ಆಶ್ರಯ ಬಡಾವಣೆ ಜನರ ಬವಣೆ ಕೇಳೋರಿಲ್ಲ

ಪಟ್ಟಣದ ಪುರಸಭಾ ವ್ಯಾಪ್ತಿಯ 23ನೇ ವಾರ್ಡ್ ವ್ಯಾಪ್ತಿಯ ಸಿದ್ಧಾರ್ಥ ನಗರದ (ಎಡಿ ಕಾಲನಿ) ಆಶ್ರಯ ಬಡಾವಣೆ ಅಭಿವೃದ್ಧಿ ಕಾಣದಿರುವುದರಿಂದ ಕೆಸರು ಗದ್ದೆಯಾಗಿ ಮಾರ್ಪಟ್ಟಿದೆ. ಸ್ವಚ್ಛತೆ ಇಲ್ಲಿ ಮರೀಚಿಕೆಯಾಗಿದ್ದು, ಚರಂಡಿ, ಹದಗೆಟ್ಟ ರಸ್ತೆ, ಒಳಚರಂಡಿ, ಶುದ್ಧ ಕುಡಿಯುವ ನೀರು ಪೂರೈಕೆ, ವಿದ್ಯುತ್ ಸೌಲಭ್ಯವಿಲ್ಲದೆ ಬಡಾವಣೆಯ ನಾಗರಿಕರು ಸಮಸ್ಯೆಗಳ ನಡುವೆಯೇ ಬದುಕು ಸಾಗಿಸುತ್ತಿದ್ದಾರೆ.

2012-13ನೇ ಸಾಲಿನಲ್ಲಿ ಶಾಸಕ ಎಚ್.ಡಿ.ರೇವಣ್ಣ ಇಚ್ಛಾಶಕ್ತಿಯಿಂದ ಪುರಸಭೆ ಆಡಳಿತ ಆಶ್ರಯ ಬಡಾವಣೆಯಲ್ಲಿ 193 ನಿವೇಶನಗಳನ್ನು ಬಡ ಆದಿದ್ರಾವಿಡ ಸಮುದಾಯದವರಿಗೆ ವಿತರಿಸಿತು. ಆದರೆ, ಈವರೆಗೂ ಯಾವುದೇ ಸೌಕರ್ಯ ಕಲ್ಪಿಸಿಲ್ಲ.

ನೂರಾರು ಕುಟುಂಬ ಆಶ್ರಯ ಬಡಾವಣೆಯಲ್ಲಿ ಮನೆ ನಿರ್ಮಿಸಿಕೊಂಡಿವೆ. ಸುಮಾರು 150 ಕುಟುಂಬ ನೂತನ ಆಶ್ರಯ ಬಡಾವಣೆಯಲ್ಲಿ ನೆಲೆಸಿವೆ. ಆದರೆ, ಸೌಕರ್ಯ ಇಲ್ಲದೆ, ಕೂಲಿ ಕಾರ್ಮಿಕರು, ಕಟ್ಟಡ ಕಾರ್ಮಿಕರು, ವಾಹನ ಚಾಲಕರು, ಎಲೆಕ್ಟ್ರಿಕ್ ಕೆಲಸಗಾರರು, ಹಲವು ಕೈಕಸುಬು ಮಾಡುವ ಬಡಕುಟುಂಬ ದಯನೀಯ ಸ್ಥಿತಿಯಲ್ಲಿ ಬದುಕು ಸಾಗಿಸುವಂತಾಗಿದೆ.

ಮಾದಿಗ ಸಮುದಾಯದವರಿಗೆ ನಿವೇಶನ ವಿತರಿಸಿ 15 ವರ್ಷ ಕಳೆಯುತ್ತಿದ್ದರೂ ಅಭಿವೃದ್ಧಿ ಮರೀಚಿಕೆಯಾಗಿದೆ. ಪುರಸಭಾ ವ್ಯಾಪ್ತಿಯಲ್ಲೇ ಈ ಬಡಾವಣೆ ಇದ್ದರೂ ಪೌರಕಾರ್ಮಿಕರು ಸ್ವಚ್ಛತೆಗೆ ನೇಮಕವಾಗಿಲ್ಲ. ಕಸ ಸಂಗ್ರಹಣೆಗೆ ಪುರಸಭೆಯ ವಾಹನ ನಿಯೋಜನೆಗೊಂಡಿಲ್ಲ. ಸ್ವಚ್ಛತೆ ಇಲ್ಲದೆ ಬಡಾವಣೆ ಗಬ್ಬೆದ್ದು ನಾರುತ್ತಿದೆ. ಚರಂಡಿ ಸೌಲಭ್ಯಗಳಿಲ್ಲದೆ ಮನೆ ಬಳಕೆ ನೀರು ರಸ್ತೆಯಲ್ಲಿ ನಿಂತು ಕೆಸರು ಗದ್ದೆಯಂತಾಗಿರುವುದರಿಂದ ಸೊಳ್ಳೆಗಳ ಕಾಟ ವಿಪರೀತವಾಗಿದೆ. ಹಯಲು ಬಹಿರ್ದೆಸೆಗೆ ತೆರಳುವುದು ಮಾಮೂಲಾಗಿದೆ. ಕುಡಿಯುವ ನೀರಿಗೆ ಪರದಾಡುಂತಾಗಿದೆ. ಬೀದಿದೀಪದ ಸೌಲಭ್ಯವಿಲ್ಲದ ಕಾರಣ ರಾತ್ರಿ ಸಮಯದಲ್ಲಿ ಓಡಾಡಲು ಭಯ ಪಡುವಂತಾಗಿದೆ. ಈ ನಡುವೆ ವಿದ್ಯುತ್ ಕಂಬಗಳ ಸೌಲಭ್ಯ ನೀಡಲಾಗಿದ್ದರೂ ನಿರ್ವಹಣೆ ಕೊರತೆ ಎದುರಾಗಿದೆ.

ಇಷ್ಟೆಲ್ಲ ಸಮಸ್ಯೆ ಇದ್ದರೂ ಪುರಸಭೆ ಅಧಿಕಾರಿಗಳಾಗಲೀ ಅಥವಾ ಸಿಬ್ಬಂದಿ ಆಶ್ರಯ ಬಡಾವಣೆಗೆ ಈವರೆಗೂ ಭೇಟಿ ನೀಡಿಲ್ಲ. ಜತೆಗೆ ಸಮಸ್ಯೆ ಕೇಳಿಲ್ಲ ಎಂಬುದು ಅಲ್ಲಿನ ನಾಗರಿಕರ ದೂರು.

ಸರ್ಕಾರದ ಯಾವುದೇ ಅಭಿವೃದ್ಧಿ ಯೋಜನೆ ಈವರೆಗೂ ಈ ಬಡಾವಣೆಗೆ ಬಂದಿಲ್ಲ. ಚುನಾವಣೆ ಸಂದರ್ಭದಲ್ಲಿ ಜನಪ್ರತಿನಿಧಿಗಳು ಭರವಸೆ ನೀಡಿ ಹೋಗುತ್ತಾರೆ. ನಂತರ ರಾಜಕಾರಣಿಗಳಾಗಲೀ ಅಥವಾ ಅಧಿಕಾರಿಗಳಾಗಲೀ ಭೇಟಿ ನೀಡಿಲ್ಲ. ಹತ್ತಾರು ವರ್ಷ ಕಳೆದರೂ ಬಡಾವಣೆಯನ್ನು ಅಭಿವೃದ್ಧಿ ಮಾಡದೆ ಅನ್ಯಾಯ ಮಾಡಲಾಗಿದೆ. ಉತ್ತಮ ಪರಿಸರದಲ್ಲಿ ಜೀವನ ನಡೆಸಲು ಸಾಧ್ಯವಿಲ್ಲದಂತಾಗಿದ್ದು ಸಮಸ್ಯೆಗಳ ನಡುವೆಯೇ ಬದುಕುವಂತೆ ಆಗಿರುವುದು ನಮ್ಮ ದೌರ್ಭಾಗ್ಯ. ಇನ್ನಾದರೂ ಆಶ್ರಯ ಬಡಾವಣೆಯಲ್ಲಿ ಅಭಿವೃದ್ಧಿ ಕಾರ್ಯಗಳು ತುರ್ತಾಗಿ ಆಗಬೇಕೆಂದರೆ ಜನಪ್ರತಿನಿಧಿಗಳು ಇತ್ತ ಗಮನಹರಿಸಬೇಕು ಎಂಬುದು ಬಡಾವಣೆಯ ನಾಗರಿಕರ ಒತ್ತಾಯ.

ಯು.ಎನ್.ಶಿವಶಂಕರ್ ಪುರಸಭೆ ಮುಖ್ಯಾಧಿಕಾರಿ, ಹೊಳೆನರಸೀಪುರ