ಅದುರಿದ ನಡೆ ಮೀಸಲಿಗೆ ತಡೆ

ವಿಜಯವಾಣಿ ಸುದ್ದಿಜಾಲ ಬೆಂಗಳೂರು

ಖಾಸಗಿ ವಲಯದಲ್ಲಿ ‘ಸ್ಥಳೀಯರಿಗೆ’ ಉದ್ಯೋಗ ಗ್ಯಾರಂಟಿ ಕೊಡಿಸುವ ಉದ್ದೇಶದಿಂದ ರಾಜ್ಯ ಸರ್ಕಾರ ವಿಧಾನಮಂಡಲ ಅಧಿವೇಶನದಲ್ಲಿ ಮಂಡಿಸಲು ಉದ್ದೇಶಿಸಿರುವ ಮಸೂದೆಗೆ ಉದ್ಯಮ ವಲಯದಿಂದ ತೀವ್ರ ವಿರೋಧ ವ್ಯಕ್ತವಾಗಿದೆ. ಜತೆಗೆ ಸಿದ್ದರಾಮಯ್ಯ ಸಂಪುಟದ ಕೆಲವು ಸದಸ್ಯರಿಂದಲೂ ಅಪಸ್ವರ ವ್ಯಕ್ತವಾದ ಹಿನ್ನೆಲೆಯಲ್ಲಿ ಸರ್ಕಾರ ತನ್ನ ನಿಲುವಿನಿಂದ ದಿಢೀರ್ ಹಿಂದೆ ಸರಿದಿದೆ.

ರಾಜ್ಯದ ಖಾಸಗಿ ಕೈಗಾರಿಕೆಗಳು ಹಾಗೂ ಇತರ ಸಂಸ್ಥೆಗಳ ಆಡಳಿತಾತ್ಮಕ ಹುದ್ದೆಗಳಲ್ಲಿ ಶೇ. 50 ಹಾಗೂ ಆಡಳಿತಾತ್ಮಕವಲ್ಲದ ಹುದ್ದೆಗಳಲ್ಲಿ ಶೇ. 75 ಮೀಸಲಾತಿ ನಿಗದಿಪಡಿಸುವ ವಿಧೇಯಕಕ್ಕೆ ಸೋಮವಾರ ನಡೆದ ಸಚಿವ ಸಂಪುಟ ಸಭೆ ಒಪ್ಪಿಗೆ ನೀಡಿತ್ತು. ಇದು ರಾಜ್ಯದ ಉದ್ಯಮವರ್ಗದ ಅಸಮಾಧಾನಕ್ಕೆ ಕಾರಣವಾಗಿತ್ತು. ಅಲ್ಲದೆ ಸಿದ್ದರಾಮಯ್ಯ ಮಂತ್ರಿಮಂಡಲದಲ್ಲೂ ಅಪಸ್ವರ ಮೂಡಿಸಿತು. ಕಾಂಗ್ರೆಸ್ ಹೈಕಮಾಂಡ್​ಗೂ ಈ ಬೆಳವಣಿಗೆಯ ಬಿಸಿ ತಟ್ಟಿತು. ಈ ಕಾರಣಕ್ಕೆ ಸಿಎಂ ಕಚೇರಿ ಬುಧವಾರ ರಾತ್ರಿ ತನ್ನ ನಿರ್ಧಾರ ಮರು ಪರಿಶೀಲಿಸುವ ತೀರ್ವನಕ್ಕೆ ಬಂದಿದೆ.

ಚರ್ಚೆ ಇಲ್ಲದೆ ಪಾಸ್: ಸೋಮವಾರದ ಸಂಪುಟ ಸಭೆಯಲ್ಲಿ ಈ ಮಸೂದೆ ಹೆಚ್ಚು ಚರ್ಚೆ ಇಲ್ಲದೆ ಅನುಮೋದನೆಗೊಂಡಿದೆ ಎಂಬ ಮಾತು ಹರಿದಾಡುತ್ತಿದೆ. ಅಧಿವೇಶನ ಇದ್ದ ಕಾರಣ ಸಂಜೆ 6.30ಕ್ಕೆ ಆರಂಭವಾದ ಸಂಪುಟ ಸಭೆಯಲ್ಲಿ ಬಹಳ ವಿಷಯ ಚರ್ಚೆಗೆ ಬಂದಿದ್ದವು. ಹೀಗಾಗಿ ಈ ವಿಧೇಯಕದ ವಿಷಯ ಹೆಚ್ಚು ಚರ್ಚೆಗೆ ಅವಕಾಶ ಸಿಗಲಿಲ್ಲ ಎಂದು ಸಚಿವ ರೊಬ್ಬರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ಇನ್ನು ಕೈಗಾರಿಕೆ ಹಾಗೂ ಐಟಿಬಿಟಿ ಇಲಾಖೆಗೆ ಈ ವಿಷಯ ಗಮನಕ್ಕೆ ಬಂದಿಲ್ಲ. ಜತೆಗೆ ವಿಧೇಯಕ ಮಂಡಿಸುವ ಮೊದಲು ಉದ್ಯಮ ಕ್ಷೇತ್ರದ ಜತೆ ಚರ್ಚೆ ನಡೆಸಿಲ್ಲ ಎಂದು ಮೂಲಗಳು ತಿಳಿಸಿವೆ. ಅಧಿಕಾರಿಗಳು ಸಂಪುಟ ಸಭೆಗೆ ನೀಡಿದ ಚುಟುಕು ಮಾಹಿತಿಗೂ, ಕರಡು ಮಸೂದೆಯಲ್ಲಿನ ವಿವರಗಳಿಗೂ ವ್ಯತ್ಯಾಸಗಳಿದ್ದವು ಎಂಬ ಆಕ್ಷೇಪ ವ್ಯಕ್ತವಾಗಿದೆ.

ಉದ್ಯಮಿಗಳ ಆಕ್ಷೇಪ ಏನು?

• ಕರ್ನಾಟಕ ಭಾರತದ ಟೆಕ್ ಹಬ್ ಆಗಿದೆ
• ಕೌಶಲ್ಯಭರಿತ ಮಾನವಸಂಪನ್ಮೂಲ ಬೇಕು
• ಕೌಶಲ್ಯಯುಕ್ತ ಅಭ್ಯರ್ಥಿಗಳು ಬೇಕೇ ಬೇಕು
• ಸ್ಥಳೀಯರಿಗೆ ಉದ್ಯೋಗ ನೀಡುವ ಆಶಯ ಸರಿ
• ಹಾಗಂತ ಐಟಿಯ ಅಗ್ರ ಸ್ಥಾನಕ್ಕೆ ಧಕ್ಕೆ ಸರಿಯಲ್ಲ
• ಸರ್ಕಾರ ಬೇಕಿದ್ದರೆ ಉನ್ನತ ಶಿಕ್ಷಣಕ್ಕೆ ಒತ್ತು ಕೊಡಲಿ
• ಕನ್ನಡಿಗ ಅಭ್ಯರ್ಥಿಗಳಿಗೆ ಹೆಚ್ಚು ತರಬೇತಿ ನೀಡಲಿ
• ಕೌಶಲ್ಯ ಪೂರ್ಣರಾಗಿಸುವುದಕ್ಕೆ ಆದ್ಯತೆ ಸಿಗಬೇಕು
• ಖಾಸಗಿ ನೇಮಕ ಸಮಿತಿಗಳಲ್ಲಿ ಸರ್ಕಾರಿ ಅಧಿಕಾರಿಯೇ?
• ಹೀಗೆ ಕುಳಿತು ಅವರು ಆಡಳಿತ ನಡೆಸಲಾಗುವುದೇ?

ಯಾರೆಲ್ಲ ಸ್ಥಳೀಯರು?

• ರಾಜ್ಯದಲ್ಲಿ ಹುಟ್ಟಿದವರು ಅಥವಾ 15 ವರ್ಷದಿಂದ ವಾಸಿಸುತ್ತಿರುವವರು
• ಕನ್ನಡ ಓದಿ, ಬರೆಯಲು ಮಾತನಾಡಲು ಬರುವವರು, ನೋಡಲ್ ಏಜೆನ್ಸಿ ನಡೆಸುವ ಕನ್ನಡ ಪರೀಕ್ಷೆಯಲ್ಲಿ ಪಾಸಾದವರು

ಮಸೂದೆಯಲ್ಲೇನಿದೆ?

* ಮ್ಯಾನೇಜ್​ವೆುಂಟ್​ನಲ್ಲಿ ಸೂಪರ್​ವೈಸರ್, ಟೆಕ್ನಿಕಲ್, ಆಪರೇಷನಲ್, ಆಡಳಿತ ಸೇರಿ ಉನ್ನತ ಹುದ್ದೆಗಳಲ್ಲಿ ಶೇ. 50 ಉದ್ಯೋಗ ಸ್ಥಳೀಯರಿಗೆ ಮೀಸಲು

* ನಾನ್ ಮ್ಯಾನೇಜ್​ವೆುಂಟ್ ವರ್ಗದಲ್ಲಿ ಕ್ಲರ್ಕ್, ಕೌಶಲ, ಕೌಶಲ ರಹಿತ ಹಾಗೂ ಅರೆ ಕೌಶಲ, ಗುತ್ತಿಗೆ ನೌಕರ ಹುದ್ದೆಗಳಲ್ಲಿ ಶೇ.75 ಸ್ಥಳೀಯರಿಗೆ ಮೀಸಲು

* ಈ ಕಾನೂನು ಜಾರಿ ಮಾಡದ ಸಂಸ್ಥೆಗೆ 10 ಸಾವಿರದಿಂದ 25 ಸಾವಿರ ರೂ.ವರೆಗೆ ದಂಡ ಹಾಗೂ ಪ್ರತಿ ದಿನ 100 ರೂ.ನಂತೆ ದಂಡ

ತಡೆಗೆ ಐದು ಕಾರಣಗಳು

1 ಕಾಂಗ್ರೆಸ್ ವರಿಷ್ಠರವರೆಗೂ ತಟ್ಟಿದ ಬಿಸಿ

2 ಸಂಪುಟದ ಕೆಲ ಸದಸ್ಯರ ಅಪಸ್ವರ

3 ರಾಜ್ಯದ ಉದ್ಯಮಿಗಳಿಂದ ತೀವ್ರ ಆಕ್ಷೇಪ

4 ಹೂಡಿಕೆಗೆ ಹೊಡೆತ ಬೀಳುವ ಆತಂಕ

5 ಅವಕಾಶ ಲಾಭಕ್ಕೆ ನೆರೆ ರಾಜ್ಯದ ಹೊಂಚು

ಕನ್ನಡಿಗರಿಗೆ ಕೆಲಸ ನೀಡಬೇಕೆಂದರೆ ಅವರಿಗೆ ತರಬೇತಿ ಕೊಡಲಿ, ಕೌಶಲ್ಯಾಭಿವೃದ್ಧಿ, ಇಂಟರ್ನ್​ಶಿಪ್, ಅಪ್ರೆಂಟಿಸ್​ಶಿಪ್ ಕಾರ್ಯಕ್ರಮಗಳಿಗೆ ಸರ್ಕಾರ ಹೆಚ್ಚು ಖರ್ಚು ಮಾಡಲಿ. ರಾಜ್ಯ ಸರ್ಕಾರ ಈ ರೀತಿಯ ಮಸೂದೆ ತರಬಹುದು ಎಂದು ನಂಬುವುದಕ್ಕೂ ಸಾಧ್ಯವಿಲ್ಲ. | ಮೋಹನ್ ದಾಸ್ ಪೈ ಉದ್ಯಮಿ ಕೂಗುಮಾರಿಗಳಿಗೆ ಕವಡೆ ಕಾಸಿನ ಕಿಮ್ಮತ್ತು ನೀಡಬೇಕಾಗಿಲ್ಲ. ಎಂದೋ ಆಗಬೇಕಾಗಿದ್ದ ಕೆಲಸವಿದು. ಸಿದ್ದರಾಮಯ್ಯ ಅವರ ಕನ್ನಡ ಕಾಳಜಿ, ಬದ್ಧತೆಯಿಂದ ಈಗ ಸಾಧ್ಯವಾಗುತ್ತಿದೆ. ಶಾಸಕರು ಸರ್ವಾನುಮತದಿಂದ ಅನುಮೋದಿಸಿ ಅಂಗೀಕರಿಸುತ್ತಾರೆಂಬ ವಿಶ್ವಾಸವಿದೆ. | ಟಿ.ಎ. ನಾರಾಯಣಗೌಡ ಕರವೇ ಅಧ್ಯಕ್ಷ

https://www.vijayavani.net/govt-stalls-job-reservation-bill-for-kannadigars-in-private-sector