ಚೀನಾದಲ್ಲಿ ಕೊರೊನಾಕ್ಕೆ ಬಲಿಯಾದವರ ಸಂಖ್ಯೆ 490ಕ್ಕೆ ಏರಿಕೆ; ಜಪಾನ್​ ಹಡಗಿನಲ್ಲಿದ್ದ 10 ಮಂದಿಯಲ್ಲಿ ವೈರಸ್​

ಬೀಜಿಂಗ್​: ಚೀನಾದಲ್ಲಿ ಕೊರೊನಾ ವೈರಸ್​ಗೆ ಮೃತಪಟ್ಟವರ ಸಂಖ್ಯೆ ಇಂದು ಬೆಳಗ್ಗೆಯಷ್ಟಕ್ಕೆ 490ಕ್ಕೆ ಏರಿದೆ.

ಈ ಮಧ್ಯೆ ಚೀನಾದಿಂದ ಹೊರಟು ಜಪಾನಿನ ಯೊಕೊಹಾಮಾ ಬಂದರಿಗೆ ತಲುಪಿರುವ ಹಡಗಿನಲ್ಲಿ 10 ಮಂದಿಯಲ್ಲಿ ಕೊರೊನಾ ವೈರಸ್ ಸೋಂಕು ಇರುವುದು ದೃಢಪಟ್ಟಿದ್ದಾಗಿ ಅಲ್ಲಿನ ಆರೋಗ್ಯ ಇಲಾಖೆ ತಿಳಿಸಿದೆ.

ಡೈಮಂಡ್​ ಪ್ರಿನ್ಸೆಸ್​ ಹಡಗಿನಲ್ಲಿ ಸುಮಾರು 3700 ಜನರಿದ್ದರು. ಅದರಲ್ಲಿ ಸದ್ಯ 300 ಜನರ ಆರೋಗ್ಯ ತಪಸಾಣೆ ಮಾಡಲಾಗಿದ್ದು 10 ಜನರಿಗೆ ವೈರಸ್​ ಸೋಂಕು ತಗುಲಿದೆ. ಈ ಪ್ರಮಾಣ ಇನ್ನೂ ಹೆಚ್ಚಾಗುವ ಸಾಧ್ಯತೆ ಇದೆ ಎಂದು ಇಲಾಖೆ ಮಾಹಿತಿ ನೀಡಿದೆ.

ಈ ಹಡಗಿನಲ್ಲಿದ್ದ ಹಾಂಗ್​ಕಾಂಗ್​ನ 80 ವರ್ಷದ ವೃದ್ಧ ಜನವರಿ ಕೊನೆಯಲ್ಲಿ ಅನಾರೋಗ್ಯಕ್ಕೀಡಾಗಿದ್ದರು. ಅವರನ್ನು ತಪಾಸಣೆ ಮಾಡಿದಾಗ ಕೊರೊನಾ ವೈರಸ್​ ಪತ್ತೆಯಾಗಿತ್ತು. ಅದಾದ ಬಳಿಕ ಹಡಗಿನಲ್ಲಿದ್ದವರ ಆರೋಗ್ಯ ತಪಾಸಣೆ ನಡೆಸಲಾಗಿತ್ತು. ಈಗ 10 ಜನರಲ್ಲಿ ವೈರಸ್​ ಪತ್ತೆಯಾಗಿದ್ದು ಎಲ್ಲರೂ 50 ವರ್ಷದ ಮೇಲ್ಪಟ್ಟವರೇ ಆಗಿದ್ದಾರೆ. ಅದರಲ್ಲೂ ಓರ್ವರ ಪರಿಸ್ಥಿತಿ ಗಂಭೀರವಾಗಿದೆ ಎಂದು ಜಪಾನ್ ಆರೋಗ್ಯ ಸಚಿವ ಕಟ್ಸುನೊಬು ಕಟೊ ತಿಳಿಸಿದ್ದಾರೆ.

ಯಾರಲ್ಲಿ ಕೊರೊನಾ ವೈರಸ್​ ದೃಢಪಟ್ಟಿದೆಯೋ ಅವರನ್ನೆಲ್ಲ ಹಡಗಿನಿಂದ ಇಳಿಸಿ ಆಸ್ಪತ್ರೆಗಳಿಗೆ ಕಳಿಸಲಾಗಿದೆ ಎಂದು ಸುದ್ದಿಗೋಷ್ಠಿಯಲ್ಲಿ ಮಾಹಿತಿ ನೀಡಿದ್ದಾರೆ.

ಚೀನಾದಲ್ಲಿ 24,300 ಜನರು ವೈರಸ್​ನಿಂದ ಸೋಂಕಿತರಾಗಿದ್ದಾರೆ. ಬೇರೆಬೇರೆ ದೇಶಗಳಲ್ಲೂ ಕೂಡ ಕೆಲವರಿಗೆ ವೈರಸ್ ತಗುಲಿದೆ.(ಏಜೆನ್ಸೀಸ್​)