ರಾಜ್ಯ

ರಾಜ್ಯಕ್ಕೆ ತಮಿಳುನಾಡಿನ ಜಲ್ಲಿ ಇಲ್ಲ / HOSURU

ಲಾರಿಗಳು
ಲಾರಿಗಳು
Published on: 
ಹೊಸೂರು : ತಮಿಳುನಾಡಿನಿಂದ ಕರ್ನಾಟಕ್ಕೆ ಜಲ್ಲಿಕಲ್ಲು ಸೇರಿ ಯಾವುದೇ ರೀತಿಯ ಕ್ರಷರ್​ ಸಾಮಗ್ರಿಯನ್ನು ಮುಂದಿನ ಮೂರು ತಿಂಗಳು ರವಾನಿಸಬಾರದು ಎಂದು ತಮಿಳು ಸರ್ಕಾರ ಆದೇಶಿಸಿದೆ.
ಸರ್ಕಾರದ ಸೂಚನೆ ಹಿನ್ನೆಲೆಯಲ್ಲಿ ಕರ್ನಾಟಕದ ಗಡಿಭಾಗ ಅತ್ತಿಬೆಲೆ ಜಿಜುವಾಡಿ ಚೆಕ್​ಪೋಸ್ಟ್​ ಬಳಿ ಕ್ರಷರ್​ ಲಾರಿಗಳನ್ನು ಕೃಷ್ಣಗಿರಿ ಜಿಲ್ಲಾಧಿಕಾರಿ ದಿನೇಶ್​ ಕುಮಾರ್​ ತಡೆದು ಪರಿಶೀಲಿಸಿದರು.
ಜಿಲ್ಲಾಧಿಕಾರಿ ದಿನೇಶ್​ಕುಮಾರ್​ ಮಾತನಾಡಿ, ಕರ್ನಾಟಕಕ್ಕೆ ಯಾವುದೇ ಜಲ್ಲಿ, ಕ್ರಷರ್​ ಸಂಬಂಧಿತ ಸಾಮಗ್ರಿಯನ್ನು ತಮಿಳುನಾಡಿನಿಂದ ಕೊಂಡೊಯ್ಯುವುದನ್ನು ರ್ನಿಬಂಧಿಸಿ, ಸರ್ಕಾರ ಸೂಚಿಸಿದೆ. ಈಗಾಗಲೇ ಕ್ರಷರ್​ ಮತ್ತು ಲಾರಿ ಮಾಲೀಕರ ಸಂದೊಂದಿಗೆ ಚರ್ಚಿಸಲಾಗಿದ್ದು, ಆದೇಶ ಮೀರಿ ರವಾನಿಸಿದರೆ ಕ್ರಷರ್​ ಮತ್ತು ಲಾರಿ ಮಾಲೀಕರ ಮೇಲೆ ಕಠಿಣ ಕ್ರಮ ಕೈಗೊಳ್ಳುವ ಎಚ್ಚರಿಕೆ ನೀಡಲಾಗಿದೆ ಎಂದರು.
ನಾಲ್ಕು ಲಾರಿ ಸೀಜ್​ : ಜಲ್ಲಿ ಮತ್ತು ಕ್ರಷರ್​ ಪದಾರ್ಥ ಸಾಗಿಸುವ 484 ಲಾರಿಗಳು ನೋಂದಣಿಯಾಗಿವೆ. ಈ ಲಾರಿಗಳು ಅನ್ಯರಾಜ್ಯಕ್ಕೆ ಹೋದರೆ ಅಂತಹ ವಾಹನಗಳನ್ನು ಸೀಜ್​ ಮಾಡಲಾಗುವುದು. ಗ್ರೀನ್​ಪಾಸ್​ ಮೂಲಕ ಜಲ್ಲಿ ರವಾನಿಸುವ ಲಾರಿಗಳೂ ಸಹ ಅನುಮತಿ ಪಡೆಯಬೇಕು. ಅನುಮತಿ ಇಲ್ಲದೇ ಕರ್ನಾಟಕಕ್ಕೆ ಹೊರಟಿದ್ದ ನಾಲ್ಕು ಲಾರಿಗಳನ್ನು ಸೀಜ್​ ಮಾಡಿ, ಪ್ರಕರಣ ದಾಖಲಿಸಲಾಗಿದೆ ಎಂದು ಡಿಸಿ ತಿಳಿಸಿದ್ದಾರೆ.
ಸಿಸಿ ಕ್ಯಾಮರಾ ಕಣ್ಗಾವಲು : ಕರ್ನಾಟಕಕ್ಕೆ ಸಂಪರ್ಕ ಕಲ್ಪಿಸುವ ಎಲ್ಲ ಮಾರ್ಗಗಳ ಮೇಲೆ ಸಿಸಿ ಕ್ಯಾಮರಾ ಕಣ್ಗಾವಲು ಇರಲಿದೆ. ಹೊಸೂರುನಿಂದ ಗಡಿ ಭಾಗದವರೆಗೆ 14 ಕಡೆ ಸಿಸಿ ಕ್ಯಾಮರಾ ಅಳವಡಿಸಲಾಗಿದೆ. ಅಲ್ಲದೇ ಎಲ್ಲ ಕ್ರಷರ್​ ಲಾರಿಗಳ ನಂಬರ್​ ಪ್ಲೇಟ್​ ಮೇಲೆ ಕ್ಯೂಆರ್​ ಕೋಡ್​ ಅಂಟಿಸಿ, ಲಾರಿ ಸಂಚಾರದ ಮೇಲೆ ನಿಗಾವಹಿಸಲಾಗುವುದು. ತಮಿಳುನಾಡು ಪೊಲೀಸ್​, ಅರ್​ಟಿಒ ಹಾಗೂ ಕಂದಾಯ ಮತ್ತು ಪರಿಸರ ಮಾಲಿನ್ಯ ಇಲಾಖೆ ಅಧಿಕಾರಿಗಳು ಗಡಿ ಪ್ರದೇಶದಲ್ಲಿ ಪರಿಶೋಧನೆ ನಡೆಸಲಿದ್ದಾರೆ ಎಂದು ಡಿಸಿ ತಿಳಿಸಿದರು. ಹೊಸೂರು ಡಿಎಸ್ಪಿ ಬಾಲಕೃಷ್ಣನ್​, ಹೊಸೂರು ಆರ್​ಟಿಒ ಈಶ್ವರಮೂರ್ತಿ ಇದ್ದರು.
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net