ಹವಾಮಾನ ಬದಲಾವಣೆ ಹಲವು ಸವಾಲುಗಳನ್ನು ತಂದೊಡ್ಡಿದ್ದು, ಜಾಗತಿಕ ತಾಪಮಾನವಂತೂ ಕಳವಳಕಾರಿ ಪ್ರಮಾಣದಲ್ಲಿ ಏರಿಕೆಯಾಗುತ್ತಿದೆ. ‘2024 ಅತ್ಯಂತ ಹೆಚ್ಚು ಉಷ್ಣಾಂಶದ ವರ್ಷವಾಗಿತ್ತು’ ಎಂದು ಕೇಂದ್ರ ಹವಾಮಾನ ಇಲಾಖೆಯ ಮಹಾನಿರ್ದೇಶಕ ಮೃತ್ಯುಂಜಯ ಮಹಾಪಾತ್ರ ತಿಳಿಸಿದ್ದು, ‘1901ರ ನಂತರದ ಅವಧಿಯಲ್ಲಿ ಯಾವ ವರ್ಷವೂ ಇಷ್ಟು ಉಷ್ಣಾಂಶ ಇರಲಿಲ್ಲ’ ಎಂಬ ಮಾಹಿತಿಯನ್ನು ಬಹಿರಂಗಪಡಿಸಿದ್ದಾರೆ. ಅಷ್ಟೇ ಅಲ್ಲ, ‘2025ರಲ್ಲಿ ಈ ಹಿಂದಿನ ಎಲ್ಲ ದಾಖಲೆಗಳನ್ನೂ ಮುರಿಯಬಲ್ಲಂತಹ ತಾಪಮಾನ ಇರಲಿದೆ’ ಎಂಬ ಎಚ್ಚರಿಕೆಯನ್ನೂ ಜಾಗತಿಕ ಹವಾಮಾನ ಸಂಸ್ಥೆ ಎರಡು ದಿನಗಳ ಹಿಂದೆ ನೀಡಿದೆ. ಪರಿಸ್ಥಿತಿ ಎಷ್ಟು ಗಂಭೀರವಾಗುತ್ತಿದೆ ಎಂಬುದಕ್ಕೆ ಈ ಬೆಳವಣಿಗೆಗಳು ಸಾಕ್ಷಿ. 2024ರಲ್ಲಿ ಹೆಚ್ಚಿನ ತಾಪಮಾನ ದಾಖಲಾದ ಪರಿಣಾಮ ಬಿಸಿಲ ಬೇಗೆ ತಾಳಲಾರದೆ ಉಷ್ಣಾಘಾತಕ್ಕೆ ಉತ್ತರಪ್ರದೇಶ, ಬಿಹಾರ, ರಾಜಸ್ಥಾನದಲ್ಲಿ ನೂರಾರು ಜನರು ಪ್ರಾಣ ಕಳೆದುಕೊಂಡ ಕಹಿನೆನಪು ಮರೆಯುವ ಮುನ್ನವೇ, ಈ ವರ್ಷವೂ ತಾಪಮಾನ ಹೆಚ್ಚಲಿದೆ ಎಂಬ ಎಚ್ಚರಿಕೆ ಆತಂಕ ತಂದೊಡ್ಡಿದೆ. ರಾಜಸ್ಥಾನದಲ್ಲಂತೂ ತಾಪಮಾನ 50 ಡಿಗ್ರಿ ಸೆಲ್ಸಿಯಸ್ ದಾಟಿತ್ತು.
