ಸಿನೆಮಾ ಟಿಕೆಟ್​ ಮೇಲಿನ ಕಲ್ಯಾಣ ಸೆಸ್​ ರದ್ದು| High court

ಮಲ್ಟಿಪ್ಲೆಕ್ಸ್​ ಅಸೋಸಿಯೇಷನ್​ ಆಫ್​​ ಇಂಡಿಯಾ (ಎಂಎಐ), ಪಿವಿಆರ್​ ಐನಾಕ್ಸ್​ ಲಿಮಿಟೆಡ್​ ಮತ್ತಿತರರು ಸಲ್ಲಿಸಿರುವ ಅರ್ಜಿಯನ್ನು ಗುರುವಾರ ವಿಚಾರಣೆ ನಡೆಸಿದ ನ್ಯಾಯಮೂರ್ತಿ ಎಚ್​.ಟಿ. ನರೇಂದ್ರ ಪ್ರಸಾದ್​ ಅವರಿದ್ದ ಏಕಸದಸ್ಯ ನ್ಯಾಯಪೀಠವು ಸರ್ಕಾರದ ಮೊಮೊ ದಾಖಲಿಸಿಕೊಂಡು ಈ ಆದೇಶ ಮಾಡಿದೆ. 

ಕಾಯ್ದೆಯು ಯಾವ ದಿನಾಂಕದಿಂದ ಜಾರಿಗೊಳ್ಳುತ್ತದೆ ಎಂಬ ಬಗ್ಗೆ ರಾಜ್ಯ ಸರ್ಕಾರವು ಇನ್ನೂ ಅಧಿಕೃತ ಗೆಜೆಟ್​ ಅಧಿಸೂಚನೆ ಹೊರಡಿಸಿಲ್ಲ. ಆದ್ದರಿಂದ ಕಾಯ್ದೆಯು ಅಧಿಕೃತವಾಗಿ ಜಾರಿಗೆ ಬರದಿರುವಾಗ, ಸುತ್ತೋಲೆ ಹೊರಡಿಸಿ ಸೆಸ್​ ಪಾವತಿಸಲು ಆದೇಶಿಸಲು ಸಾಧ್ಯವಿಲ್ಲ ಎಂಬ ಅರ್ಜಿದಾರರ ವಾದವನ್ನು ಬುಧವಾರ ಆಲಿಸಿದ್ದ ನ್ಯಾಯಪೀಠ, ಈ ಬಗ್ಗೆ ಪ್ರತಿಕ್ರಿಯೆ ತಿಳಿಸುವಂತೆ ಸರ್ಕಾರಕ್ಕೆ ನೋಟಿಸ್​ ಜಾರಿಗೊಳಿಸಿತ್ತು. 

ಗುರುವಾರದ ವಿಚಾರಣೆ ವೇಳೆ ಸರ್ಕಾರಿ ವಕೀಲರು ಹಾಜರಾಗಿ, ವಿವಾದಿತ ಸುತ್ತೋಲೆಯನ್ನು ಕಾರ್ಮಿಕ ಇಲಾಖೆಯು ಈಗಾಗಲೇ ವಾಪಾಸ್​ ಪಡೆದಿದೆ ಎಂದು ನ್ಯಾಯಪೀಠಕ್ಕೆ ಮೆಮೊ ಸಲ್ಲಿಸಿದ್ದರು. ಈ ಮೆಮೊ ದಾಖಲಿಸಿಕೊಂಡ ನ್ಯಾಯಪೀಠ, ಸುತ್ತೋಲೆಗಳನ್ನು ಅಧಿಕೃತವಾಗಿ ರದ್ದುಪಡಿಸಿ ಆದೇಶ ಹೊರಡಿಸಿದೆ.

ಸಿನೆಮಾ ಮತ್ತು ಸಾಂಸ್ಕೃತಿಕ ಕಾರ್ಯಕರ್ತರಿಗೆ ಸಾಮಾಜಿಕ ಭದ್ರತೆ ಕಲ್ಪಿಸಲು ಮತ್ತು ಕಲ್ಯಾಣ ನಿಧಿ ಸ್ಥಾಪಿಸಲು 2024ರಲ್ಲಿ ಈ ಕಾಯ್ದೆಯನ್ನು ರೂಪಿಸಲಾಗಿದೆ. ಇದರಡಿಯಲ್ಲಿ ನಿನೆಮಾ ಟಿಕೆಟ್​ಗಳು, ಪ್ರೀಮಿಯಂ ಶುಲ್ಕ, ಒಟಿಟಿ ಫ್ಲಾಟ್​ಫಾರ್ಮ್​​ಗಳಿಂದ ಮತ್ತು ಟಿ.ವಿ. ಚಾನೆಲ್​ಗಳ ಆದಾಯದಿಂದ ಕಲ್ಯಾಣ ಸೆಸ್​ ಸಂಗ್ರಹಿಸಲು ಅವಕಾಶ ಕಲ್ಪಿಸಲಾಗಿದೆ. ಈ ಹಿನ್ನೆಲಯಲ್ಲಿ ಸಿನಿ ಬೋರ್ಡ್​ ರಚಿಸಿದ್ದ ಸರ್ಕಾರ, ಚಿತ್ರಮಂದಿರಗಳ ಟಿಕೆಟ್​ ಆದಾಯದಿಂದ ಸೆಸ್​ ಸಂಗ್ರಹಿಸಲು ಸುತ್ತೋಲೆ ಹೊರಡಿಸಿತ್ತು. ಆದರೆ, ಕಾಯ್ದೆಯ ಜಾರಿ ದಿನಾಂಕವು ಅಧಿಕೃತವಾಗಿ ರಾಜ್ಯ ಗೆಜೆಟ್​ನಲ್ಲಿ ಪ್ರಕಟವಾಗದ ಹಿನ್ನೆಲೆಯಲ್ಲಿ ಈ ಆದೇಶದ ಬಗ್ಗೆ ವಿವಾದ ಉಂಟಾಗಿತ್ತು.