ಕಾಬುಲ್: ದ್ವೇಷವನ್ನು ಮರೆತು ಅಫ್ಘಾನಿಸ್ತಾನದ ಮರುನಿರ್ಮಾಣ ಮಾಡುತ್ತೇವೆ ಎಂದು ಹೇಳಿಕೊಂಡಿದ್ದ ತಾಲಿಬಾನ್ ಉಗ್ರರ ಮುಖವಾಡ ಬಯಲಾಗಿದೆ. ದೇಶದೆಲ್ಲೆಡೆ ಸಂಘಟನೆಗೆ ವಿರೋಧ ಹೆಚ್ಚುತ್ತಿರುವುದರಿಂದ ಕ್ರುದ್ಧರಾಗಿರುವ ಉಗ್ರರು ಈ ಹಿಂದೆ ಅಮೆರಿಕ ಹಾಗೂ ನ್ಯಾಟೋ ಪಡೆಗಳಿಗೆ ನೆರವು ನೀಡಿದವರನ್ನು ಮನೆಯಿಂದ ಹೊರಗೆ ಎಳೆದು ತಂದು ಕೊಲ್ಲುವ ಮೂಲಕ ರಕ್ತದೋಕುಳಿಯ ಹೊಸ ಅಧ್ಯಾಯ ಆರಂಭಿಸಿದ್ದಾರೆ. ತಾಲಿಬಾನಿಗಳು ಅಫ್ಘಾನಿಸ್ತಾನವನ್ನು ವಶಪಡಿಸಿಕೊಂಡು ಐದು ದಿನಗಳಾಗಿವೆ. ಸಂಘಟನೆಯ ನಾಯಕರು ಶಾಂತಿ, ಸಂಧಾನದ ಮಾತುಗಳನ್ನಾಡುತ್ತಿದ್ದರೂ ತಳಮಟ್ಟದಲ್ಲಿ ಹಿಂಸೆ ಮುಂದುವರಿಸಿದ್ದಾರೆ. ಇದರಿಂದಾಗಿ ಅಫ್ಘನ್ನರು ಪ್ರತಿರೋಧ, ಪ್ರತಿಭಟನೆ ತೋರಿಸಲಾರಂಭಿಸಿದ್ದಾರೆ. ದೇಶದ ಸ್ವಾತಂತ್ರೊ್ಯೕತ್ಸವದಲ್ಲಿ ತಾಲಿಬಾನಿ ವಿರೋಧಿ ಪ್ರತಿಭಟನೆ ಹೆಚ್ಚಾದ ಬಳಿಕ ವಿರೋಧಿಗಳನ್ನು ಗುರಿಯಾಗಿಸಿಕೊಂಡು ದಾಳಿ ಆರಂಭಿಸಿದ್ದಾರೆ. ವಿಶೇಷವಾಗಿ ಜನಾಂಗೀಯ ಅಲ್ಪಸಂಖ್ಯಾತ ಸಮುದಾಯದ ಹಲವರನ್ನು ಹುಡುಕಿ ಹತ್ಯೆ ಮಾಡಿದ್ದಾರೆ. ಈ ವಿದ್ಯಮಾನ ಜಾಗತಿಕ ಮಟ್ಟದಲ್ಲೂ ಕಳವಳ, ಆತಂಕ ಸೃಷ್ಟಿಸಿದೆ. ಷರಿಯಾ ಕಾನೂನು ಅನುಸರಿಸುವುದಾಗಿ ತಾಲಿಬಾನ್ ಘೋಷಿಸಿರುವ ಕಾರಣ, ಅನೇಕ ಅಫ್ಘನ್ನರು ಊರು ಬಿಟ್ಟು ಹೋಗಲು ಪ್ರಯತ್ನಿಸಿದ್ದಾರೆ.
