ಅಧಿಕಾರಿಯ ನಡೆ ಸಂಶಯಕ್ಕೆ ಎಡೆ

ಕಮರ್ಷಿಯಲ್ ಸಿಲಿಂಡರ್ ಬಳಸದ ಗುತ್ತಿಗೆದಾರ: ಜಲದಾರಿ ಯೋಜನೆಯ ಪೈಪ್‌ಲೈನ್ ಕಾಮಗಾರಿ ಪಟ್ಟಣದ ದೇವರಹಿಪ್ಪರಗಿ ಮುಖ್ಯ ರಸ್ತೆಯಲ್ಲಿ ಪೈಪ್ ಜೋಡಣೆಗೆ ವೆಲ್ಡಿಂಗ್ ಮಾಡಲು ಕಮರ್ಷಿಯಲ್ ಸಿಲಿಂಡರ್ ಬಳಕೆ ಮಾಡುವುದನ್ನು ಬಿಟ್ಟು ಅಕ್ರಮವಾಗಿ ದೇಶದೆಲ್ಲೆಡೆ ಸಿಲಿಂಡರ್ ಸಿಗದೇ ಜನರು ಪರದಾಡುವ ಸಂದಿಗ್ಧ ಪರಿಸ್ಥಿತಿಯಲ್ಲಿ ಜಿವಿಪಿಆರ್ ಕಂಪನಿಯ ಗುತ್ತಿಗೆದಾರರು ಪೈಪ್‌ಲೈನ್ ಜೋಡಣೆಗೆ ಗೃಹ ಬಳಕೆ ಸಿಲಿಂಡರ್‌ನಿಂದ ವೆಲ್ಡಿಂಗ್ ಮಾಡಲು ಮುಂದಾಗಿದ್ದಾರೆ.

ದೂರು ನೀಡಿದರೂ ಅಧಿಕಾರಿಯಿಂದ ಕ್ರಮವಿಲ್ಲ: ಜಿವಿಪಿಆರ್ ಪೈಫ್‌ಲೈನ್ ಕಾಮಗಾರಿಗೆ ವೆಲ್ಡಿಂಗ್ ಮಾಡಲು ಗೃಹ ಬಳಕೆ ಸಿಲಿಂಡರ್ ಬಳಕೆ ಮಾಡುತ್ತಿರುವ ಮಾಹಿತಿಯನ್ನು ಸಾಮಾಜಿಕ ಕಾರ್ಯಕರ್ತ ಮಲ್ಲಿಕಾರ್ಜುನ ಆನೇಸೂರ ಎಂಬುವವರು ತಾಲೂಕು ಆಹಾರ ನಿರೀಕ್ಷಕಿ ಆರ್.ಎ. ಖಾದಿಂ ಅವರಿಗೆ ನೀಡಿದರೂ ಅವರು ಸ್ಥಳಕ್ಕೆ ಆಗಮಿಸಲಿಲ್ಲವಂತೆ. ಇದರಿಂದ ಬೇಸತ್ತ ಸಾಮಾಜಿತ ಕಾರ್ಯಕರ್ತ ಮೇಲಾಧಿಕಾರಿಗೆ ದೂರಿದ್ದಾರೆ.

ಆಗ ಆಹಾರ ನಿರೀಕ್ಷಕಿ ಸ್ಥಳಕ್ಕೆ ಆಗಮಿಸಿದರೂ, ನಾಮ್ ಕೇ ವಾಸ್ತೆ ತನಿಖೆ ನಡೆಸಿ, ಅನ್ಯ ಕೆಲಸಕ್ಕೆ ಗೃಹ ಬಳಕೆ ಸಿಲಿಂಡರ್ ಬಳಸುತ್ತಿದ್ದರೂ ಸಂಬಂಧಿತರ ಮೇಲೆ ಯಾವುದೇ ಕ್ರಮ ತೆಗೆದುಕೊಳ್ಳದಿರುವುದು ಸಾರ್ವಜನಿಕರ ಆಕ್ರೋಶಕ್ಕೆ ಕಾರಣವಾಗಿ, ಅಧಿಕಾರಿಯ ಮೇಲೆ ಸಂಶಯ ಪಡುವಂತಾಗಿದೆ ಎಂದು ಸಾಮಾಜಿಕ ಕಾರ್ಯಕರ್ತ ಎಂದು ಆರೋಪಿಸಿದ್ದಾರೆ.

ತಾಳಿಕೋಟೆಯಲ್ಲಿ ಪೈಪ್‌ಲೈನ್‌ಗೆ ವೆಲ್ಡಿಂಗ್ ಮಾಡಲು ಗೃಹ ಬಳಕೆ ಸಿಲಿಂಡರ್ ಬಳಕೆ ಮಾಡಿರುವುದು ಗಮನಕ್ಕೆ ಬಂದಿದೆ. ಆಹಾರ ನಿರೀಕ್ಷಕರು ಸ್ಥಳಕ್ಕೆ ಹೋಗಿ ಕ್ರಮ ಜರುಗಿಸಲು ಸೂಚನೆ ನೀಡಿದ್ದೆ. ಆದರೂ ಗ್ಯಾಸ್ ಸಿಲಿಂಡರ್ ಜಪ್ತಿ ಮಾಡಿ ಕ್ರಮ ಕೈಗೊಳ್ಳದೆ ಗ್ಯಾಸ್ ಸಿಲಿಂಡರ್ ಬಿಟ್ಟು ಬಂದಿರುವುದು ಸರಿಯಲ್ಲ. ಅವರಿಗೆ ಶೋಕಾಸ್ ನೋಟಿಸ್ ಜಾರಿಮಾಡಿ ಅವರ ಮೇಲೆ ಸೂಕ್ತ ಕಾನೂನು ಕ್ರಮ ಕೈಗೊಳ್ಳುತ್ತೇನೆ.

ವಿನಯಕುಮಾರ ಪಾಟೀಲ, ಉಪ ನಿರ್ದೇಶಕರು, ಜಿಲ್ಲಾ ಆಹಾರ ಮತ್ತು ನಾಗರಿಕ ಪೂರೈಕೆ ಇಲಾಖೆ, ವಿಜಯಪುರ.