ಚೆಕ್ ಮೂಲಕ ನಡೆದಿದೆ ಬಂಜಾರ ಸಂಘದ ವ್ಯವಹಾರ

ಶಿವಮೊಗ್ಗ: ಜಿಲ್ಲಾ ಬಂಜಾರ ಸಂಘದಲ್ಲಿ ಯಾವುದೇ ಅವ್ಯವಹಾರ ನಡೆದಿಲ್ಲ. ಸುಳ್ಳು ವದಂತಿಗಳಿಗೆ ಬಂಜಾರ ಸಮುದಾಯ ಕಿವಿಗೊಡಬಾರದು ಎಂದು ಸಂಘದ ಅಧ್ಯಕ್ಷ, ಮಾಜಿ ಶಾಸಕ ಕೆ.ಬಿ.ಅಶೋಕ್ ನಾಯ್ಕ ಮನವಿ ಮಾಡಿದರು.

ಜಿಲ್ಲಾ ಬಂಜಾರ ಸಂಘವು 48 ವರ್ಷಗಳಿಂದ ಅಸ್ತಿತ್ವದಲ್ಲಿದೆ. ರಾಜ್ಯ ಸರ್ಕಾರ ಬಾಲರಾಜ್ ಅರಸ್ ರಸ್ತೆಯಲ್ಲಿ ನೀಡಿರುವ 20 ಗುಂಟೆ ಜಾಗದಲ್ಲಿ ಬಂಜಾರ ಭವನ ನಿರ್ಮಿಸಲಾಗಿದೆ ಎಂದು ಗುರುವಾರ ಸುದ್ದಿಗೋಷ್ಠಿಯಲ್ಲಿ ಹೇಳಿದರು.
2021ರ ನಂತರ ಸಂಘವು ಒಂದೇ ಒಂದು ರೂ. ನಗದು ವ್ಯವಹಾರ ಮಾಡಿರುವುದಿಲ್ಲ. ಎಲ್ಲವೂ ಬ್ಯಾಂಕ್ ಚೆಕ್ ಮೂಲಕವೇ ನಡೆದಿದೆ. ಆದರೆ ಸಮಾಜದ ಕೆಲವರು ಅವ್ಯವಹಾರ ನಡೆದಿದೆ ಎಂದು ಆರೋಪಿಸುತ್ತಿದ್ದಾರೆ. ಯಾವುದೇ ಸಮಯದಲ್ಲಿ ಕಚೇರಿಗೆ ಬಂದು ಲೆಕ್ಕಪತ್ರ ಪರಿಶೀಲಿಸಬಹುದು ಎಂದರು.
ಸರ್ಕಾರದಿಂದ 1.50 ಕೋಟಿ ರೂ. ಬಾಕಿ: ಬಿ.ಎಸ್.ಯಡಿಯೂರಪ್ಪ ಸಿಎಂ ಆಗಿದ್ದಾಗ ಸಂಸದ ಬಿ.ವೈ.ರಾಘವೇಂದ್ರ ಅವರು ಸರ್ಕಾರದ ವಿವಿಧ ಇಲಾಖೆಗಳಿಂದ 10.33 ಕೋಟಿ ರೂ. ಮಂಜೂರು ಮಾಡಿಸಿದ್ದರು. ಇದುವರೆಗೆ 8.83 ಕೋಟಿ ರೂ. ಅನುದಾನ ಬಿಡುಗಡೆಯಾಗಿದ್ದು, 1.50 ಕೋಟಿ ರೂ. ಸರ್ಕಾರದಿಂದ ಬಿಡುಗಡೆ ಬಾಕಿಯಿದೆ ಎಂದು ಅಶೋಕನಾಯ್ಕ ಸ್ಪಷ್ಟಪಡಿಸಿದರು. ಭವನ ನಿರ್ಮಾಣಕ್ಕೆ 11.74 ಕೋಟಿ ರೂ. ವೆಚ್ಚವಾಗಿದೆ. ಸರ್ಕಾರದಿಂದ ಬಿಡುಗಡೆ ಆಗಬೇಕಾದ ಬಾಕಿ ಅನುದಾನ ಹೊರತುಪಡಿಸಿ 1.40 ಕೋಟಿ ರೂ. ಅನ್ನು ಗುತ್ತಿಗೆದಾರರಿಗೆ ನೀಡಬೇಕಿದೆ ಎಂದರು.
ಸಂಘದ ಜಿಲ್ಲಾ ಕಾರ್ಯದರ್ಶಿ ಆರ್.ಜಗದೀಶ್, ನಾನ್ಯಾನಾಯ್ಕಾ, ನಾಗೇಶ್‌ನಾಯ್ಕ, ಶಿವಾನಂದ ನಾಯ್ಕ, ಆರ್.ಸಿ.ನಾಯ್ಕ, ಬೋಜ್ಯನಾಯ್ಕ, ಮಂಜುನಾಯ್ಕ, ವಾಸುದೇವ ನಾಯ್ಕ ಇತರರಿದ್ದರು.