ಆರೋಪಿಯ ಅಣತಿಯಂತೆ ಕೃತ್ಯ ಎಸಗುತ್ತಿದ್ದರು:
ನಗರದ ವಿವಿಧ ಪ್ರದೇಶಗಳಿಗೆ ಬೆಳಗ್ಗೆ ಮತ್ತು ಸಂಜೆ ಹೋಗುತ್ತಿದ್ದ ಆರೋಪಿತೆ ರೋಜಾ ಯಾವ ಮನೆಯವರು ಬೆಳಗ್ಗೆ ಮನೆಯ ಮುಂದೆ ರಂಗೋಲಿ ಹಾಕುತ್ತಾರೆ, ಯಾವ ಮನೆಯವರು ವಾಯು ವಿಹಾರ ಮಾಡುತ್ತಾರೆ. ಯಾವ ಮನೆಯವರು ಒಂಟಿಯಾಗಿ ಓಡಾಡುತ್ತಾರೆ ಎಂದು ತಿಳಿದುಕೊಂಡು ಇಬ್ಬರು ಅಪ್ರಾಪ್ತರಿಗೆ ಹೇಳುತ್ತಿದ್ದಳು. ಈಕೆಯ ಅಣತಿಯಂತೆ ಈ ಇಬ್ಬರು ಅಪ್ರಾಪ್ತರು ಕಳ್ಳತನ ಮಾಡಿದ ದ್ವಿಚಕ್ರದಲ್ಲಿ ಓಡಾಡಿಕೊಂಡು ಮಹಿಳೆಯರ ಸರಗಳನ್ನು ಎಗರಿಸಿಕೊಂಡು ಬಂದು ಆರೋಪಿತೆಗೆ ಕೊಡುತ್ತಿದ್ದರು. ಆ ಚಿನ್ನದ ಸರಗಳ ಪೈಕಿ ಕೆಲವನ್ನು ಮಾರಾಟ ಮಾಡಿದರೆ, ಇನ್ನು ಕೆಲವು ಆಭರಣಗಳನ್ನು ಗಿರವಿ ಇಟ್ಟು ಹಣಪಡೆದುಕೊಂಡಿರುವುದು ಪೊಲೀಸರ ವಿಚಾರಣೆಯಿಂದ ಗೊತ್ತಾಗಿದೆ. ಆರೋಪಿಗಳ ಬಂಧನದಿಂದ ಕೆಂಗೇರಿ, ಆರ್.ಆರ್.ನಗರ ಮತ್ತು ಅನ್ನಪೂರ್ಣೇಶ್ವರಿ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ನಡೆದಿದ್ದ ೫ ಸರಗಳ್ಳತನ ಪ್ರಕರಣಗಳು ಬೆಳಕಿಗೆ ಬಂದಿವೆ.
ಅಲ್ಲದೇ ಈ ಇಬ್ಬರು ಅಪ್ರಾಪ್ತರ ವಿರುದ್ಧ ಈಗಾಗಲೇ ಬ್ಯಾಡರಹಳ್ಳಿ, ಮಾದನಾಯಕನಹಳ್ಳಿ, ರಾಮನಗರ, ತಾವರೇಕೆರೆ, ಕುಂಬಳಗೋಡು ಪೊಲೀಸ್ ಠಾಣೆಗಳಲ್ಲಿ ಸುಮಾರು ೧೨ಕ್ಕೂ ಹೆಚ್ಚು ಡಕಾಯಿತಿ, ಸರ ಅಪಹರಣ, ಸುಲಿಗೆ ಪ್ರಕರಣಗಳು ದಾಖಲಾಗಿದ್ದು, ಬಾಲನ್ಯಾಯ ಮಂಡಳಿಯಲ್ಲಿ ವಿಚಾರಣೆಯಲ್ಲಿದೆ.
