ಶ್ರೀ ಕ್ಷೇತ್ರ ಕುರುಬನಕಟ್ಟೆಯ ಧರ್ಮಾಧಿಕಾರಿ ಶ್ರೀ ಬಿ.ಎಲ್. ವರುಣಲಿಂಗರಾಜೇ ಅರಸ್ ಅವರ ನೇತೃತ್ವದಲ್ಲಿ ಬೆಳಗ್ಗೆ ಚೆನ್ನಯ್ಯ ಮತ್ತು ಲಿಂಗಯ್ಯನವರ ಕಂಡಾಯಗಳ ಹೊಂಬಾಳೆ ಉತ್ಸವ ಶ್ರದ್ಧಾ-ಭಕ್ತಿಯಿಂದ ನೆರವೇರಿತು. ಈ ವೇಳೆ ಕೊಂಬು, ಕಹಳೆ, ತಮಟೆ ಹಾಗೂ ನೀಲಗಾರರ ಜಾಗಟೆ ಶಬ್ದ ಮೊಳಗಿತು. ಬಳಿಕ ಸರತಿ ಸಾಲಿನಲ್ಲಿ ಭಕ್ತರು ಗದ್ದುಗೆಯ ದರ್ಶನವನ್ನು ಶ್ರದ್ಧಾಭಕ್ತಿಯಿಂದ ದರ್ಶನ ಮಾಡಿದರು. ಧೂಪದ ಹೊಂಡದಲ್ಲಿ ಕರ್ಪೂರ, ಧೂಪ ಹಚ್ಚಿ ಭಕ್ತಿ ಮೆರೆದರು. ಭಕ್ತರು ಹೆಚ್ಚಿನ ಸಂಖ್ಯೆಯಲ್ಲಿ ಆಗಮಿಸಿದ ಹಿನ್ನೆಲೆ ದೇವಾಲಯ ಆವರಣದಲ್ಲಿರುವ ಕಾಯಿ ಹೊಡೆಸುವ ಸರತಿ ಸಾಲು ದೇವಾಲಯ ಹೊರಭಾಗದವರೆಗೂ ವಿಸ್ತರಣೆಗೊಂಡಿತ್ತು. ಗಂಟೆಗಟ್ಟಲೇ ಕಾದು ತಡೆ ಪೂಜೆ ಸಲ್ಲಿಸಿದರು. ಚಾಮರಾಜನಗರ ಸೇರಿದಂತೆ ಇನ್ನಿತರ ಜಿಲ್ಲೆಗಳ ಗ್ರಾಮಗಳಿಂದ ಸಾವಿರಾರು ಭಕ್ತರು ಬೈಕ್, ಕಾರು, ವ್ಯಾನ್, ಬಸ್, ಆಟೋಗಳಲ್ಲಿ ಆಗಮಿಸಿದ್ದರಿಂದ ವಾಹನ ದಟ್ಟಣೆಯು ಹೆಚ್ಚಾಗಿತ್ತು.
