ಟ್ರಾಫಿಕ್ ವಾರ್ಡನ್ ಸಂಘಟನೆ ವೆಬ್‌ಸೈಟ್‌ಗೆ ಚಾಲನೆ

ಬೆಂಗಳೂರು: ಬೆಂಗಳೂರು ನಗರ ಪೊಲೀಸ್ ಟ್ರಾಫಿಕ್ ವಾರ್ಡನ್ ಸಂಘಟನೆ (ಬಿಸಿಪಿ - ಟಿಡಬ್ಲೂಒ)ಯ ಅಧಿಕೃತ ವೆಬ್‌ಸೈಟ್‌ನ್ನು ನಗರ ಪೊಲೀಸ್ ಆಯುಕ್ತ ಸೀಮಂತ್ ಕುಮಾರ್ ಸಿಂಗ್ ಮಂಗಳವಾರ ಚಾಲನೆ ನೀಡಿದರು.

1985ರಲ್ಲಿ ಕರ್ನಾಟಕ ಸರ್ಕಾರದ ಗೆಜೆಟ್ ಆದೇಶದ ಮೂಲಕ ಸ್ಥಾಪನೆಯಾದ ಬೆಂಗಳೂರು ನಗರ ಪೊಲೀಸ್ ಟ್ರಾಫಿಕ್ ವಾರ್ಡನ್ ಸಂಘಟನೆ ದೇಶದಲ್ಲೇ ವಿಶಿಷ್ಟವಾದ, ಶಿಸ್ತುಬದ್ಧ ಸ್ವಯಂ ಸೇವಕ ಸಂಘಟನೆಯಾಗಿದೆ. ಅಂದಿನ ಬೆಂಗಳೂರು ನಗರ ಪೊಲೀಸ್ ಆಯುಕ್ತ ಪಿ.ಜಿ. ಹರ್ಲಂಕರ್ ಹಾಗೂ ಸಂಚಾರ ವಿಭಾಗದ ಉಪ ಪೊಲೀಸ್ ಆಯುಕ್ತ ಡಾ.ಅಜಯ್ ಕುಮಾರ್ ಸಿಂಗ್ ಅವರ ನೇತೃತ್ವದಲ್ಲಿ ಈ ಸಂಘಟನೆ ಆರಂಭಗೊಂಡಿದ್ದು, ಕಳೆದ ನಾಲ್ಕು ದಶಕಗಳಿಂದ ಇಲಾಖೆ ಮಾರ್ಗದರ್ಶನದಲ್ಲಿ ಕಾರ್ಯನಿರ್ವಹಿಸುತ್ತಿದೆ. 

ಪ್ರಸ್ತುತ ಸಂಘಟನೆಯಲ್ಲಿ ವೈದ್ಯರು, ಇಂಜಿನಿಯರ್‌ಗಳು, ಶಿಕ್ಷಕರು, ವಕೀಲರು, ಉದ್ಯಮಿಗಳು, ಕಾರ್ಪೊರೇಟ್ ಅಧಿಕಾರಿಗಳು ಸೇರಿ ವಿವಿಧ ಕ್ಷೇತ್ರಗಳಲ್ಲಿನ 800 ಸ್ವಯಂಸೇವಕರು ಟ್ರಾಫಿಕ್ ವಾರ್ಡನ್‌ಗಳಾಗಿ ಸೇವೆ ಸಲ್ಲಿಸುತ್ತಿದ್ದಾರೆ. ಸಂಚಾರ ನಿಯಂತ್ರಣ, ವಿಐಪಿ ಹಾಗೂ ವಿಐವಿಐಪಿ ಸಂಚಾರ ವ್ಯವಸ್ಥೆ, ಮ್ಯಾರಥಾನ್, ಸಾರ್ವಜನಿಕ ಉತ್ಸವಗಳು, ರಸ್ತೆ ಸುರಕ್ಷತಾ ಜಾಗೃತಿ ಕಾರ್ಯಕ್ರಮಗಳಲ್ಲಿ ಬೆಂಗಳೂರು ಸಂಚಾರ ಪೊಲೀಸರಿಗೆ ಸ್ವಯಂಪ್ರೇರಿತವಾಗಿ ನೆರವಾಗುತ್ತಿದ್ದಾರೆ.

ಸಂಘಟನೆಯ ಪ್ರಮುಖ ಕಾರ್ಯಕ್ಷೇತ್ರಗಳು ಸಂಚಾರ ನಿಯಂತ್ರಣ, ಸಂಚಾರ ಶಿಕ್ಷಣ ಮತ್ತು ಜಾಗೃತಿ, ರಸ್ತೆ ಇಂಜಿನಿಯರಿಂಗ್ ವೃತ್ತಿಯಾಗಿದ್ದು, ವಾರ್ಡನ್‌ಗಳು ಪ್ರತಿ ತಿಂಗಳು ನಡೆಯುವ ‘ತ್ರಿಶೂಲ’ ವಿಶೇಷ ಸಂಚಾರ ನಿಯಂತ್ರಣ ಅಭಿಯಾನ ಹಾಗೂ ಮಾಸಿಕ ಪೆರೇಡ್‌ನಲ್ಲೂ ಭಾಗವಹಿಸುತ್ತಾರೆ.

ಮಾಣೆಕ್‌ಶಾ ಪೆರೇಡ್ ಮೈದಾನದಲ್ಲಿ ನಡೆಯುವ ಗಣರಾಜ್ಯೋತ್ಸವ ಹಾಗೂ ಸ್ವಾತಂತ್ರ್ಯ ದಿನಾಚರಣೆಯ ಪಥಸಂಚಲನದಲ್ಲಿ ನಿರಂತರವಾಗಿ ಪ್ರಶಸ್ತಿ ಗಳಿಸುವ ಮೂಲಕ ಸಂಘಟನೆ ತನ್ನ ಶಿಸ್ತನ್ನು ಪ್ರದರ್ಶಿಸಿದೆ. ಹೊಸದಾಗಿ ಅಭಿವೃದ್ಧಿಪಡಿಸಿರುವ ವೆಬ್‌ಸೈಟ್‌ನಲ್ಲಿ ಸಂಘಟನೆಯ ಇತಿಹಾಸ, ಬೆಳವಣಿಗೆ, ಆಡಳಿತಾತ್ಮಕ ರಚನೆ, ಪ್ರಮುಖ ಚಟುವಟಿಕೆಗಳು, ಸಾಧನೆಗಳು, ಕಾರ್ಯಕ್ರಮಗಳು ಹಾಗೂ ನಾಗರಿಕರ ಪಾಲ್ಗೊಳ್ಳುವಿಕೆ ಕುರಿತ ಸಮಗ್ರ ಮಾಹಿತಿ ಲಭ್ಯವಿದೆ. ಕಳೆದ ನಾಲ್ಕು ದಶಕಗಳಲ್ಲಿ ಟ್ರಾಫಿಕ್ ವಾರ್ಡನ್‌ಗಳು ಸಲ್ಲಿಸಿರುವ ಸೇವೆಯ ವಿವರಗಳನ್ನೂ ಒಳಗೊಂಡಿದೆ.

ರಸ್ತೆ ಸುರಕ್ಷತೆ ಮತ್ತು ಸಂಚಾರ ನಿರ್ವಹಣೆಯಲ್ಲಿ ನಾಗರಿಕರ ಪಾಲ್ಗೊಳ್ಳುವಿಕೆಯನ್ನು ಹೆಚ್ಚಿಸುವ ಉದ್ದೇಶದಿಂದ ವೆಬ್‌ಸೈಟ್‌ನಲ್ಲಿ ಆನ್‌ಲೈನ್ ಅರ್ಜಿ ಸೌಲಭ್ಯ ಕಲ್ಪಿಸಲಾಗಿದೆ. ಬೆಂಗಳೂರು ನಿವಾಸಿಗಳು ಅರ್ಜಿ ಸಲ್ಲಿಸಿ ಟ್ರಾಫಿಕ್ ವಾರ್ಡನ್‌ಗಳಾಗಿ ಸ್ವಯಂ ಸೇವಕರಾಗಿ ಸೇರ್ಪಡೆಯಾಗುವ ಅವಕಾಶವನ್ನು ಈ ಪೋರ್ಟಲ್ ಒದಗಿಸಲಾಗಿದೆ ಎಂದು ಆಯುಕ್ತರು ಹೇಳಿದರು. 

ಈ ವೇಳೆ  ನಗರ ಸಂಚಾರ ವಿಭಾಗದ ಜಂಟಿ ಪೊಲೀಸ್ ಆಯುಕ್ತ ಕಾರ್ತಿಕ್ ರೆಡ್ಡಿ, ರಮೇಶ ಬಾಣೋತ್ ಸೇರಿ ಇತರರು ಇದ್ದರು.