ಸದ್ಯದಲ್ಲೇ ಬಾಕಿ ಸನ್ನದು ಹರಾಜು: ಸಿಎಲ್2ಎ, ಸಿಎಲ್9ಎ ವರ್ಗೀಕರಣ

ಕರ್ನಾಟಕ ಅಬಕಾರಿ (ಸನ್ನದುಗಳ ಸಾಮಾನ್ಯ ಷರತ್ತು) ಹಾಗೂ ಬಿಯರ್‌ನ ಚಿಲ್ಲರೆ ಮಾರಾಟದ ಹಕ್ಕಿನ ಗುತ್ತಿಗೆ ತಿದ್ದುಪಡಿಗೆ ಸೆ.23ರಂದು ಕರಡು ಅಧಿಸೂಚನೆ ಹೊರಡಿಸಿ ಆಕ್ಷೇಪಣೆ ಮತ್ತು ಸಲಹೆಗೆ 10 ದಿನ ಕಾಲಾವಕಾಶ ನೀಡಲಾಗಿತ್ತು. ಇದಕ್ಕೆ ಸಂಬಂಧಿಸಿದ ಹಲವು ಸಲಹೆಗಳು ಸ್ವೀಕಾರವಾಗಿತ್ತು. ಇವುಗಳನ್ನು ಪರಿಗಣಿಸಿದ ಇಲಾಖೆ, ಅಂತಿಮವಾಗಿ ತಿದ್ದುಪಡಿ ಮಾಡಿ ನಿಯಮ ರಚಿಸಿದೆ. ಸನ್ನದು, ಗುತ್ತಿಗೆ ಚಾಲ್ತಿಯ ಅವಧಿಯಲ್ಲಿ ಸನ್ನದುದಾರನು ಅಥವಾ ಗುತ್ತಿಗೆ ತೆಗೆದುಕೊಂಡವರು ಮರಣ ಹೊಂದಿದ್ದಲ್ಲಿ, ಸನ್ನದುದಾರ ಅಥವಾ ಗುತ್ತಿಗೆದಾರರ ಮರಣದ ದಿನಾಂಕದಿಂದ 6 ತಿಂಗಳು ಅವಧಿಯೊಳಗೆ ಅಬಕಾರಿ ಉಪ ಆಯುಕ್ತರಿಗೆ ಅರ್ಜಿ ಸಲ್ಲಿಸಿ ವರ್ಗಾಯಿಸಿಕೊಳ್ಳಬೇಕು. 45 ದಿನದೊಳಗೆ ಮರಣ ಹೊಂದಿದ್ದ ಸನ್ನದುದಾರರ ಹೆಸರನ್ನು ಅಬಕಾರಿ ಉಪ ಆಯುಕ್ತರಿಗೆ ಕಡ್ಡಾಯವಾಗಿ ತಿಳಿಸಬೇಕು. ಇಲ್ಲವಾದರೆ, ಸನ್ನದು ಮಂಜೂರು ಮಾಡುವ ಪ್ರಾಧಿಕಾರವು ಸನ್ನದು ಶುಲ್ಕದ ಶೇ.10 ದಂಡ ವಿಧಿಸಲಾಗುತ್ತದೆ.ಭಾರತೀಯ ಮತ್ತು ವಿದೇಶಿ ಮದ್ಯಗಳ ಮಾರಾಟ ನಿಯಮಕ್ಕೆ ಕೆಲ ತಿದ್ದುಪಡಿ ತರಲಾಗಿದೆ.

ಅಬಕಾರಿ ಇಲಾಖೆ ನಿಯಮ 12ರಂತೆ ರಾಜ್ಯದ ಪ್ರತಿ ತಾಲೂಕು ಹಾಗೂ ನಗರ ಪ್ರದೇಶಕ್ಕೆ 7,500 ಜನಕ್ಕೆ ಒಂದು ಸಿಎಲ್-2 ಹಾಗೂ 3,500 ಜನಕ್ಕೆ ಹೆಚ್ಚುವರಿ ಸನ್ನದು ನಿಗದಿಪಡಿಸಲಾಗಿತ್ತು. ಗ್ರಾಮೀಣ ಪ್ರದೇಶದಲ್ಲಿ 15 ಸಾವಿರ ಜನಕ್ಕೆ ಒಂದು ಸಿಎಲ್2 ಹಾಗೂ 7500 ಜನಕ್ಕೆ ಹೆಚ್ಚುವರಿ ಒಂದು ಸನ್ನದು ನಿಗದಿಯಾಗಿತ್ತು. ತಾಲೂಕಿನ ನಗರ ಪ್ರದೇಶಕ್ಕೆ ‘ಎ’ ಹಾಗೂ ಗ್ರಾಮೀಣ ಪ್ರದೇಶಕ್ಕೆ ‘ಬಿ’ ಎಂದು ಕೋಟಾ ನಿಗದಿಪಡಿಸಲಾಗಿತ್ತು.

ಇದಕ್ಕೆ ಸಂಬಂಧಪಟ್ಟಂತೆ 1987ರಲ್ಲಿ ನಿಯಮ 12ರಂತೆ ಅಂದಿನ ಸರ್ಕಾರವು ರಾಜ್ಯದ ಎಲ್ಲ ತಾಲೂಕಿನಲ್ಲಿ ಕೋಟಾ ನಿಗದಿ ಪಡಿಸಿತ್ತು. 1987ರಲ್ಲಿ ರಾಜ್ಯದ ಪ್ರತಿ ಜಿಲ್ಲೆಯಲ್ಲಿ ಬರುವ ತಾಲೂಕಿಗೆ ಅಬಕಾರಿ ನಿಯಮ 12ರಂತೆ ನಗರ ಪ್ರದೇಶ ಹಾಗೂ ಗ್ರಾಮೀಣ ಪ್ರದೇಶಕ್ಕೆ ಸಿಎಲ್2 ಕೋಟಾ ನಿಗದಿಯಾಗಿತ್ತು. ನಗರ ಪ್ರದೇಶಕ್ಕೆ ನಿಗದಿಯಾದ ಸಿಎಲ್2 ಕೋಟಾದಂತೆ ನಗರ ಪ್ರದೇಶಕ್ಕೆ 2,158 ಹಾಗೂ ಗ್ರಾಮೀಣ ಪ್ರದೇಶಕ್ಕೆ 2,048 ಸೇರಿ ಒಟ್ಟು 4,206 ಸಿಎಲ್2 ಅಂಗಡಿಗಳನ್ನು ನಿಗದಿಪಡಿಸಲಾಗಿತ್ತು. ಆದರೆ, ಇದೀಗ ನಗರದ ಪ್ರದೇಶದಲ್ಲಿ 2,510 ಹಾಗೂ ಗ್ರಾಮೀಣ ಪ್ರದೇಶಕ್ಕೆ 1,438 ಸೇರಿ ಒಟ್ಟು 3,948 ಸಿಎಲ್-2 ಅಂಗಡಿಗಳು ಕಾರ್ಯನಿರ್ವಹಿಸುತ್ತಿವೆ.

ಕೋಟಾದಡಿ ಮಂಜೂರಾಗಿ ಸ್ಥಗಿತಗೊಂಡ ಸನ್ನದು, ನವೀಕರಿಸದೆ ಬಾಕಿ ಉಳಿದ ಸಿಎಲ್2 ಸನ್ನದುಗಳನ್ನು ಎಂಎಸ್‌ಐಎಲ್‌ಗೆ 2009 ಮತ್ತು 2016ರಲ್ಲಿ ನೀಡಲಾಗಿದೆ. ಹೀಗಿರುವಾಗ, ಆದಾಯ ನೆಪವೊಡ್ಡಿ ಇಲಾಖೆಯ ಅಧಿಕಾರಿಗಳು, ಸರ್ಕಾರಕ್ಕೆ ತಪ್ಪು ಮಾಹಿತಿ ನೀಡಿ ಅಸ್ತಿತ್ವದಲ್ಲಿಲ್ಲದ ಮದ್ಯದಂಗಡಿಗಳನ್ನು ಹರಾಜು ಹಾಕಲು ಯತ್ನಿಸುತ್ತಿರುವ ಆರೋಪಗಳಿವೆ. ಅಲ್ಲದೆ, ಸಿಎಲ್2 ಕೋಟಾದಡಿ ನಿಗದಿಕ್ಕಿಂತ ಹೆಚ್ಚುವರಿ ಮಂಜೂರು ಆಗಿದ್ದ ವೈನ್‌ಶಾಪ್ ರದ್ದುಪಡಿಸುವಂತೆ ಹೈಕೋರ್ಟ್ ಹೊರಡಿಸಿದ್ದ ಆದೇಶಗಳನ್ನು ಇಲಾಖೆ ಅಧಿಕಾರಿಗಳು ಪಾಲಿಸುತ್ತಿಲ್ಲ ಎಂಬ ಗುರುತರ ಆರೋಪಗಳಿವೆ.