ಮಾಜಿ ಶಾಸಕಿ, ಬಿಜೆಪಿ ನಾಯಕಿ ಕುಂಜಾ ಸತ್ಯವತಿ ಹೃದಯಾಘಾತದಿಂದ ನಿಧನ

ತೆಲಂಗಾಣ: ಭದ್ರಾಚಲಂನ ಮಾಜಿ ಶಾಸಕಿ ಹಾಗೂ ಬಿಜೆಪಿ ನಾಯಕಿ ಕುಂಜಾ ಸತ್ಯವತಿ ಹೃದಯಾಘಾತದಿಂದ ಸೋಮವಾರ ಮುಂಜಾನೆ ನಿಧನರಾಗಿದ್ದಾರೆ.

ಕುಂಜಾ ಸತ್ಯವತಿ (52) ಹೃದಯಾಘಾತದಿಂದ ನಿಧನರಾಗಿದ್ದಾರೆ. ಭಾನುವಾರ (ಅಕ್ಟೋಬರ್ 15) ರಂದು ಸತ್ಯವತಿ ಅವರು ಮನೆಯಲ್ಲಿದ್ದಾಗ ಹೃದಯಾಘಾತಕ್ಕೆ ಒಳಗಾಗಿದ್ದರು. ಕುಟುಂಬಸ್ಥರು ಖಾಸಗಿ ಆಸ್ಪತ್ರೆಗೆ ದಾಖಲಿಸಿದ್ದಾರೆ. ಚಿಕಿತ್ಸೆ ಫಲಕಾರಿಯಾಗದೆ ಇಂದು ಕೊನೆಯುಸಿರೆಳೆದಿದ್ದಾರೆ. ಸತ್ಯವತಿ ಸಾವಿನಿಂದ ಕುಟುಂಬಸ್ಥರು ಹಾಗೂ ಅಭಿಮಾನಿಗಳು ಕಣ್ಣೀರಿಟ್ಟಿದ್ದಾರೆ.

ಸತ್ಯವತಿ ಸಾವಿನ ಬಗ್ಗೆ ತೆಲಂಗಾಣ ಬಿಜೆಪಿ ಅಧ್ಯಕ್ಷ ಕಿಶನ್ ರೆಡ್ಡಿ ತೀವ್ರ ಆಘಾತ ವ್ಯಕ್ತಪಡಿಸಿದ್ದಾರೆ. 2009-2014ರ ವಿಧಾನಸಭಾ ಚುನಾವಣೆ ಸಂದರ್ಭದಲ್ಲಿ ಅವರೊಂದಿಗೆ ಕೆಲಸ ಮಾಡಿದ ದಿನಗಳನ್ನು ನೆನಪಿಸಿಕೊಂಡರು. ಆದಿವಾಸಿಗಳ ಅಭಿವೃದ್ಧಿಗೆ ಸದಾ ಶ್ರಮಿಸುತ್ತಿದ್ದು, ಯಾವುದೇ ಸಣ್ಣ ಅವಕಾಶದಲ್ಲೂ ಜನಕಲ್ಯಾಣ ವಿಚಾರದಲ್ಲಿ ತಮ್ಮ ದನಿಯನ್ನು ಬಲವಾಗಿ ಕೇಳುತ್ತಿದ್ದರು. ಸತ್ಯವತಿ ಅವರು ಚುನಾವಣೆಗೆ ಕ್ಷೇತ್ರ ಮಟ್ಟದಲ್ಲಿ ಆಗುತ್ತಿರುವ ಕೆಲಸಗಳನ್ನು ವಿವರಿಸುತ್ತಿದ್ದರು ಎಂದು ಕೇಂದ್ರ ಸಚಿವ ಕಿಶನ್ ರೆಡ್ಡಿ ಸ್ಮರಿಸಿದರು. ಇಂತಹ ಆಘಾತಕಾರಿ ಸುದ್ದಿ ಕೇಳಬೇಕಾಗುತ್ತದೆ ಎಂದು ನಾನು ಊಹಿಸಿರಲಿಲ್ಲ ಎಂದು ಬೇಸರ ವ್ಯಕ್ತಪಡಿಸಿದರು.

ಕುಂಜಾ ಸತ್ಯವತಿ ಬಿಜೆಪಿಯಲ್ಲಿ ಸಕ್ರಿಯ ನಾಯಕಿಯಾಗಿದ್ದು, ಸತ್ಯವತಿ ನಿಧನಕ್ಕೆ ಬಿಜೆಪಿ ಮುಖಂಡರು ಸಂತಾಪ ಸೂಚಿಸಿದ್ದಾರೆ. ಸತ್ಯವತಿ ಅವರ ಹಠಾತ್ ನಿಧನಕ್ಕೆ ಭದ್ರಾಚಲಂನಲ್ಲಿ ಬಿಜೆಪಿ ಮುಖಂಡರು ಮತ್ತು ಇತರ ಪಕ್ಷಗಳ ಪ್ರಮುಖರು ಸಂತಾಪ ಸೂಚಿಸಿದ್ದಾರೆ. ಭದ್ರಾಚಲಂನಲ್ಲಿರುವ ಸತ್ಯವತಿ ಅವರ ಪಾರ್ಥಿವ ಶರೀರವನ್ನು ಸ್ಥಳೀಯರು ಮತ್ತು ಅಭಿಮಾನಿಗಳ ಭೇಟಿಗಾಗಿ ಇರಿಸಲಾಗಿತ್ತು.

ಕುಂಜಾ ಸತ್ಯವತಿ ಅವರು ಭದ್ರಾಚಲಂ ಕ್ಷೇತ್ರದಿಂದ ಕಾಂಗ್ರೆಸ್ ಪಕ್ಷದ ಪರವಾಗಿ ಸ್ಪರ್ಧಿಸಿ 2009ರಿಂದ 2014ರವರೆಗೆ ಶಾಸಕಿಯಾಗಿ ಸೇವೆ ಸಲ್ಲಿಸಿದ್ದರು. ನಂತರ ಬಿಜೆಪಿ ಸೇರಿ ಪಕ್ಷದಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು.

https://www.vijayavani.net/linkedin-to-layoff-668-employees-across-engineering-product-and-other-departments-amid-slow-revenue-growth