ಸುಳ್ಯದಲ್ಲಿ ಕೆರೆಗೆ ಬಿದ್ದ ಕಾಡಾನೆ ಹಿಂಡುಅರಣ್ಯ ಇಲಾಖೆ ಕಾರ್ಯಾಚರಣೆ ಬಳಿಕ ಮರಳಿ ಕಾಡಿಗೆ

ಮಂಗಳೂರು: ಆಹಾರ ಅರಸಿ ಕಾಡಿನಿಂದ ನಾಡಿಗೆ ಬಂದ ನಾಲ್ಕು ಆನೆಗಳು ಕೃಷಿ ತೋಟದ ಕೆರೆಯಲ್ಲಿ ಬಿದ್ದು ಇಕ್ಕಟ್ಟಿಗೆ ಸಿಲುಕಿದ ಘಟನೆ ಗುರುವಾರ ಅಜ್ಜಾವರದಲ್ಲಿ ನಡೆದಿದೆ. ಅರಣ್ಯ ಇಲಾಖೆ ಅಧಿಕಾರಿಗಳ ಎರಡು ತಾಸುಗಳ ಕಾರ್ಯಾಚರಣೆ ಬಳಿಕ ಕಾಡಿಗೆ ಮರಳಿದವು.

ಘಟನೆ ಬುಧವಾರ ರಾತ್ರಿಯೇ ಸಂಭವಿಸಿದರೂ ಬೆಳಕಿಗೆ ಬಂದದ್ದು ಮಾತ್ರ ಗುರುವಾರ ಬೆಳಗ್ಗೆ. ಅಜ್ಜಾವರದ ತುದಿಯಡ್ಕದ ಸಂತೋಷ್ ರೈ ಎಂಬುವರ ತೋಟದ ಕೆರೆಗೆ ಒಂದು ಮರಿ ಹಾಗೂ ಮೂರು ದೊಡ್ಡ ಆನೆಗಳು ಸಿಲುಕಿದ್ದವು. ತುಂಬಾ ಆಳ ಹಾಗೂ ಕೆಸರು ತುಂಬಿದ ಕೆರೆಯಾದ ಕಾರಣ ಆನೆಗಳಿಗೆ ಮೇಲೆ ಬರುವುದು ಸಾಧ್ಯವಾಗಿಲ್ಲ. ಘಟನೆ ಬೆಳಗ್ಗಿನ ಜಾವ ಬೆಳಕಿಗೆ ಬಂದಿದ್ದು, ಬಳಿಕ ಅರಣ್ಯ ಇಲಾಖೆಯ ಅಧಿಕಾರಿಗಳಿಗೆ ತಿಳಿಸಲಾಯಿತು.

ಎರಡು ತಾಸು ಕಾರ್ಯಾಚರಣೆ: ಸುಳ್ಯ ವಲಯ ಅರಣ್ಯಾಧಿಕಾರಿ ಎನ್.ಮಂಜುನಾಥ್ ನೇತೃತ್ವದಲ್ಲಿ ಅರಣ್ಯ ಇಲಾಖೆ ಸ್ಥಳೀಯರು ಸೇರಿ ಕಾರ್ಯಾಚರಣೆ ನಡೆಸಿದರು. ಈ ಸಂದರ್ಭ ಗಜಪಡೆ ಕೆರೆ ಸುತ್ತಲೂ ತಿರುಗಿ ಮೇಲೆ ಬರಲು ಪ್ರಯತ್ನ ನಡೆಸುತ್ತಿದ್ದವು. ವಿಷಯ ತಿಳಿದ ಜನ ಕೆರೆಯ ಸುತ್ತ ಜಮಾಯಿಸಿದ್ದರು.

ಕೆರೆಯ ಒಂದು ಮೂಲೆಯಲ್ಲಿ ಅಗೆದು ಆನೆಗಳು ಮೇಲೆ ಬರುವಂತೆ ಮಾಡಲಾಯಿತು. ಸುಮಾರು ಎರಡು ಗಂಟೆಗಳ ಕಾರ್ಯಾಚರಣೆ ಕೊನೆಗೂ ಫಲ ನೀಡಿತು. ಮೂರು ಆನೆಗಳು ಏರಿ ಬಚಾವಾದರೂ ಮರಿಯಾನೆ ಮೇಲೇಳಲು ಸಾಧ್ಯವಾಗದಷ್ಟು ಬಸವಳಿದಿತ್ತು. ಬಳಿಕ ಹಗ್ಗದ ಸಹಾಯದಿಂದ ಎಳೆದು ಹಾಗೂ ಹಿಂದಿನಿಂದ ದೂಡಿ ಮೇಲೆ ಬರುವಂತೆ ಮಾಡಲಾಯಿತು. ಆದರೂ ನಡೆಯಲಾರದೆ ಅಸಹಾಯಕ ಸ್ಥಿತಿಯಲ್ಲಿದ್ದ ಮರಿಯಾನೆಯನ್ನು ಸ್ಥಳೀಯರು ಕಾಡಿನಂಚಿನವರೆಗೆ ತಳ್ಳಿಕೊಂಡು ಹೋಗಿ ಬಿಟ್ಟು ಬಂದರು.