ಬೆಂಗಳೂರು: ಬೆೆಂಗಳೂರಿನಲ್ಲಿ ಸೋಮವಾರ ಬಂಧಿತನಾಗಿರುವ, ಕೇಂದ್ರ ಭದ್ರತಾ ಪಡೆಗಳ ಹಿಟ್ಲಿಸ್ಟ್ನಲ್ಲಿದ್ದ ಹಿಜ್ಬುಲ್ ಮುಜಾಹಿದ್ದೀನ್ ಉಗ್ರ ತಾಲಿಬ್ ಹುಸೇನ್ ಬೆಂಗಳೂರಿನಲ್ಲಿ ಕುಳಿತು ಬೇರೆಯವರ ಹೆಸರಿನಲ್ಲಿರುವ ಮೊಬೈಲ್ ನಂಬರ್ ಬಳಸುತ್ತಾ ಜಮ್ಮು- ಕಾಶ್ಮೀರದಲ್ಲಿರುವ ಸಂಬಂಧಿಕರೊಂದಿಗೆ ಸಂಭಾಷಣೆ ನಡೆಸುತ್ತಿದ್ದ. ಇದೇ ಆತನಿಗೆ ಮುಳುವಾಯಿತು. ತಾಲೀಬ್ ಮೊಬೈಲ್ ಮೂಲಕ ನಿರಂತರವಾಗಿ ಕಾಶ್ಮೀರದ ವ್ಯಕ್ತಿಗಳೊಂದಿಗೆ ಸಂಪರ್ಕದಲ್ಲಿರುವ ಮಾಹಿತಿ ಪಡೆದ ಜಮ್ಮು- ಕಾಶ್ಮೀರ ಪೊಲೀಸರು ಮತ್ತು ರಾಷ್ಟ್ರೀಯ ರೈಫಲ್ಸ್ ಪಡೆ ಮೊಬೈಲ್ ಸಿಗ್ನಲ್ ಜಾಡು ಹಿಡಿದು ಬೆಂಗಳೂರಿಗೆ ಆಗಮಿಸಿ ಗಾಂಧಿನಗರದ ಲಾಡ್ಜ್ನಲ್ಲಿ ವಾಸ್ತವ್ಯ ಹೂಡಿ ತಾಲಿಬ್ ಹುಸೇನ್ ಬೆನ್ನತ್ತಿದ್ದರು. ಫೋಟೋ ಹಿಡಿದು ಜಾಲಾಡಿ ಉಗ್ರನನ್ನು ಗುರುತಿಸಿ ಚಲನವಲನದ ಮಾಹಿತಿ ಸಂಗ್ರಹಿಸಿ ಕರ್ನಾಟಕ ಪೊಲೀಸರೊಂದಿಗೆ ಮಾಹಿತಿ ವಿನಿಮಯ ಮಾಡಿಕೊಂಡರು. ಇತ್ತ ಮೇಲಧಿಕಾರಿಯಿಂದ ಸೂಚನೆ ಬರುತ್ತಿದಂತೆ ಎಚ್ಚೆತ್ತ ಶ್ರೀರಾಂಪುರ ಪೊಲೀಸರು, ಫೀಲ್ಡ್ಗೆ ಇಳಿದು ತಾಲಿಬ್ ಹುಸೇನ್ ಫೋಟೋ ಸ್ಥಳೀಯರಿಗೆ ತೋರಿಸಿ ಎಲ್ಲಿದ್ದಾನೆ? ಯಾರ ಸಂಪರ್ಕದಲ್ಲಿ ಇದ್ದಾನೆ? ಆಶ್ರಯ ಕೊಟ್ಟವರು ಯಾರು? ಎಂದೆಲ್ಲ ಮಾಹಿತಿ ಸಂಗ್ರಹಿಸಿದ್ದರು.
