೋಪ ಕೇಳಿ ಬಂದಿದ್ದು, ಒಂದೇ ಒಂದು ಇಂಚು ಸಹ ವರ್ಗಾವಣೆ ಮಾಡಿಲ್ಲ. ಗಮನಕ್ಕೆ ಬಂದಿದ್ದನ್ನು ಪರಿಶೀಲಿಸಿ ರದ್ದುಪಡಿಸಲಾಗಿದೆ. ವಕ್ಫ್​ ಅಧಿಕಾರಿಗಳು ಪಟ್ಟಿಕೊಟ್ಟು ಜಾಗ ಬಿಡಿಸಿಕೊಡಲು ಮನವಿ ಮಾಡಿದ್ದರು. ಆದರೆ ಅದಕ್ಕೆ ಅವಕಾಶ ನೀಡಿಲ್ಲ.

-ಅಕ್ರಂಪಾಷಾ, ಡಿಸಿ, ಕೋಲಾರ

ಕೋಟ್​...

ಕೋಲಾರ ತಾಲೂಕಿನಲ್ಲಿ ಯಾವುದೇ ಆಸ್ತಿಯನ್ನು ವಕ್ಫ್​ಗೆ ಬದಲಾಯಿಸಲು ಪ್ರಸ್ತಾವನೆ ಬಂದಿಲ್ಲ. ಯಾವುದಾದರು ಪತ್ರ ಹರಿದಾಡುತ್ತಿದ್ದರೆ ಅದು ತಪ್ಪು ಮಾಹಿತಿ. ನಿಖರ ಮಾಹಿತಿ ನೀಡಿದರೆ ಪರಿಶೀಲಿಸಿ ಕ್ರಮಕೈಗೊಳ್ಳಲಾಗುವುದು.

- ಡಾ.ನಯನಾ, ತಹಶೀಲ್ದಾರ್​, ಕೋಲಾರ