ತಮಿಳುನಾಡು ಹೊಸ ಶಿಕ್ಷಣ ನೀತಿ ಬಿಡುಗಡೆ

ಚೆನ್ನೈ: ಕೇಂದ್ರ ಸರ್ಕಾರದ ರಾಷ್ಟ್ರೀಯ ಶಿಕ್ಷಣ ನೀತಿ(ಎನ್​ಇಪಿ)ಗೆ ಪರ್ಯಾಯವಾಗಿ ತಮಿಳುನಾಡು ಮುಖ್ಯಮಂತ್ರಿ ಎಂ.ಕೆ. ಸ್ಟಾಲಿನ್ ಶುಕ್ರವಾರ ರಾಜ್ಯ ಶಿಕ್ಷಣ ನೀತಿ(ಎಸ್​ಇಪಿ) ಬಿಡುಗಡೆ ಮಾಡಿದರು. ಜಸ್ಟಿಸ್ ಮುರುಗೇಶನ್ ನೇತೖತ್ವದ 14 ಸದಸ್ಯರ ಸಮಿತಿ ರೂಪಿಸಿರುವ ಎಸ್​ಇಪಿ, ತ್ರಿಭಾಷಾ ಸೂತ್ರ ಸಹಿತ ಎನ್​ಇಪಿಯ ಅನೇಕ ನೀತಿಗಳನ್ನು ತಿರಸ್ಕರಿಸಿದೆ. ದ್ವಿಭಾಷಾ ನೀತಿಯನ್ನು ಉಳಿಸಿಕೊಂಡಿರುವ ನೀತಿಯು ವಿಜ್ಞಾನ,ಕೃತಕ ಬುದ್ಧಿಮತ್ತೆ (ಎಐ) ಮತ್ತು ಇಂಗ್ಲಿಷ್​ಗೆ ಆದ್ಯತೆ ನೀಡಿದೆ.

ರಾಜ್ಯದ ಹೊಸ ಶಿಕ್ಷಣ ನೀತಿಯನ್ನು ರೂಪಿಸಲು 2022ರಲ್ಲಿ ನಿವೖತ್ತ ನ್ಯಾಯಮೂರ್ತಿ ಮುರುಗೇಶನ್ ನೇತೃತ್ವದ ಸಮಿತಿಯನ್ನು ರಚಿಸಲಾಗಿತ್ತು. ಸಮಿತಿ 2024ರ ಜುಲೈನಲ್ಲಿ ಮುಖ್ಯಮಂತ್ರಿಗೆ ಶಿಫಾರಸುಗಳನ್ನು ಸಲ್ಲಿಸಿದ್ದು, ಅದನ್ನೀಗ ಅಧಿಕೃತವಾಗಿ ಬಿಡುಗಡೆ ಮಾಡಲಾಗಿದೆ.

ಕನ್ಸಾಲಿಡೇಟೆಡ್ ಅಂಕ: ಕಲೆ ಮತ್ತು ವಿಜ್ಞಾನ ವಿಷಯಗಳಲ್ಲಿ ಪದವಿ ಪ್ರವೇಶಕ್ಕೆ ಸಾಮಾನ್ಯ ಪ್ರವೇಶ ಪರೀಕ್ಷೆ (ಸಿಇಟಿ) ಬದಲು 11 ಮತ್ತು 12ನೇ ತರಗತಿಗಳ ಕ್ರೋಡೀಕೃತ ಅಂಕಗಳನ್ನು ಪರಿಗಣಿಸಲು ಮುರುಗೇಶನ್ ಸಮಿತಿ ಶಿಫಾರಸು ಮಾಡಿದೆ. 3, 5 ಮತ್ತು 8ನೇ ತರಗತಿಗಳಿಗೆ ಪಬ್ಲಿಕ್ ಪರೀಕ್ಷೆ ನಡೆಸುವ ಎನ್​ಇಪಿ ಪ್ರಸ್ತಾಪನೆಯು ಪ್ರತಿಗಾಮಿ, ಸಾಮಾಜಿಕ ನ್ಯಾಯವಿರೋಧಿ ಎಂದು ಎಸ್​ಇಪಿ ವರ್ಣಿಸಿದೆ. ಅದು ಡ್ರಾಪೌಟ್ ಪ್ರಮಾಣ ಹೆಚ್ಚಳ ಹಾಗೂ ಶಿಕ್ಷಣದ ಖಾಸಗೀಕರಣಕ್ಕೆ ಇಂಬು ನೀಡುತ್ತದೆ ಎಂದು ಅಭಿಪ್ರಾಯಪಟ್ಟಿದೆ.