ಗ್ರಾಮೀಣ ಜನರಿಗೆ ಉದ್ಯೋಗ ಅವಕಾಶ ನೀಡುವ ಮಹಾತ್ಮಗಾಂಧಿ ಗ್ರಾಮೀಣ ಉದ್ಯೋಗ ಖಾತ್ರಿ ಯೋಜನೆಯ ಗುರಿ ಪೂರ್ಣಗೊಳಿಸುವ ಸಲುವಾಗಿ ಐದಂಶಗಳ ಸೂತ್ರ ಪ್ರಯೋಗಿಸಲು ಸರ್ಕಾರ ಮುಂದಾಗಿದೆ. ರಾಜ್ಯದಲ್ಲಿ ಇದೇ ಮೊದಲ ಬಾರಿಗೆ 16 ಕೋಟಿ ಮಾನವ ದಿನ ಸೃಷ್ಟಿಸಿರುವ ನರೇಗಾದಲ್ಲಿ ಹೊಸ ಕಾರ್ಯಕ್ರಮ ಅಳವಡಿಸಿಕೊಳ್ಳಲಾಗುತ್ತಿದೆ. ಆ ಮೂಲಕ ಉದ್ಯೋಗ ನೀಡಿಕೆ ಜತೆಯಲ್ಲೇ ಆಸ್ತಿ ಸೃಜನೆಯ ಕಡೆಗೂ ಆದ್ಯತೆ ನೀಡಲು ಸರ್ಕಾರ ಗಮನ ಹರಿಸಿದೆ. ರಸ್ತೆಯಂತಹ ಕಾಮಗಾರಿಗಷ್ಟೇ ಸೀಮಿತವಾಗಿದ್ದ ನರೇಗಾ ಯೋಜನೆಯಲ್ಲಿ ಇತ್ತೀಚಿನ ವರ್ಷಗಳಲ್ಲಿ ಅಂತರ್ಜಲ ಹೆಚ್ಚಿಸುವ ಕೃಷಿಹೊಂಡ, ಬದುಗಳ ನಿರ್ವಣ, ಕಲ್ಯಾಣಿ, ಕೆರೆಗಳ ಪುನಶ್ಚೇತನ, ತೆರೆದ ಬಾವಿ ಅಭಿವೃದ್ಧಿಯಂತಹ ಯೋಜನೆಗಳನ್ನು ಯಶಸ್ವಿಯಾಗಿ ಜಾರಿಗೊಳಿಸಲಾಗಿತ್ತು. ಇದೀಗ ಇನ್ನೊಂದು ಹೆಜ್ಜೆ ಮುಂದೆ ಹೋಗಿ ಹೊಸ ಕಾಮಗಾರಿ ಕೈಗೊಳ್ಳಲು ಗ್ರಾಮೀಣಾಭಿವೃದ್ಧಿ ಮತ್ತು ಪಂಚಾಯತ್ರಾಜ್ ಇಲಾಖೆ ಸಿದ್ಧತೆ ಮಾಡಿಕೊಂಡಿದೆ.
