ಜಿಲ್ಲಾದ್ಯಂತ ಗಣೇಶ ಮೂರ್ತಿ ತಯಾರಿಕೆಯ ನೂರಾರು ಕಲಾವಿದರ ಕುಟುಂಬಗಳಿವೆ. ಶಿವಮೊಗ್ಗ ನಗರವೊಂದರಲ್ಲೇ 30ರಿಂದ 40 ಕುಟುಂಬಗಳು ಇದೇ ವೃತ್ತಿ ಮಾಡುತ್ತಿವೆ. ಇದೀಗ ಮೂಲ ಕಲಾವಿದರ ಸಂಖ್ಯೆಯೂ ಗಣನೀಯವಾಗಿ ಕುಸಿಯುತ್ತಿದೆ. ಸಿದ್ಧವಾಗಿರುವ ಮೂರ್ತಿಗಳನ್ನು ತಂದು ಮಾರಾಟ ಮಾಡುವುದನ್ನೇ ಕೆಲವರು ಕಾಯಕವನ್ನಾಗಿಸಿಕೊಂಡಿದ್ದು ಮೂಲ ಕಲಾವಿದರು ಮತ್ತು ವ್ಯಾಪಾರಿಗಳ ನಡುವೆ ಪೈಪೋಟಿ ಏರ್ಪಡುವಂತೆ ಮಾಡಿದೆ.
ಬಹುತೇಕ ಕಲಾವಿದರು ಶಿವಮೊಗ್ಗ ತಾಲೂಕಿನ ಹಾರನಹಳ್ಳಿ, ಕೋಟೆಗಂಗೂರು ಭಾಗದಲ್ಲಿ ಸಿಗುವ ಜೇಡಿಮಣ್ಣನ್ನು ತಂದು ಮೂರ್ತಿ ಸಿದ್ಧಪಡಿಸುತ್ತಾರೆ. ಇತ್ತ ವ್ಯಾಪಾರಿಗಳು ಗಣೇಶ ಹಬ್ಬ ಕೆಲವೇ ದಿನಗಳು ಇರುವಾಗ ಹೊರ ಜಿಲ್ಲೆಗಳಿಂದ ಮೂರ್ತಿಗಳನ್ನು ತಂದು ಬೇಕಾಬಿಟ್ಟಿಯಾಗಿ ಮಾರಾಟಕ್ಕೆ ಸಿದ್ಧತೆ ಮಾಡಿಕೊಂಡಿದ್ದಾರೆ. ಇದು ಎರಡ್ಮೂರು ತಿಂಗಳು ಶ್ರಮ ಹಾಕಿ ಮೂರ್ತಿಗಳನ್ನು ತಯಾರು ಮಾಡುತ್ತಿರುವ ಮೂಲ ಕಲಾವಿದರ ದುಡಿಮೆಗೆ ಪೆಟ್ಟು ನೀಡುತ್ತಿದೆ.
ಅಚ್ಚೊತ್ತಿದ ಮೂರ್ತಿಗಳು ಜಿಲ್ಲೆಗೆ ಲಗ್ಗೆ: ಈ ಹಿಂದೆ ಮೂರ್ನಾಲ್ಕು ತಿಂಗಳ ಮೊದಲೇ ಗಣೇಶ ಮೂರ್ತಿಗಳನ್ನು ಮಾಡಲು ಸಿದ್ಧತೆ ಮಾಡಿಕೊಳ್ಳುತ್ತಿದ್ದರು. ಆದರೆ ಈಗ ಒಂದೇ ದಿನಕ್ಕೆ ಮೂರ್ನಾಲ್ಕು ಮೂರ್ತಿಗಳು ರೆಡಿಯಾಗುತ್ತಿವೆ. ಅಚ್ಚೊತ್ತಿದ ಮೂರ್ತಿಗಳನ್ನು ಹೊರ ಜಿಲ್ಲೆಗಳಿಂದ ತಂದು ಮನಸ್ಸೋ ಇಚ್ಛೆಯಂತೆ ದರ ನಿಗದಿಪಡಿಸಿ ಮಾರಾಟ ಮಾಡುತ್ತಿದ್ದಾರೆ. ವಿಶೇಷವಾಗಿ ಬೆಳಗಾವಿ ಜಿಲ್ಲೆ ಗೋಕಾಕದಿಂದ ನೂರಾರು ಮೂರ್ತಿಗಳನ್ನು ತರಿಸಲಾಗುತ್ತಿದೆ. ಮೂರರಿಂದ ಐದು ಅಡಿವರೆಗಿನ ಮೂರ್ತಿಗಳನ್ನು ಹೆಚ್ಚು ಬೆಲೆಗೆ ಮಾರಾಟ ಮಾಡಲು ಸಜ್ಜಾಗಿದ್ದಾರೆ. ಕೈಯಿಂದ ಮಾಡಿದ ಒಂದಡಿ ಮೂರ್ತಿಗಳಿಗೆ ಕಲಾವಿದರು 700-800 ರೂ. ದರ ನಿಗದಿ ಮಾಡಿದರೆ, ಅಚ್ಚೊತ್ತಿದ ಮೂರ್ತಿಗಳನ್ನು ಶಿವಮೊಗ್ಗದ ಮೀನಾಕ್ಷಿ ಭವನ, ಚೀಲೂರು, ಕುಂಸಿ, ಹಾರನಹಳ್ಳಿ, ಶಿಕಾರಿಪುರ ತಾಲೂಕಿನ ಹಿತ್ಲ, ಕಲ್ಮನೆ ಸೇರಿದಂತೆ ಹಲವೆಡೆ ಇರಿಸಿ 400-500 ರೂ.ಗೆ ಮಾರಾಟ ಮಾಡುತ್ತಾರೆ. ಇದು ಮೂಲ ಕಲಾವಿದರ ಅಸಮಾಧಾನಕ್ಕೆ ಕಾರಣವಾಗಿದೆ.
