ಈ ಮುಂಚೆ ಮಾದಕವಸ್ತು ಕಾಯ್ದೆಯಡಿ ಬಂಧಿತರಾದವರು ಕೆಲವೇ ದಿನಗಳಲ್ಲಿ ಜಾಮೀನು ಪಡೆದು ಜೈಲಿನಿಂದ ಹೊರಬರುತ್ತಿದ್ದರಲ್ಲದೆ, ಮತ್ತೆ ಹಳೇ ಚಾಳಿಯನ್ನು ಮುಂದುವರಿಸುತ್ತಿದ್ದರು. ಹಾಗಾಗಿ, ಈ ದಂಧೆಕೋರರನ್ನು ನಿಯಂತ್ರಿಸುವುದು ಪೊಲೀಸರಿಗೆ ದೊಡ್ಡ ಸವಾಲಾಗಿತ್ತು. ಪ್ರಸಕ್ತ, ಇಂಥ ದಂಧೆಕೋರರ ಬಂಧನಕ್ಕೆ ಕಮಿಷನರ್ಗಳು, ವಲಯ ಐಜಿಪಿಗಳು ಆದೇಶ ಹೊರಡಿಸಬಹುದಾಗಿದೆ. ಅಲ್ಲದೆ, ವಾರಂಟ್ ಮೇಲೆ ದೇಶದ ಯಾವ ಮೂಲೆಯಲ್ಲಿದ್ದರೂ ಆರೋಪಿಯನ್ನು ಬಂಧಿಸಬಹುದಾಗಿದೆ. ಹಾಗಾಗಿ, ಹೊಸ ಕಾಯ್ದೆಯಿಂದ ಪೊಲೀಸರ ಕೈಗಳು ಬಲಗೊಂಡಿದ್ದು, ಡ್ರಗ್ಸ್ ಮಾಫಿಯಾ ಸಂಪೂರ್ಣ ನಿಯಂತ್ರಣಕ್ಕೆ ಬರಬೇಕಿದೆ. ಸಾಮಾಜಿಕ ಸ್ವಾಸ್ಥ್ಯ ಸ್ಥಾಪಿಸುವ ನಿಟ್ಟಿನಲ್ಲಿ ಜನಸಾಮಾನ್ಯರು ಕೂಡ ಪೊಲೀಸ್ ಇಲಾಖೆ, ಸರ್ಕಾರದ ಕ್ರಮಗಳಿಗೆ ಬೆಂಬಲವಾಗಿ ನಿಂತು, ಡ್ರಗ್ಸ್ ಮಾಫಿಯಾವನ್ನು ಬಗ್ಗು ಬಡಿಯಲು ಸಹಕರಿಸಬೇಕು.
