ಇಂಥ ಪ್ರಕರಣಗಳಲ್ಲಿ ಬ್ಲಡ್ ಮನಿಯಿಂದ ಜೀವ ಉಳಿಯುವ ಸಾಧ್ಯತೆ ಇರುತ್ತದೆ. ಕೊಲೆಗೀಡಾದ ವ್ಯಕ್ತಿಯ ಕುಟುಂಬ ಹತ್ಯೆಗೈದವರನ್ನು ಕ್ಷಮಿಸಬೇಕೆಂದರೆ ‘ದಿಯಾ’ ಎಂಬ ಪರಿಹಾರ ಮೊತ್ತವನ್ನು ನ್ಯಾಯಯುತವಾಗಿ ನೀಡುವುದು ಇಸ್ಲಾಮ್ ಷರಿಯಾ ಕಾನೂನಿನಲ್ಲಿದೆ. ಇದು ಯೆಮೆನ್, ಸೌದಿ ಅರೇಬಿಯಾ, ಇರಾನ್ ಮತ್ತು ಪಾಕಿಸ್ತಾನದಲ್ಲಿ ಜಾರಿಯಲ್ಲಿದೆ. ‘ದಿಯಾ’ ಹಣ ಪಡೆದು ಸಂತ್ರಸ್ತ ಕುಟುಂಬ ಅಪರಾಧಿಯನ್ನು ಕ್ಷಮಿಸಿದರೆ, ಸರ್ಕಾರ ಶಿಕ್ಷೆ ರದ್ದುಗೊಳಿಸುತ್ತದೆ. ಈ ಬ್ಲಡ್ ಮನಿ ಎಂಬ ಪರಿಹಾರದಿಂದ ಮರಣದಂಡನೆ ಶಿಕ್ಷೆಯಿಂದ ಈಗಾಗಲೇ ಕೆಲ ಭಾರತೀಯರು ಜೀವ ಉಳಿಸಿಕೊಂಡಿದ್ದಾರೆ. ಬೆಂಗಳೂರಿನ ಸಲೀಂ ಬಾಬಾ 1.5 ಕೋಟಿ ರೂ. ನೀಡಿ ಜೀವದಾನ ಪಡೆದಿದ್ದು, ಈ ಮೊತ್ತವನ್ನು ಸೌದಿ ದೊರೆ ನೀಡಿದ್ದರು. ಬಹಳಷ್ಟು ಸಲ ಕೆಲ ಉದ್ಯಮಿಗಳು ಈ ಹಣ ನೀಡಿ ಅಪರಾಧಿಗಳ ಜೀವ ಉಳಿಸಿದ್ದಾರೆ.
