ತುಮಕೂರಿನಲ್ಲಿ ಮನಕಲಕುವ ಘಟನೆ: ಮದುವೆಯಾದ ನಾಲ್ಕೇ ತಿಂಗಳಿಗೆ ನವದಂಪತಿ ಸಾವಿಗೆ ಶರಣು! Newly Married Couple

ತುಮಕೂರು: ಜಿಲ್ಲೆಯ ಶಿರಾ ತಾಲೂಕಿನಲ್ಲಿ ನವವಿವಾಹಿತ ದಂಪತಿಯಿಬ್ಬರು ( Newly Married Couple ) ಆತ್ಮಹತ್ಯೆ ಮಾಡಿಕೊಂಡಿರುವ ಅತ್ಯಂತ ಆಘಾತಕಾರಿ ಘಟನೆ ಬೆಳಕಿಗೆ ಬಂದಿದೆ.

ಕೇವಲ ನಾಲ್ಕು ತಿಂಗಳ ಹಿಂದೆಯಷ್ಟೇ ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿದ್ದ ಜೋಡಿ, ಈಗ ಶವವಾಗಿರುವುದು ಇಡೀ ಗ್ರಾಮದಲ್ಲಿ ಸೂತಕದ ಛಾಯೆ ಆವರಿಸುವಂತೆ ಮಾಡಿದೆ. ಕೌಟುಂಬಿಕ ಅಸಮಾಧಾನ ಹಾಗೂ ಕ್ಷಣಿಕ ಆವೇಶದ ನಿರ್ಧಾರವು ಎರಡು ಜೀವಗಳನ್ನು ಬಲಿಪಡೆದಿದ್ದು, ಸ್ಥಳೀಯರನ್ನು ತೀವ್ರ ದಿಗ್ಭ್ರಮೆಗೆ ಒಳಗಾಗಿಸಿದೆ.

ಶಿರಾ ತಾಲೂಕಿನ ಹನುಮನಹಳ್ಳಿ ನಿವಾಸಿಗಳಾದ ಶರಣ್ಯ (20) ಮತ್ತು ಗಿರೀಶ್ (28) ಆತ್ಮಹತ್ಯೆಗೆ ಶರಣಾದ ನವದಂಪತಿ. ಕಳೆದ ನಾಲ್ಕು ತಿಂಗಳ ಹಿಂದೆಯಷ್ಟೇ ಇವರ ವಿವಾಹ ಮಹೋತ್ಸವ ನಡೆದಿತ್ತು. ಮೃತ ಶರಣ್ಯಳಿಗೆ ತಮ್ಮ ಮಾವನಾಗಿದ್ದ ಗಿರೀಶ್ ಅವರೊಂದಿಗೆ ಮದುವೆಯಾಗಲು ಆರಂಭದಲ್ಲಿ ಇಷ್ಟವಿರಲಿಲ್ಲ ಎನ್ನಲಾಗಿದೆ. ಆದರೆ, ಕುಟುಂಬಸ್ಥರ ತೀವ್ರ ಒತ್ತಡಕ್ಕೆ ಮಣಿದು ಆಕೆ ಈ ಮದುವೆಗೆ ಒಪ್ಪಿಕೊಂಡಿದ್ದಳು. ಆದಾಗ್ಯೂ, ಮದುವೆಯಾದ ದಿನದಿಂದಲೇ ದಂಪತಿ ನಡುವೆ ಸಣ್ಣಪುಟ್ಟ ಭಿನ್ನಾಭಿಪ್ರಾಯಗಳು ತಲೆದೋರಿದ್ದವು.

ಇದೇ ವಿಚಾರವಾಗಿ ಕಳೆದ ಶನಿವಾರ ಕೂಡ ದಂಪತಿ ನಡುವೆ ಮನೆಯಲ್ಲಿ ಜೋರಾಗಿ ಜಗಳ ನಡೆದಿತ್ತು ಎಂದು ತಿಳಿದುಬಂದಿದೆ. ಈ ಜಗಳದ ಬೆನ್ನಲ್ಲೇ ತೀವ್ರ ಬೇಸರಗೊಂಡ ಶರಣ್ಯ, ಮನೆಯಲ್ಲಿ ಯಾರೂ ಇಲ್ಲದ ಸಮಯವನ್ನು ನೋಡಿಕೊಂಡು ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದಾಳೆ. ಜಗಳದ ನಂತರ ಮನೆಗೆ ಮರಳಿದ ಪತಿ ಗಿರೀಶ್‌ಗೆ ಪತ್ನಿ ಶರಣ್ಯ ನೇಣು ಬಿಗಿದ ಸ್ಥಿತಿಯಲ್ಲಿ ಶವವಾಗಿ ಬಿದ್ದಿರುವುದು ಕಂಡುಬಂದಿದೆ.

ಪತ್ನಿಯ ಸಾವನ್ನು ಕಂಡು ತೀವ್ರ ಆಘಾತಕ್ಕೊಳಗಾದ ಹಾಗೂ ಮುಂದಿನ ಭೀಕರ ಪರಿಣಾಮಗಳಿಗೆ ಹೆದರಿದ ಗಿರೀಶ್, ತಕ್ಷಣವೇ ಮನೆಯಿಂದ ಓಡಿಹೋಗಿದ್ದಾರೆ. ತಮಗಿದ್ದ ಜಮೀನಿನ ಹತ್ತಿರ ತೆರಳಿದ ಗಿರೀಶ್, ಅಲ್ಲಿನ ಮರಕ್ಕೆ ನೇಣು ಬಿಗಿದುಕೊಂಡು ತಾವೂ ಸಹ ಜೀವನವನ್ನು ಕೊನೆಗೊಳಿಸಿದ್ದಾರೆ. ಸದ್ಯ ಈ ಅವಳಿ ಆತ್ಮಹತ್ಯೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಪಟ್ಟನಾಯಕನಹಳ್ಳಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಪೊಲೀಸರು ಸ್ಥಳಕ್ಕೆ ಭೇಟಿ ನೀಡಿ ತನಿಖೆ ಕೈಗೊಂಡಿದ್ದಾರೆ.