ಚಿತ್ರದುರ್ಗ ಜಿಲ್ಲೆಯೊಂದರಲ್ಲೇ ಸುಮಾರು 20 ಸಾವಿರ ಜನರು ಮತಾಂತರವಾಗಿ ದ್ದಾರೆ ಎಂದು ಶಾಸಕ ಗೂಳಿಹಟ್ಟಿ ಹೇಳಿದರೆ, ವಿಜಯಪುರ ಜಿಲ್ಲೆಯ ಮೂರೂವರೆ ಸಾವಿರ ಬಂಜಾರ ಸಮಾಜದ ತಾಂಡಾಗಳಲ್ಲಿ ಮತಾಂತರ ಅವ್ಯಾಹತವಾಗಿ ನಡೆಯುತ್ತಿರುವ ಬಗ್ಗೆ ಶಾಸಕ ದೇವಾನಂದ್ ಗಮನ ಸೆಳೆದಿದ್ದಾರೆ. ಮತಾಂತರ ಹಾವಳಿಯಿಂದ ತಾಂಡಾಗಳಲ್ಲಿ ಸಾಮಾಜಿಕ ಸ್ಥಿತಿ ಬಿಗಡಾಯಿಸುತ್ತಿರುವುದು ಚಿಂತೆಯ ವಿಷಯ. ಮತಾಂತರಕ್ಕಾಗಿ ಮಿಷನರಿಗಳಿಗೆ ವಿದೇಶದಿಂದ ಹಣ ಹರಿದು ಬರುತ್ತಿರುವ ಆರೋಪ ಹಲವು ವರ್ಷಗಳಿಂದಲೂ ಕೇಳಿಬರುತ್ತಿದೆ. ಅಲ್ಲದೆ, ಬಡತನದಲ್ಲಿರುವ ಜನರನ್ನು ಗುರಿಯಾಗಿಸಿ, ಮುಖ್ಯವಾಗಿ ಪರಿಶಿಷ್ಟ ಜಾತಿ ಮತ್ತು ಪಂಗಡದ ಜನರನ್ನು ಮತಾಂತರ ಮಾಡಲಾಗುತ್ತಿದೆ. ಇಂಥವರು, ಆಮಿಷಕ್ಕೆ ಒಳಗಾಗಿ ಮತಾಂತರವಾಗುವುದಲ್ಲದೆ, ಪರಿಶಿಷ್ಟ ಜಾತಿ ಮತ್ತು ಪಂಗಡಕ್ಕಾಗಿ ಇರುವ ಸೌಲಭ್ಯಗಳನ್ನೂ ಬಳಸಿಕೊಳ್ಳುತ್ತಿದ್ದಾರೆ. ಹಿಂದೂ ನಂಬಿಕೆ, ಆಚರಣೆಗಳನ್ನು, ಸಾಂಪ್ರದಾಯಿಕ ಪದ್ಧತಿಗಳನ್ನು ‘ಮೂಢನಂಬಿಕೆ’ ಎಂದು ಜರೆಯುವುದು, ಒತ್ತಾಯಪೂರ್ವಕವಾಗಿ ಒಂದು ಮತದ ಆಚರಣೆಗಳನ್ನು ಹೇರುವುದು ಸೇರಿದಂತೆ ಮತಾಂತರದ ಹೆಸರಲ್ಲಿ ನಡೆಯುತ್ತಿರುವ ಚಟುವಟಿಕೆಗಳು ಅಕ್ಷಮ್ಯ.
