ಪಾರದರ್ಶಕ ಆಡಳಿತ ಕಾಂಗ್ರೆಸ್​ ಸಂಕಲ್ಪ

ಸೇಡಂ: ಕಾಂಗ್ರೆಸ್​ ಸರ್ಕಾರ ಪಾರದರ್ಶಕ ಆಡಳಿತ ನೀಡುವ ಸಂಕಲ್ಪ ತೊಟ್ಟಿದ್ದು, ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್​ ಅಧಿಕಾರಿಗಳ ಮೊದಲ ಸಭೆಯಲ್ಲೇ ಇದನ್ನು ಪ್ರಸ್ತಾಪಿಸಿದ್ದಾರೆ ಎಂದು ವೈದ್ಯಕಿಯ ಶಿಕ್ಷಣ ಸಚಿವ ಡಾ.ಶರಣಪ್ರಕಾಶ ಪಾಟೀಲ್​ ಹೇಳಿದರು. 

ಮೂರನೇ ಬಾರಿಗೆ ಸಚಿವರಾಗಿರುವ ನಿಮಿತ್ತ ಶ್ರೀ ಕೊತ್ತಲ ಬಸವೇಶ್ವರ ದೇವಾಲಯ ಆವರಣದಲ್ಲಿ ಸೇಡಂ ಹಾಗೂ ಮುಧೋಳ ಬ್ಲಾಕ್​ ಕಾಂಗ್ರೆಸ್​ ಸಮಿತಿ ಭಾನುವಾರ ಆಯೋಜಿಸಿದ್ದ ಅಭಿನಂದನೆ ಸಮಾರಂಭದಲ್ಲಿ ಸತ್ಕಾರ ಸ್ವೀಕರಿಸಿದ ಅವರು, ಸುಮಾರು 25 ವರ್ಷಗಳಿಂದ ಕ್ಷೇತ್ರದ ಜನರ ಸೇವೆ ಮಾಡುತ್ತಿದ್ದೇನೆ. ಜಿಪಂ ಸದಸ್ಯನಾಗಿ ರಾಜಕಾರಣಕ್ಕೆ ಬಂದಿರುವ ನನಗೆ ಕ್ಷೇತ್ರದ ಜನತೆ ನಾಲ್ಕು ಬಾರಿ ಶಾಸಕನಾಗುವ ಅವಕಾಶ ಕಲ್ಪಿಸಿದ್ದಾರೆ. ನಿಮ್ಮೆಲ್ಲರ ಆಶೀರ್ವಾದದ ಫಲದಿಂದ ಮೂರನೇ ಸಲ ಸಚಿವನಾಗಿರುವೆ ಎಂದರು.

ಚುನಾವಣೆ ಸಂದರ್ಭದಲ್ಲಿ ನನ್ನ ಪರವಾಗಿ ಹಳ್ಳಿಗಳಲ್ಲಿ ಯಾವುದೇ ಬೇಡಿಕೆ ಈಡೇರಿಸುವ ಬಗ್ಗೆ ಭರವಸೆ ನೀಡಿದ್ದರೆ ಗಮನಕ್ಕೆ ತಂದರೆ ಅನುದಾನ ಒದಗಿಸಲು ಪ್ರಾಮಾಣಿಕ ಪ್ರಯತ್ನ ಮಾಡುತ್ತೇನೆ. ಪಕ್ಷದ ಸಿದ್ಧಾಂತದಂತೆ ಜಾತಿ, ಧರ್ಮ ನೋಡದೆ ಕಟ್ಟ ಕಡೆ ವ್ಯಕ್ತಿಗೂ ಸರ್ಕಾರದ ಯೋಜನೆ ಲಾಭ ಮುಟ್ಟಿಸುವುದು ನನ್ನ ಉದ್ದೇಶ. ಅಂತಲೇ ಹೈಕಮಾಂಡ್​ ಗುರುತಿಸಿ ನನಗೆ ಮೊದಲ ಪಟ್ಟಿಯಲ್ಲೇ ಸಚಿವ ಸ್ಥಾನ ನೀಡಿದೆ ಎಂದು ಸಂತಸ ವ್ಯಕ್ತಪಡಿಸಿದರು.

ಶಿವಶಂಕರ ಮಠದ ಶ್ರೀ ಶಿವಶಂಕರ ಶಿವಾಚಾರ್ಯ, ಕಾಂಗ್ರೆಸ್​ ಎಸ್ಸಿ ಘಟಕದ ಜಿಲ್ಲಾಧ್ಯಕ್ಷ ಮಹಾಂತಪ್ಪ ಸಂಗಾವಿ, ಕಾರ್ಮಿಕರ ಸಂಘದ ಅಧ್ಯಕ್ಷ ಸತೀಶರೆಡ್ಡಿ ರಂಜೋಳ, ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ನಾಗೇಶ್ವರರಾವ ಮಾಲಿಪಾಟೀಲ್​, ನಾಲವಾರದ ವೀರಣ್ಣಗೌಡ ಪರಸರೆಡ್ಡಿ ಮಾತನಾಡಿದರು. 

ಬ್ಲಾಕ್​ ಕಾಂಗ್ರೆಸ್​ ಅಧ್ಯಕ್ಷರಾದ ಶಿವಶರಣರೆಡ್ಡಿ ಪಾಟೀಲ್​ ಸೇಡಂ, ರವೀಂದ್ರ ನಂದಿಗಾಮ ಮುಧೋಳ, ಡಿಸಿಸಿ ಬ್ಯಾಂಕ್​ ಉಪಾಧ್ಯಕ್ಷ ಶಂಕರಭೂಪಾಲ ಪಾಟೀಲ್​ ಕಾನಾಗಡ್ಡಾ, ನಗರ ಯೋಜನಾ ಪ್ರಾಧಿಕಾರದ ಅಧ್ಯಕ್ಷ ವಿಶ್ವನಾಥ ಪಾಟೀಲ್​ ಬೊಮ್ನಳ್ಳಿ, ಪ್ರಮುಖರಾದ ಶಂಭುರೆಡ್ಡಿ ಮದ್ನಿ, ಜೈಭೀಮ ಊಡಗಿ, ಭೀಮಾಶಂಕರ ಕೊಳ್ಳಿ, ಅಬ್ದುಲ್​ ಸತ್ತಾರ್​ ನಾಡೇಪಲ್ಲಿ, ರಾಹುಲ್​ ಊಡಗಿ, ಮೋಹನರೆಡ್ಡಿ ರಂಜೋಳ, ಜಗನ್ನಾಥ ಚಿಂತಪಳ್ಳಿ, ನಾಗೇಶ ಕಾಳಾ, ಮಹ್ಮದ್​ ಗೌಸ್​, ವೀರೇಂದ್ರ ರುದ್ನೂರ, ಡಾ.ಭಾಗ್ಯಶ್ರೀ ಪಾಟೀಲ್​, ಸತೀಶ ಪೂಜಾರಿ, ವೆಂಕಟೇಶ ನಾಡೇಪಲ್ಲಿ, ಲಲಿತಾ ಯಾಕಾಪುರ, ನಾಗರತ್ನ ಆಡಕಿ, ಅಣವೀರಪ್ಪ ದೇಸಾಯಿ, ಕಮಲೋದ್ದಿನ್​ ಚಿಸ್ತಿ, ಜಾಗೀರದಾರ ಜಿಂಜಾನಿ ಇತರರಿದ್ದರು. ಹಣಮಂತ ಬಿಬ್ಬಳ್ಳಿ ಪ್ರಾರ್ಥಿಸಿದರು. ಬಸವರಾಜ ರೇವಗೊಂಡ ಸ್ವಾಗತಿಸಿದರು. ಅಶೋಕರೆಡ್ಡಿ ಕೆರಳ್ಳಿ ನಿರೂಪಣೆ ಮಾಡಿ ವಂದಿಸಿದರು. 

ನಾನು ಅಧಿಕಾರದಲ್ಲಿ ಇಲ್ಲದಿದ್ದಾಗಲು ಕಾಂಗ್ರೆಸ್​ ಪಕ್ಷದ ಧ್ವಜ ಹಿಡಿದು ಆಯಾ ಗ್ರಾಮಗಳಲ್ಲಿ ನಮಗಾಗಿ ಕೆಲಸ ಮಾಡಿದ್ದೀರಿ. ಆದರೆ ನಿಮಗೆಲ್ಲರಿಗೂ ನ್ಯಾಯ ಕೊಡಲು ನನ್ನಿಂದ ಸಾಧ್ಯವಾಗಿಲ್ಲ. ನೀವು ನನ್ನ ಮನಸ್ಸಿನಲ್ಲಿದ್ದೀರಿ. ಯಾವತ್ತಿಗೂ ನಿಮ್ಮ ಋಣ ತೀರಿಸಿಲು ಸಾಧ್ಯವಿಲ್ಲ. ದಿನದ 24ಗಂಟೆಯೂ ನಿಮ್ಮ ಸೇವೆಗೆ ನಾನು ತಯಾರಿದ್ದೇನೆ ಎಂದು ಕಾರ್ಯಕರ್ತರ ಪ್ರಾಮಾಣಿಕ ಕೆಲಸ ಹಾಗೂ ಸಹಕಾರವನ್ನು ನೆನೆದು ಸಚಿವ ಡಾ.ಶರಣಪ್ರಕಾಶ ಪಾಟೀಲ್​ ಕಣ್ಣೀರು ಹಾಕಿದರು. ಇದರಿಂದ ಕೆಲ ಕಾರ್ಯಕರ್ತರ ಕಣ್ಣು ಸಹ ತುಂಬಿ ಬಂದವು. 

ಯುವ ಕಾಂಗ್ರೆಸ್​ ತಾಲೂಕು ಪದಾಧಿಕಾರಿಗಳಾಗಿ ನೇಮಕಗೊಂಡ ಅಬ್ದುಲ್​ ಸತ್ತಾರ್​ ನಾಡೇಪಲ್ಲಿ, ಭೀಮಾಶಂಕರ ಕೊಳ್ಳಿ, ರಾಹುಲ್​ ಊಡಗಿ, ಮೋಹನರೆಡ್ಡಿ ರಂಜೋಳ, ರಾಹುಲ್​ ಶಕಲಾಸಲ್ಲಿ ಅವರಿಗೆ ಸಚಿವ ಡಾ.ಶರಣಪ್ರಕಾಶ ಪಾಟೀಲ್​ ಆದೇಶಪತ್ರ ವಿತರಿಸಿ ಅಭಿನಂದಿಸಿದರು.

ಡಿ.ಕೆ. ಶಿವಕುಮಾರ್​ ಸಂಪುಟದಲ್ಲಿ ಸಚಿವರಾದ ಬಳಿಕ ಮೊದಲ ಬಾರಿಗೆ ಸೇಡಂಗೆ ಆಗಮಿಸಿದ ಡಾ.ಶರಣಪ್ರಕಾಶ ಪಾಟೀಲ್​ ಅವರು ಸಂಗೊಳ್ಳಿ ರಾಯಣ್ಣ, ಜಗಜ್ಯೋತಿ ಬಸವೇಶ್ವರ, ಅಂಬಿಗರ ಚೌಡಯ್ಯ, ಮಾದರ ಚನ್ನಯ್ಯ, ಡಾ.ಬಿ.ಆರ್​. ಅಂಬೇಡ್ಕರ್​ ಪುತ್ಥಳಿಗಳಿಗೆ ಮಾಲಾರ್ಪಣೆ ಮಾಡಿ ನಮನ ಸಲ್ಲಿಸಿದರು. ನಂತರ ಕೊತ್ತಲ ಬಸವೇಶ್ವರ ದೇವಾಲಯದಲ್ಲಿ ವಿಶೇಷ ಪೂಜೆ ಸಲ್ಲಿಸಿದರು.

"

ಡಾ.ಶರಣಪ್ರಕಾಶ ಪಾಟೀಲ್​ ಸದಾ ಕ್ಷೇತ್ರದ ಅಭಿವೃದ್ಧಿಗೆ ಕಂಕಣಬದ್ಧರಾಗಿದ್ದಾರೆ. ಅವರ ದೂರದೃಷ್ಟಿ, ಪ್ರಾಮಾಣಿಕತೆ ಶ್ಲಾಘನೀಯ. ಮುಂದಿನ ದಿನಗಳಲ್ಲಿ ಇವರ ರಾಜಕೀಯ ಜೀವನ ಇನ್ನಷ್ಟು ಎತ್ತರಕ್ಕೆ ಏರಲಿದೆ. ಕರ್ನಾಟಕ ಪ್ರದೇಶ ಕಾಂಗ್ರೆಸ್​ ಸಮಿತಿ ಅಧ್ಯಕ್ಷರಾಗುವ ಕಾಲ ಸನ್ನಿಹಿತವಾಗಿದೆ.

— > ಶ್ರೀ ಸದಾಶಿವ ಸ್ವಾಮೀಜಿ ಸೇಡಂ