ಒಗ್ಗಟ್ಟಿನ ಮಂತ್ರ: ನದಿ ಜೋಡಣೆಗೆ ಒಮ್ಮತ

ಕರ್ನಾಟಕ, ಆಂಧ್ರಪ್ರದೇಶ ಹಾಗೂ ತೆಲಂಗಾಣದ ಜೀವನಾಡಿ ತುಂಗಭದ್ರಾ ಜಲಾಶಯವು ಗುರುವಾರ ಐತಿಹಾಸಿಕ ಕ್ಷಣಕ್ಕೆ ಸಾಕ್ಷಿಯಾಯಿತು. ಜಲಾಶಯದ ಹೂಳಿಗೆ ನದಿ ಜೋಡಣೆಯೇ ಸೂಕ್ತ ಪರಿಹಾರವೆಂಬ ಕೇಂದ್ರದ ಸಲಹೆಗೆ ಮೂರೂ ರಾಜ್ಯಗಳ ಮುಖ್ಯಮಂತ್ರಿಗಳು ಒಮ್ಮತದ ಸಮ್ಮತಿ ಸೂಚಿಸಿ, ಅನುಷ್ಠಾನದ ವಾಗ್ದಾನ ಮಾಡಿರುವುದು ಸ್ವಾಗತಾರ್ಹ. 133 ಟಿಎಂಸಿ ಅಡಿ ಜಲಸಂಗ್ರಹ ಸಾಮರ್ಥ್ಯದ ತುಂಗಭದ್ರಾ ಜಲಾಶಯದಲ್ಲಿ ಸದ್ಯ 28 ಟಿಎಂಸಿ ಹೂಳು ತುಂಬಿದೆ ಎಂಬುದು ಸಮಸ್ಯೆಯ ತೀವ್ರತೆಗೆ ಸಾಕ್ಷಿಯಾಗಿದೆ. ಕರ್ನಾಟಕದ ಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್, ಆಂಧ್ರಪ್ರದೇಶದ ಮುಖ್ಯಮಂತ್ರಿ ಎನ್.ಚಂದ್ರಬಾಬು ನಾಯ್ಡು, ತೆಲಂಗಾಣ ಮುಖ್ಯಮಂತ್ರಿ ರೇವಂತ್ ರೆಡ್ಡಿ ಕ್ರಸ್ಟ್ಗೇಟ್​ಗಳ ಲೋಕಾರ್ಪಣೆ ವೇಳೆ ಒಂದೇ ವೇದಿಕೆ ಹಂಚಿಕೊಂಡು ಮಹತ್ವದ ನಿರ್ಧಾರ ಘೋಷಿಸಿರುವುದು, ಒಕ್ಕೂಟ ವ್ಯವಸ್ಥೆಯಲ್ಲಿ ಉತ್ತಮ ಬೆಳವಣಿಗೆ. 

ನದಿ ಜೋಡಣೆಯ ಯೋಜನೆಗೆ ಕೇಂದ್ರ ಸರ್ಕಾರದಿಂದ ತಾಂತ್ರಿಕ ಸಹಕಾರ ಸಿಗಲಿದೆ. ತುಂಗಭದ್ರಾ ಡ್ಯಾಂನ ಮೇಲ್ಭಾಗದ ನವಲಿ ಬಳಿ ಹೊಸದಾಗಿ ಸಮನಾಂತರ ಜಲಾಶಯವನ್ನು ನಿರ್ವಿುಸಿ, ಪ್ರವಾಹದ ಸಮಯದಲ್ಲಿ ವ್ಯರ್ಥವಾಗಿ ಹರಿದುಹೋಗುವ ನೀರನ್ನು ಅಲ್ಲಿ ಸಂಗ್ರಹಿಸುವುದು ಮತ್ತು ಅದನ್ನು ನದಿ ಜೋಡಣೆ ಪ್ರಕ್ರಿಯೆಗೆ ಬಳಸುವುದು ಈ ಯೋಜನೆಯ ಪ್ರಮುಖ ಭಾಗವಾಗಿದೆ. ಗೋದಾವರಿ-ಕಾವೇರಿ ನದಿ ಜೋಡಣೆಯಾದರೆ ಕರ್ನಾಟಕ, ಆಂಧ್ರಪ್ರದೇಶ, ತೆಲಂಗಾಣ ಮತ್ತು ತಮಿಳುನಾಡು ರಾಜ್ಯಗಳಿಗೆ ದೀರ್ಘಕಾಲಿನ ಪ್ರಯೋಜನ ಸಿಗಲಿದೆ.

ದೇಶದ ಬಹುತೇಕ ಜಲಾಶಯಗಳಲ್ಲಿ ಶೇಕಡ 15ಕ್ಕಿಂತಲೂ ಹೆಚ್ಚು ಹೂಳು ತುಂಬಿಕೊಂಡಿದ್ದು, ನೀರು ಸಂಗ್ರಹಣಾ ಸಾಮರ್ಥ್ಯ ಕುಸಿದಿದೆ. ಈ ಸಮಸ್ಯೆಯ ಪರಿಹಾರಕ್ಕಾಗಿ ಕೇಂದ್ರ ಸರ್ಕಾರ ಬೃಹತ್ ಯೋಜನೆಯನ್ನು ಸಿದ್ಧಪಡಿಸುತ್ತಿದ್ದು, ಶೀಘ್ರದಲ್ಲೇ ಪ್ರಕಟಿಸಲಿದೆ ಎಂದು ಕೇಂದ್ರ ಜಲಶಕ್ತಿ ಖಾತೆ ಸಚಿವ ಸಿ.ಆರ್.ಪಾಟೀಲ್ ಹೇಳಿದ್ದಾರೆ. ತುಂಗಭದ್ರಾ ಜಲಾಶಯದಲ್ಲಿ ತುಂಬಿರುವ ಹೂಳನ್ನು ತೆಗೆಯುವ ಯೋಜನೆ ಯಶಸ್ವಿಯಾದರೆ, ಈ ಜಲಾಶಯದ ನೀರು ಸಂಗ್ರಹಣಾ ಸಾಮರ್ಥ್ಯ ಶೇ.25ರಿಂದ 30ರಷ್ಟು ಹೆಚ್ಚಿಸಬಹುದು. ಸದ್ಯ ಜಲಾಶಯದಲ್ಲಿ 28 ಟಿಎಂಸಿ ಹೂಳು ತುಂಬಿರುವುದರಿಂದ ನೀರಿನ ಸಂಗ್ರಹಣಾ ಸಾಮರ್ಥ್ಯ ಕಡಿಮೆಯಾಗಿದೆ. ನದಿ ಜೋಡಣೆ ಮತ್ತು ಸಮನಾಂತರ ಜಲಾಶಯದ ನಿರ್ವಣದಿಂದಾಗಿ, ಹೂಳಿನಿಂದಾಗಿ ನಷ್ಟವಾಗಿರುವ 28 ಟಿಎಂಸಿ ನೀರಿನ ಸಂಗ್ರಹಣಾ ಸಾಮರ್ಥ್ಯವನ್ನು ಬೇರೆಡೆ ಸರಿದೂಗಿಸಲು ಸಾಧ್ಯವಾಗುತ್ತದೆ.

ಮಳೆಗಾಲದಲ್ಲಿ ಪ್ರವಾಹ ಬಂದಾಗ ಹೂಳಿನ ಕಾರಣದಿಂದಾಗಿ ಡ್ಯಾಂ ಬೇಗನೆ ಭರ್ತಿಯಾಗಿ ನೀರನ್ನು ನದಿಗೆ ಹರಿಸಬೇಕಾಗುತ್ತದೆ. ನದಿ ಜೋಡಣೆಯು ಈ ಹೆಚ್ಚುವರಿ ನೀರನ್ನು ಬೇರೆಡೆಗೆ ತಿರುಗಿಸಲು ಸಹಾಯ ಮಾಡುತ್ತದೆ, ಇದರಿಂದ ತುಂಗಭದ್ರಾ ಡ್ಯಾಂ ಮೇಲಿನ ಒತ್ತಡ ಕಡಿಮೆಯಾಗುತ್ತದೆ. ಮೂರೂ ರಾಜ್ಯಗಳ ನಡುವೆ ನೀರು ಹಂಚಿಕೆಗೆ ಸಂಬಂಧಿಸಿದಂತೆ ಉದ್ಭವಿಸುತ್ತಿದ್ದ ವಿವಾದಗಳು ಮತ್ತು ಅಸಮಾಧಾನಗಳು ಈ ಯೋಜನೆಯಿಂದ ಶಾಶ್ವತವಾಗಿ ಬಗೆಹರಿಯಲಿವೆ. ಅಲ್ಲದೆ, ನದಿ ಜೋಡಣೆಯು ಅಂತರರಾಜ್ಯ ವಿಷಯವಾಗಿರುವುದರಿಂದ ಕೇಂದ್ರ ಸರ್ಕಾರದ ಪಾತ್ರ ಅತ್ಯಂತ ನಿರ್ಣಾಯಕವಾಗಿದೆ. ರಾಷ್ಟ್ರೀಯ ಜಲ ಅಭಿವೃದ್ಧಿ ಸಂಸ್ಥೆ ಮತ್ತು ಕೇಂದ್ರ ಜಲ ಆಯೋಗ ಮೂಲಕ ತಾಂತ್ರಿಕ ನೀಲಿನಕ್ಷೆ ಸಿದ್ಧಪಡಿಸಲು ಮತ್ತು ರಾಜ್ಯಗಳ ನಡುವೆ ಯಾವುದೇ ಕಾನೂನಾತ್ಮಕ ತೊಡಕುಗಳು ಬಾರದಂತೆ ಸಮನ್ವಯ ಸಾಧಿಸಲು ಕೇಂದ್ರ ಪರಿಣಾಮಕಾರಿ ಪಾತ್ರ ವಹಿಸಲಿ.