Stock market: ದೀಪಾವಳಿಗೆ ಷೇರು ಖರೀದಿಸಿದ್ರೆ ಮಹಾಲಕ್ಷ್ಮೀ ಕೃಪೆ ಇರುತ್ತದೆಯೇ? ವರ್ಷದಿಂದೀಚೆ ಎಷ್ಟು ರಿಟರ್ನ್ ಪಡೆದಿದ್ದೀರಿ?

ಮುಂಬೈ: ದೀಪಾವಳಿಯಲ್ಲಿ ಲಕ್ಷ್ಮೀಪೂಜೆಯೂ ಇರುತ್ತದೆ. ಈ ಸಂದರ್ಭ ಷೇರು ಖರೀದಿಸುವುದು ಲಾಭದಾಯಕವೇ? ಷೇರುಪೇಟೆ(Stock market)ಯಲ್ಲಿ ಲಕ್ಷ್ಮಿ ದೇವಿಯ ಆಶೀರ್ವಾದ ಸುರಿಯುತ್ತಿದೆಯೇ? ಕಳೆದ ದೀಪಾವಳಿಯಿಂದ ನೀವು ಎಷ್ಟು ರಿಟರ್ನ್ ಪಡೆದಿದ್ದೀರಿ? ಎಂಬ ಕುತೂಹಲ ನಿಮ್ಮನ್ನು ಕಾಡುತ್ತಿರಬಹುದು.

ಇದನ್ನೂ ಓದಿ: Canada: ಕೆನಡಾ ಸರ್ಕಾರ ಮಹತ್ವದ ನಿರ್ಧಾರ: ವಲಸಿಗರಿಗೆ ಕಡಿವಾಣ!

ಭಾರತದಲ್ಲಿನ ಪ್ರಮುಖ ಹಬ್ಬಗಳಲ್ಲಿ ಷೇರು ಮಾರುಕಟ್ಟೆಯಲ್ಲಿ ಯಾವುದೇ ವಹಿವಾಟು ನಡೆಯುವುದಿಲ್ಲ. ಆದರೆ ಪ್ರತಿ ವರ್ಷ ದೀಪಾವಳಿಯಂದು ಷೇರುಪೇಟೆಯಲ್ಲಿ ವಿಶೇಷ ಮುಹೂರ್ತ ವಹಿವಾಟು ನಡೆಸುವ ಸಂಪ್ರದಾಯವಿದೆ. ಈ ವರ್ಷವೂ ದೀಪಾವಳಿಯ ಸಂದರ್ಭದಲ್ಲಿ ನವೆಂಬರ್ 1 ರಂದು ವಿಶೇಷ ಮಂಗಳಕರ ವ್ಯಾಪಾರ ನಡೆಯಲಿದೆ. ಹೂಡಿಕೆದಾರರು ಸಂಪತ್ತಿನ ದೇವತೆಯಾದ ಲಕ್ಷ್ಮಿ ದೇವಿಯ ಆಶೀರ್ವಾದವನ್ನು ಖಚಿತಪಡಿಸಿಕೊಳ್ಳುವುದು ಇದರ ಉದ್ದೇಶವಾಗಿದೆ. ನಿಜ ಹೇಳಬೇಕೆಂದರೆ ಲಕ್ಷ್ಮೀ ದೇವಿಯ ಆಶೀರ್ವಾದವು ಷೇರು ಮಾರುಕಟ್ಟೆಯಲ್ಲಿ ಸುರಿಯುತ್ತಿದೆ.

ವಾಸ್ತವ ಸಂಗತಿ ನೋಡುವುದಾದರೆ, ಕಳೆದ ದೀಪಾವಳಿಯಿಂದ ಇಲ್ಲಿಯವರೆಗೆ ಮಾರುಕಟ್ಟೆಯಲ್ಲಿ ಶೇ.30ರಷ್ಟು ಏರಿಕೆ ಕಾಣುತ್ತಿದೆ. ಸೆನ್ಸೆಕ್ಸ್ 62,000 ರಿಂದ 80,000 ಅಂಕ ದಾಟಿರುವುದು ತಿಳಿದ ಸಂಗತಿಯೇ.

ಇದೇ ಅವಧಿಯಲ್ಲಿ, ಈಕ್ವಿಟಿ ಮ್ಯೂಚುವಲ್ ಫಂಡ್‌ಗಳು ಶೇ.50ಕ್ಕಿಂತ ಹೆಚ್ಚಿನ ಆದಾಯವನ್ನು ನೀಡಿವೆ. ಎಚ್​ಡಿಎಫ್​ಸಿ ಡಿಫೆನ್ಸ್ ಫಂಡ್ ಮತ್ತುಎಲ್​ಐಸಿ ಇನ್ಫ್ರಾ ಫಂಡ್ ಒಂದು ವರ್ಷದಲ್ಲಿ ಕ್ರಮವಾಗಿ 73 ಮತ್ತು 65 ಪ್ರತಿಶತದಷ್ಟು ಆದಾಯವನ್ನು ನೀಡಿವೆ. ಇದು ಭೂಮಿ ಮೇಲೆ ಹೂಡಿಕೆ ಮಾಡುವುದಕ್ಕಿಂತ ಎರಡು ಮೂರು ಪಟ್ಟು ಹೆಚ್ಚು ಎಂದರೆ ನಂಬಲೇಬೇಕು.

ಈಕ್ವಿಟಿ ಮ್ಯೂಚುವಲ್ ಫಂಡ್‌ಗಳು ಮತ್ತು ವ್ಯವಸ್ಥಿತ ಹೂಡಿಕೆ ಯೋಜನೆ (ಎಸ್‌ಐಪಿ) ಮೂಲಕ ತಿಂಗಳಿಗೆ ಕೇವಲ 1000 ರೂಪಾಯಿ ಹೂಡಿಕೆ ಮಾಡುವ ಮೂಲಕ ಉತ್ತಮ ಆದಾಯವನ್ನು ಗಳಿಸಬಹುದು. ಐದು ವರ್ಷಗಳ ಹಿಂದೆ ಯಾರಾದರೂ ತಿಂಗಳಿಗೆ 10,000 ರೂಪಾಯಿಗಳ ಎಸ್‌ಐಪಿ ಮಾಡಿದ್ದರೆ, ಈಗ ಅವರ ನಿಧಿಯ ಮೌಲ್ಯವು ಕನಿಷ್ಠ 15-17 ಲಕ್ಷ ರೂಪಾಯಿಗಳ ನಡುವೆ ಇದೆ. ಅಂದರೆ, ಮಾಸಿಕ 6 ಲಕ್ಷ ರೂಪಾಯಿ ಹೂಡಿಕೆಯು ಐದು ವರ್ಷಗಳಲ್ಲಿ ಎರಡೂವರೆ ಪಟ್ಟು ಹೆಚ್ಚು ಆದಾಯವನ್ನು ನೀಡುತ್ತದೆ.

ಇನ್ನು ದೇಶದಲ್ಲಿ ಯಾವುದೇ ರೀತಿಯ ಈಕ್ವಿಟಿ ಸಂಬಂಧಿತ ಹೂಡಿಕೆಗೆ ಡಿಮ್ಯಾಟ್ ಖಾತೆಯ ಅಗತ್ಯವಿದ್ದು, ಪ್ರಸ್ತುತ 18 ಕೋಟಿ ಜನರು ಡಿಮ್ಯಾಟ್ ಖಾತೆ ಹೊಂದಿದ್ದಾರೆ. ಕಳೆದ ನಾಲ್ಕು ವರ್ಷಗಳಲ್ಲಿ ಡಿಮ್ಯಾಟ್ ಖಾತೆ 6 ಪಟ್ಟು ಹೆಚ್ಚಾಗಿದೆ ಎಂಬುದು ಗಮನಾರ್ಹ. ಇದರಲ್ಲಿ ಶೇ 22ರಷ್ಟು ಹೂಡಿಕೆದಾರರು ಮಹಿಳೆಯರು ಮತ್ತು ಶೇ 69ರಷ್ಟು ಹೂಡಿಕೆದಾರರು 40 ವರ್ಷಕ್ಕಿಂತ ಕಡಿಮೆ ವಯಸ್ಸಿನವರು ಎಂಬುದು ಮತ್ತೊಂದು ವಿಶೇಷ.

https://www.vijayavani.net/babita-phogat-reveals-bollywood-film-dangal