ರಂಗಭೂಮಿ ಸಭ್ಯತೆ ಮತ್ತು ಸಂಸ್ಕಾರ ಕಲಿಸುವ ಅದ್ಭುತ ಮಾಧ್ಯಮ: ಪ್ರೊ. ಬಸವರಾಜ ಡೋಣೂರ

ಕಲಬುರಗಿ: ರಂಗಭೂಮಿ ಕೇವಲ ಮನರಂಜನೆಯ ಸಾಧನವಲ್ಲ, ಅದು ಮನುಷ್ಯನಿಗೆ ಸಭ್ಯತೆ, ನಾಗರಿಕತೆ ಮತ್ತು ಸಂಸ್ಕಾರವನ್ನು ಕಲಿಸುವ ಶಕ್ತಿಯುಳ್ಳ ಅದ್ಭುತ ಮಾಧ್ಯಮ ಎಂದು ಕರ್ನಾಟಕ ಕೇಂದ್ರೀಯ ವಿಶ್ವವಿದ್ಯಾಲಯದ ಇಂಗ್ಲೀಷ್ ವಿಭಾಗದ ಮುಖ್ಯಸ್ಥ ಪ್ರೊ. ಬಸವರಾಜ ಡೋಣೂರ ಅವರು ಹೇಳಿದರು.

ಶುಕ್ರವಾರ ನಗರದ ರಂಗಾಯಣ ಸಭಾಂಗಣದಲ್ಲಿ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಹಾಗೂ ಕರ್ನಾಟಕ ರಂಗಾಯಣ ಕಲಬುರಗಿ ಇವರ ಸಂಯುಕ್ತಾಶ್ರಯದಲ್ಲಿ ವಿಶ್ವ ರಂಗಭೂಮಿ ದಿನಾಚರಣೆ ಉದ್ಘಾಟಿಸಿ ಮಾತನಾಡಿ ಅವರು ಜನರನ್ನು ನೇರವಾಗಿ ತಟ್ಟುವ ಮತ್ತು ಪ್ರಭಾವಿಸುವ ಸಾಮರ್ಥ್ಯ ಪ್ರದರ್ಶನ ಕಲೆಗಳಿಗೆ, ವಿಶೇಷವಾಗಿ ನಾಟಕಕ್ಕೆ ಇದೆ. ಸಮಾಜವು ಇಂದಿಗೂ ಕಲಾವಿದರನ್ನು ಒಂದು ಮಾದರಿಯಾಗಿ ನೋಡುತ್ತದೆ. ಪ್ರೇಕ್ಷಕರು ಕಲಾವಿದರೊಂದಿಗೆ ಭಾವನಾತ್ಮಕ ಸಂಬಂಧವನ್ನು ಹೊಂದಿರುತ್ತಾರೆ ಎಂದು ಹೇಳಿದರು.

ರಂಗಭೂಮಿಯ ಇತಿಹಾಸವನ್ನು ಮೆಲುಕು ಹಾಕುತ್ತಾ, ಏಣಗಿ ಬಾಳಪ್ಪ ಮತ್ತು ಗುಬ್ಬಿ ವೀರಣ್ಣ ಅವರಂತಹ ದಿಗ್ಗಜರು ಸಮಾಜಕ್ಕೆ ನೀಡಿದ ಕೊಡುಗೆಯನ್ನು ಅವರು ಸ್ಮರಿಸಿದರು. "ಗುಬ್ಬಿ ವೀರಣ್ಣನವರು ಒಬ್ಬ ಮಾಸ್ಟರ್ ಫಿಲಾಸಫರ್ ಆಗಿದ್ದರು. ಅಂತಹ ಹಿರಿಯರ ಹಾದಿಯಲ್ಲಿ ಇಂದಿನ ಕಲಾವಿದರು ಸಾಗುತ್ತಿರುವುದು ಸಂತೋಷದ ವಿಷಯ ಎಂದರು.

ವಾಣಿಜ ತೆರಿಗೆ ಇಲಾಖೆ ನಿವೃತ್ತ ಉಪ ಆಯುಕ್ತ ಎಚ್.ಎಸ್. ಬಸವಪ್ರಭು ಮಾತನಾಡಿ, ದೂರದರ್ಶನವು ಜನರಿಗೆ ಕೇವಲ ಪ್ರಖ್ಯಾತಿ ಮತ್ತು ಹಣವನ್ನು ನೀಡುತ್ತದೆ, ಆದರೆ ರಂಗಭೂಮಿ ಮಾತ್ರ ವ್ಯಕ್ತಿಯನ್ನು ನಿಜವಾದ ಮನುಷ್ಯನನ್ನಾಗಿ ರೂಪಿಸುತ್ತದೆ ಎಂದು ಹೇಳಿದರು.

ಸಮಾಜದ ಸುಧಾರಣೆಗೆ ನಾಟಕ ಪ್ರಬಲ ಮಾಧ್ಯಮ ಪ್ರಸ್ತುತ ಸಮಾಜದಲ್ಲಿ ಶಾಂತಿ, ಸಹನೆ, ಪ್ರೀತಿ ಮತ್ತು ಸೌಹಾರ್ದತೆಯಂತಹ ಮೌಲ್ಯಗಳು ಕ್ಷೀಣಿಸುತ್ತಿವೆ. ಇಂತಹ ಸಂದರ್ಭದಲ್ಲಿ ಸಮಾಜದಲ್ಲಿ ಹೊಸ ಚೈತನ್ಯ ತುಂಬಲು ಮತ್ತು ಜನರಲ್ಲಿ ಜಾಗೃತಿ ಮೂಡಿಸಲು ನಾಟಕಗಳು ಅತ್ಯಂತ ಪ್ರಬಲ ಮಾಧ್ಯಮವಾಗಿವೆ. ರಂಗಭೂಮಿಯು ಸಮಾಜದ ಅಂಕುಡೊಂಕುಗಳನ್ನು ತಿದ್ದುವ ಶಕ್ತಿಯನ್ನು ಹೊಂದಿದೆ ಎಂದು ಅವರು ಹೇಳಿದರು.

ಕರ್ನಾಟಕ ರಂಗಾಯಣ ಕಲಬುರಗಿ ನಿರ್ದೇಶಕಿ ಸುಜಾತಾ ಜಂಗಮಶೆಟ್ಟಿ ಮಾತನಾಡಿದ ಅವರು ವಿಶ್ವ ರಂಗಭೂಮಿ ದಿನದ ಇತಿಹಾಸ ಮತ್ತು ಮಹತ್ವವನ್ನು ಸ್ಮರಿಸಿದರು. 1949ರಲ್ಲಿ ಸ್ಥಾಪನೆಯಾದ ಅಂತರಾಷ್ಟ್ರೀಯ ರಂಗ ಸಂಸ್ಥೆ ಹಾಗೂ 1962ರಿಂದ ಆರಂಭವಾದ ಈ ದಿನಾಚರಣೆಯು ಇಂದು ಜಗತ್ತಿನಾದ್ಯಂತ ರಂಗಭೂಮಿಯ ಕಂಪು ಪಸರಿಸುತ್ತಿದೆ ಎಂದು ತಿಳಿಸಿದರು.

ಈ ಬಾರಿಯ ಕಾರ್ಯಕ್ರಮದ ವಿಶೇಷತೆಯಾಗಿ ರಾಯಚೂರು ಜಿಲ್ಲೆಯ ಹಿರಿಯ ಕಲಾವಿದರಾದ ಶಿವಣ್ಣ ಮೂರ್ತಿ ಹಾಗೂ ಬೆಂಗಳೂರಿನ ಪ್ರಸಿದ್ಧ ಶೃತಿ ಶಿಲ್ಪಿ ರಾಮಯ್ಯ ಅವರನ್ನು ಆಹ್ವಾನಿಸಲಾಗಿತ್ತು. ಕಲಬುರಗಿ ರಂಗಾಯಣದ ಕಲಾವಿದ ಮಹತೇಶ್ ಅವರ ತಂದೆಯವರು ಹಗಲುವೇಷ ಮತ್ತು ಬಯಲಾಟದಂತಹ ಜನಪದ ಕಲೆಗಳನ್ನು ಉಳಿಸಿಕೊಂಡು ಬಂದಿರುವ ಕುರಿತು ಸುಜಾತಾ ಅವರು ಮೆಚ್ಚುಗೆ ವ್ಯಕ್ತಪಡಿಸಿದರು.

ಇಂತಹ ಪ್ರತಿಭಾನ್ವಿತ ಕಲಾವಿದರಿಗೆ ಇನ್ನೂ ಹೆಚ್ಚಿನ ಸರ್ಕಾರಿ ಗೌರವಗಳು ಸಿಗಬೇಕಿದೆ ಎಂದು ಅವರು ಆಶಯ ವ್ಯಕ್ತಪಡಿಸಿದರು.

ಹಗಲು ವೇಷ ಕಲಾವಿದ ಶಿವಣ್ಣ ಮೋತಿ ಅವರು ಕಲೆಯಲ್ಲಿ ಸಾಗಿದ ತಮ್ಮ ಜೀವದ, ಪ್ರಸ್ತುತವಾಗಿ ಸಾಗುತ್ತಿರುವ ಕಲೆಯ ಬಗ್ಗೆ ಮಾತನಾಡಿದ ಅವರು ಆಧುನಿಕತೆಯ ಅಬ್ಬರ ಹಾಗೂ ಬದಲಾದ ಕಾಲಘಟ್ಟದಲ್ಲಿ ಗ್ರಾಮೀಣ ಭಾಗದ ಸಾಂಪ್ರದಾಯಿಕ ಕಲೆಗಳು ಸೊರಗುತ್ತಿವೆ. ರಂಗಭೂಮಿ ಮತ್ತು ಬಯಲಾಟದಂತಹ ಕಲೆಗಳು ಇಂದು ಟಿವಿ ಹಾಗೂ ಮೊಬೈಲ್‌ಗಳ ಹಾವಳಿಯಿಂದಾಗಿ ಜನಮಾನಸದಿಂದ ದೂರವಾಗುತ್ತಿವೆ ಎಂದು ತೀವ್ರ ಕಳವಳ ವ್ಯಕ್ತಪಡಿಸಿದರು

ಹಿಂದೆ ಕಲೆಗೆ ಮಾರುಹೋಗಿ ಗ್ರಾಮದ ಗೌಡರು, ದೇಶಪಾಂಡೆಗಳು ಕಲಾವಿದರಿಗೆ ಎಕರೆಗಟ್ಟಲೆ ಜಮೀನುಗಳನ್ನು ದಾನವಾಗಿ ನೀಡುತ್ತಿದ್ದರು. ಆದರೆ ಇಂದು ಕಲಾವಿದರಿಗೆ ಬದುಕು ನಡೆಸುವುದು ಕಷ್ಟಕರವಾಗಿದೆ. ತಬಲಾ, ಹಾರ್ಮೋನಿಯಂ ಅಂತಹ ಮೂಲ ವಾದ್ಯಗಳನ್ನು ನಂಬಿ ಬದುಕುತ್ತಿರುವ ಕಲಾವಿದರ ಸ್ಥಿತಿ ಚಿಂತಾಜನಕವಾಗಿದೆ. ಜಾನಪದ ಕಲೆ ಎಂದರೆ ಕೇವಲ ಮನರಂಜನೆಯಲ್ಲ, ಅದೊಂದು ಶಿಸ್ತುಬದ್ಧ ಜೀವನ ಕ್ರಮ ಎಂದು ಅವರು ಬಣ್ಣಿಸಿದರು.

ಸಂಗೀತದಲ್ಲಿ ತಾಳ ತಪ್ಪಿದರೆ ಹಾಡು ಕೆಡುತ್ತದೆ, ಆದರೆ ಜೀವನದಲ್ಲಿ ತಾಯಿ (ಸಂಸ್ಕಾರ) ತಪ್ಪಿದರೆ ಬದುಕೇ ಕೆಡುತ್ತದೆ. ಈ ಕಲೆಗಳು ಮನುಷ್ಯನ ಕೋಪ, ಆಕ್ರೋಶಗಳನ್ನು ಶಮನ ಮಾಡಿ ಮನಸ್ಸಿಗೆ ಶಾಂತಿ ನೀಡುತ್ತವೆ ಎಂದು ಹೇಳಿದರು.

ಕರ್ನಾಟಕ ಜಾನಪದ ಅಕಾಡಮಿ ಪ್ರಶಸ್ತಿ ಪುರಸ್ಕೃತ ಶೃತಿ ಶಿಲ್ಪಿ ರಾಮಯ್ಯ ಅವರು ಮಾತನಾಡಿ ಇಂದಿನ ಒತ್ತಡದ ಜಗತ್ತಿನಲ್ಲಿ ಸಂಸಾರದಲ್ಲಿ ಸುಖವಿಲ್ಲದೆ ಕಷ್ಟಪಡುತ್ತಿರುವ ಜನರಿಗೆ ಏಕತಾರಿಯ ನಾದ ನೆಮ್ಮದಿ ನೀಡಬಲ್ಲದು ಎಂಬುದು ರಾಮಯ್ಯ ಅವರ ಅಚಲ ನಂಬಿಕೆ. ಈ ನಿಟ್ಟಿನಲ್ಲಿ ಅವರು ಜಾನಪದ ಏಕತಾರಿ ತರಬೇತಿ ಕೇಂದ್ರ ಸ್ಥಾಪಿಸಿದ್ದು, ರಾಜ್ಯದ ಪ್ರತಿಯೊಂದು ಜಿಲ್ಲೆಯಲ್ಲೂ ಏಕತಾರಿಯ ಬೀಜ ಬಿತ್ತುತಿದ್ದೇನೆ ಎಂದು ಹೇಳಿದರು.

ಮನೆಯಲ್ಲಿ ಏಕತಾರಿಯ ನಾದ ಮೊಳಗುತ್ತಿದ್ದರೆ ಮಕ್ಕಳು ಮೊಬೈಲ್ ವ್ಯಾಮೋಹದಿಂದ ದೂರ ಉಳಿದು ಆಧ್ಯಾತ್ಮಿಕ ಜ್ಞಾನದತ್ತ ಆಕರ್ಷಿತರಾಗುತ್ತಾರೆ. ಮೊಬೈಲ್ ಎಂಬುದು ಕೇವಲ ದುಃಖ-ಅಶಾಂತಿಯ ಮೂಲವಾಗಬಾರದು ಎಂದು ತಿಳಿಸಿದರು. ಕಲಬುರಗಿ ರಂಗಾಯಣ ರೆಪರ್ಟರಿ ಕಲಾವಿದರು ರಂಗಗೀತೆಗಳನ್ನು ಹಾಡಿ ಜನರ ಮನಸೆಳೆದರು.