ಮುಸುಕಿನಜೋಳಕ್ಕೆ ಬಿಳಿಸುಳಿ ರೋಗ

ತಾಲೂಕಿನ ಪಾಳ್ಯ ಹಾಗೂ ಕುಂದೂರು ಹೋಬಳಿಯ ಹೊಳೆಬೆಳ್ಳೂರು, ಕೆಂಚನಹಳ್ಳಿ, ಗಂಜಿಗೆರೆ, ಕದಾಳು, ಮಡಬಲು, ತಾಳೂರು, ಹುಣಸುವಳ್ಳಿ, ದೊಡ್ಡಕಣಗಾಲು, ಪಾಳ್ಯ ಗ್ರಾಮ ಪಂಚಾಯಿತಿ ಹಾಗೂ ಕಸಬಾ ಹೋಬಳಿಯ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಬಹುತೇಕ ಗ್ರಾಮಗಳಲ್ಲಿನ ರೈತರು ತಮ್ಮ ಹೊಲಗಳಲ್ಲಿ ಬೆಳೆದಿರುವ ಮುಸುಕಿನಜೋಳದ ಬೆಳೆಯ ಎಲೆಗಳು ಹಳದಿ ಬಣ್ಣಕ್ಕೆ ತಿರುಗಿವೆ. ಹಲವರ ಜಮೀನಿನಲ್ಲಿ ಈ ರೋಗವು ್ಲ ಪೂರ್ಣ ಪ್ರಮಾಣದಲ್ಲಿ ಕಾಣಿಸಿಕೊಂಡಿದೆ. ಇದರಿಂದ ಬೆಳೆಯ ಬೆಳವಣಿಗೆ ಕುಂಠಿತಗೊಳ್ಳುವ ಹಾಗೂ ಒಣಗಿ ಹೋಗುವ ಆತಂಕ ಎದುರಾಗಿದ್ದು, ಇದು ರೈತರನ್ನು ಕಂಗೆಡುವಂತೆ ಮಾಡಿದೆ.

ಬಹುತೇಕ ರೈತರು ಹೆಚ್ಚಾಗಿ ಖಾಸಗಿ ಅಂಗಡಿಗಳಿಂದ ಬಿತ್ತನೆ ಬೀಜ ಖರೀದಿ ಮಾಡಿ ಬಿತ್ತನೆ ಮಾಡಿದ್ದರು. 3.5 ಕೆ.ಜಿ. ಚೀಲಕ್ಕೆ 1,650 ರೂ.ಕೊಟ್ಟು ಖರೀದಿ ಮಾಡಿದ್ದಾರೆ. ಬಿತ್ತನೆ ಮಾಡಿದ ಸುಮಾರು 25 ದಿನದ ನಂತರ ಗಿಡಗಳು ಬಿಳಿ ಬಣ್ಣಕ್ಕೆ ತಿರುಗುತ್ತಿವೆ. ಅಲ್ಲದೆ ಗಿಡಗಳು ನಿಲ್ಲಲಾರದೆ ಮುದುಡುತ್ತಿದ್ದು, ಒಂದು ಹಂತದಲ್ಲಿ ಸಾಮರ್ಥ್ಯ ಕಳೆದುಕೊಳ್ಳುತ್ತಿವೆ. ಬಹುತೇಕ ಸಣ್ಣ ಮತ್ತು ಅತಿ ಸಣ್ಣ ರೈತರೇ ತಾಲೂಕಿನಲ್ಲಿದ್ದು, ಸಾಲ ಮಾಡಿ ಬಿತ್ತನೆ ಬೀಜ ಖರೀದಿ ಮಾಡಿ ಬಿತ್ತನೆ ಮಾಡಿದ್ದಾರೆ. ಮುಂದಿನ ದಿನಗಳಲ್ಲಿ ಗಿಡಗಳು ಬಲಿಯಲು ಅವಕಾಶವಿಲ್ಲದಂತಾಗಿದ್ದು, ಗಿಡಗಳು ಬಲಿಯದೆ ತೆನೆ ಬಿಡದಿದ್ದರೆ ನಷ್ಟ ಅನುಭವಿಸುವಂತಾಗಲಿದೆ ಎಂಬುದು ರೈತರ ಅಳಲು.

ತಾಲೂಕಿನ ಮೂರು ಹೋಬಳಿಯಾದ್ಯಂತ ವಾಣಿಜ್ಯ ಬೆಳೆಗಳಲ್ಲಿ ಒಂದಾದ ಮುಸುಕಿನಜೋಳ ಯಥೇಚ್ಛವಾಗಿ ಬೆಳೆಯುತ್ತಾರೆ. ಬೇರೆ ಯಾವುದೇ ಬೆಳೆ ಮೇಲೆ ಇಲ್ಲದಿರುವಷ್ಟು ನಂಬಿಕೆ ಈ ಬೆಳೆ ಮೇಲಿದೆ. ಕಡಿಮೆ ಖರ್ಚು ಹಾಗೂ ಮಿತವಾದ ಕೆಲಸ ಎಂಬ ಉದ್ದೇಶದಿಂದ ಪ್ರತಿಯೊಬ್ಬ ರೈತ ಜೋಳ ಬೆಳೆಯಲಿದ್ದು, ಇದರಲ್ಲಿ ಯಶಸ್ಸನ್ನೂ ಕಂಡುಕೊಂಡಿದ್ದಾರೆ. ಈ ವರ್ಷ ಋತುಮಾನಕ್ಕೆ ತಕ್ಕಂತೆ ಮಳೆಯಾಗದಿರುವುದರಿಂದ ಜೋಳ ಮೊಳಕೆಯೊಡೆದು ಮೇಲೆ ಬರಲು ಸಹ ಸಾಧ್ಯವಾಗದ ಪರಿಸ್ಥಿತಿ ನಿರ್ಮಾಣವಾಗಿದೆ. ಕಳೆದ ಒಂದು ತಿಂಗಳ ಹಿಂದೆ ಬಿತ್ತನೆ ಮಾಡಿದ್ದ ಜೋಳವೂ ಸಹ ಇದೀಗ ಒಣಗುತ್ತಿದೆ. ಜತೆಗೆ ಬಿಳಿ ಸುಳಿ ರೋಗ ಜೋಳವನ್ನು ಆವರಿಸುತ್ತಿರುವುದು ರೈತರನ್ನು ಮತ್ತಷ್ಟು ಸಂಕಷ್ಟಕ್ಕೆ ಸಿಲುಕುವಂತೆ ಮಾಡಿದೆ.

ತಾಲೂಕಿನ 15 ಗ್ರಾಮ ಪಂಚಾಯಿತಿ ವ್ಯಾಪ್ತಿಯಲ್ಲಿ ಶೇ.80ರಷ್ಟು ಅಂದರೆ ಸುಮಾರು 7,400ಕ್ಕೂ ಹೆಚ್ಚು ಹೆಕ್ಟೇರ್ ಪ್ರದೇಶದಲ್ಲಿ ಮುಸುಕಿನಜೋಳ ಬಿತ್ತನೆ ಮಾಡಲಾಗಿದೆ. ಬಿತ್ತನೆ ಸಮಯದಲ್ಲಿ ಅಲ್ಪ ಸ್ವಲ್ಪ ಮಳೆಯಾಗಿದ್ದು ಹೊರೆತುಪಡಿಸಿದರೆ ನಂತರದ ದಿನಗಳಲ್ಲಿ ಮಳೆಯ ಪ್ರಮಾಣ ಸಂಪೂರ್ಣ ಕಡಿಮೆಯಾಗಿರುವುದರಿಂದ ರೈತರು ಕಂಗಾಲಾಗಿದ್ದಾರೆ. ಇದರಿಂದ ಮುಂದೇನು ಮಾಡಬೇಕೆಂದು ತಿಳಿಯದೆ ಅನ್ನದಾತ ಕೈಕಟ್ಟಿ ಕುಳಿತಿದ್ದಾನೆ. ಕಳೆದ ವರ್ಷ ಎರಡು ತಿಂಗಳ ಜೋಳಕ್ಕೆ ಬಿಳಿಸುಳಿ ರೋಗ ಕಾಣಿಸಿಕೊಂಡಿತ್ತು. ಆದರೆ ಈ ವರ್ಷ ಬಿತ್ತನೆ ಮಾಡಿದ 25 ದಿನಗಳಲ್ಲೆ ರೋಗ ಕಾಣಿಸಿಕೊಳ್ಳುತ್ತಿದೆ. ಎರಡು ಮೂರು ದಿನಗಳಲ್ಲಿ ಹೊಲವನ್ನೆಲ್ಲ ಆಕ್ರಮಿಸು ಹಂತಕ್ಕೆ ತಲುಪಿದೆ.