ದಂಡಕ್ಕಿಂತ ಟೋಯಿಂಗ್ ಶುಲ್ಕವೇ ದುಬಾರಿ!

ಸಂಚಾರ ನಿಯಮ ಉಲ್ಲಂಘಿಸಿ ವಾಹನ ನಿಲ್ಲಿಸಿದಾಗ ವಿಧಿಸುವ ದಂಡದ ಮೊತ್ತ ಸರ್ಕಾರದ ನಿಯಮಕ್ಕನುಗುಣವಾಗಿರುತ್ತದೆ. ಆದರೆ, ವಾಹನ ಟೋಯಿಂಗ್ ಮಾಡಿದಾಗ ಪಾವತಿಸಬೇಕಾದ ಹಣವು ದಂಡದ ಮೊತ್ತ ಮೀರಿಸುತ್ತಿದೆ. ವಾಹನ ಎತ್ತಿದ ಸೇವೆಗಾಗಿ ವಿಧಿಸುವ ಈ ಶುಲ್ಕವು ಮಧ್ಯಮ ವರ್ಗದ ಜನರ ಆರ್ಥಿಕತೆಯ ಮೇಲೆ ನೇರ ಹೊಡೆತ ನೀಡುತ್ತಿದೆ. ಬೈಕ್‌ಗೆ 650 ರೂ. ಟೋಯಿಂಗ್ ಶುಲ್ಕ ವಿಧಿಸಿದರೆ, ಕಾರಿಗೆ 1 ಸಾವಿರ ರೂ. ವಿಧಿಸುತ್ತಾರೆ. ಇವೆರಡರ ವ್ಯತ್ಯಾಸ ಕೇವಲ 350 ರೂ. ಇದೆ.

ಒಂದು ಟೋಯಿಂಗ್ ವಾಹನದಲ್ಲಿ ಒಂದೇ ಕಾರು ಒಯ್ಯಲು 1 ಸಾವಿರ ರೂ. ಶುಲ್ಕ ವಿಧಿಸಲಾಗುತ್ತದೆ. ಆದರೆ ಒಂದೇ ವಾಹನದಲ್ಲಿ 4 ಬೈಕ್‌ಗಳನ್ನು ತೆಗೆದುಕೊಂಡು ಹೋಗುತ್ತಾರೆ. ಆದ್ದರಿಂದ ಬೈಕ್‌ನ ಟೋಯಿಂಗ್ ಶುಲ್ಕ ಪರಿಷ್ಕರಣೆ ಆಗಬೇಕೆಂದು ಸಾರ್ವಜನಿಕರು ಒತ್ತಾಯಿಸಿದ್ದಾರೆ. ತಜ್ಞರ ಪ್ರಕಾರ, ಕೇವಲ ದಂಡ ವಿಧಿಸುವುದರಿಂದ ಟ್ರಾಫಿಕ್ ಸಮಸ್ಯೆ ಬಗೆಹರಿಯುವುದಿಲ್ಲ. ದಂಡ ಎನ್ನುವುದು ತಿದ್ದುಪಡಿಗಾಗಿ ಇರಬೇಕೇ ಹೊರತು, ಇದನ್ನೇ ಬಂಡವಾಳ ಮಾಡಿಕೊಳ್ಳಬಾರದು. ನಗರದಾದ್ಯಂತ ಅಗ್ಗದ ದರದ ಮಲ್ಟಿ-ಲೆವೆಲ್ ಪಾರ್ಕಿಂಗ್ ವ್ಯವಸ್ಥೆ ಜಾರಿ ತರುವ ವರೆಗೂ ಇಂತಹ ಟೋಯಿಂಗ್ ದಂಧೆ ನಿಲ್ಲುವುದಿಲ್ಲ ಎಂಬ ಅಭಿಪ್ರಾಯ ವ್ಯಕ್ತವಾಗಿದೆ.

ಸಾರ್ವಜನಿಕರ ಸಮಸ್ಯೆಗಳನ್ನು ಆದಾಯದ ಮೂಲವನ್ನಾಗಿ ನೋಡಬಾರದು. ಆದ್ದರಿಂದ ಯಾವುದೇ ಯೋಜನೆಯಾಗಲಿ ನಾಗರಿಕ ಸ್ನೇಹಿಯಾಗಿರಬೇಕೇ ಹೊರತು, ‘ದಂಡ ಸ್ನೇಹಿ’ಯಾಗಿರಬಾರದು. ಈ ದುಬಾರಿ ಟೋಯಿಂಗ್ ವ್ಯವಸ್ಥೆ ಹೀಗೆ ಮುಂದುವರಿದರೆ, ಆಡಳಿತ ವ್ಯವಸ್ಥೆಯ ಮೇಲೆ ನಾಗರಿಕರು ನಂಬಿಕೆ ಕಳೆದುಕೊಳ್ಳಲಿದ್ದಾರೆ.

ಕ್ಷೇತ್ರ ಮಟ್ಟದಲ್ಲಿ ಕಾರ್ಯನಿರ್ವಹಿಸುತ್ತಿರುವ ಟೋಯಿಂಗ್ ಸಿಬ್ಬಂದಿ, ಸಂಚಾರ ಸುಧಾರಣೆಗಿಂತ ತಮ್ಮ ದೈನಂದಿನ ‘ಟಾರ್ಗೆಟ್’ ಪೂರೈಸುವುದಕ್ಕೇ ಹೆಚ್ಚಿನ ಆದ್ಯತೆ ನೀಡುತ್ತಿದ್ದಾರೆ ಎಂಬ ಆರೋಪಗಳು ಈಗಲೂ ಕೇಳಿಬರುತ್ತಿವೆ. ಇನ್ನು ಸೂಕ್ತ ಪಾರ್ಕಿಂಗ್ ವ್ಯವಸ್ಥೆ ಕಲ್ಪಿಸದೆಯೇ ನೋ-ಪಾರ್ಕಿಂಗ್ ಫಲಕ ಅಳವಡಿಸಿ ವಾಹನ ಎತ್ತುತ್ತಿರುವುದು ಅವೈಜ್ಞಾನಿಕ ಎಂದು ವಾಹನ ಸವಾರರು ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ.

ಹಳೆಯ ವ್ಯವಸ್ಥೆಯಲ್ಲಿ ಖಾಸಗಿ ಆಪರೇಟರ್‌ಗಳು ಟೋಯಿಂಗ್ ನಿಭಾಯಿಸುತ್ತಿದ್ದರು. ಇವರ ಕಿರುಕುಳ ಹೆಚ್ಚಾಗಿದ್ದರಿಂದ ಸರ್ಕಾರ ಈ ಇದಕ್ಕೆ ಬ್ರೇಕ್ ಹಾಕಿತ್ತು. ಆದರೀಗ ಪುನರ್ ಆರಂಭವಾಗಿದ್ದು, ಗ್ರೇಟರ್ ಬೆಂಗಳೂರು ಪ್ರಾಧಿಕಾರ (ಜಿಬಿಎ) ವಾಹನಗಳನ್ನು ನೀಡಿದ್ದು, ಜತೆಗೆ ಟೋಯಿಂಗ್ ಶುಲ್ಕವನ್ನೂ ನಿಗದಿ ಪಡಿಸಿದೆ.