ಕೇವಲ ಘೊಷಣೆಗಳ ಆರ್ಭಟಕ್ಕೆ ಅಥವಾ ಪುನರಪಿ ಟೀಕೆಗೆ ಸೀಮಿತವಾದ ತಂತ್ರಕ್ಕೆ ಮೊರೆಹೋಗದೆ, ಸರ್ಕಾರದ ಕಾರ್ಯಾಚರಣೆಯ ಸಾಂಪ್ರದಾಯಿಕ ವರಸೆಯನ್ನು ಆಮೂಲಾಗ್ರವಾಗಿ ಬದಲಿಸಿಕೊಳ್ಳುವ ನಿಟ್ಟಿನಲ್ಲಿ ಹೆಜ್ಜೆ ಇಡುತ್ತಿರುವುದು ಭವಿಷ್ಯದ ಸ್ಥಿತ್ಯಂತರದ ದಿಕ್ಸೂಚಿಯಂತೆ ಕಾಣಿಸುತ್ತಿದೆ. ಇತ್ತೀಚಿನ ದಿನಗಳಲ್ಲಿ ಕಂಡುಬರುತ್ತಿದ್ದ ಸಂಘರ್ಷಾತ್ಮಕ ರಾಜಕಾರಣಕ್ಕೆ ಸದ್ದಿಲ್ಲದೆ ಬ್ರೇಕ್ ಹಾಕಿರುವುದು ಇಲ್ಲಿ ಎದ್ದು ಕಾಣುವ ಪ್ರಮುಖ ಬದಲಾವಣೆ. ಕೇಂದ್ರ ಸರ್ಕಾರದೊಂದಿಗೆ ಅಥವಾ ನೆರೆಹೊರೆಯ ರಾಜ್ಯಗಳ ಜತೆ ಅನಗತ್ಯ ಹಗ್ಗಜಗ್ಗಾಟಕ್ಕೆ ಇಳಿಯದೆ, ಒಕ್ಕೂಟ ವ್ಯವಸ್ಥೆಯ ಚೌಕಟ್ಟಿನಲ್ಲಿ ವಿಶ್ವಾಸದ ಸೇತು ನಿರ್ವಿುಸುವ ಲೆಕ್ಕಾಚಾರ ಹೊಸ ಮುಖ್ಯಮಂತ್ರಿಯವರದ್ದಾಗಿದೆ. ಇದಕ್ಕೆ ಒಂದಷ್ಟು ಹಸಿ ಉದಾಹರಣೆಗಳೂ ಕಂಡುಬಂದಿವೆ. ಸಂಘರ್ಷದಿಂದ ರಾಜ್ಯದ ಹಿತಾಸಕ್ತಿಗಳು ಬಲಿಯಾಗುವುದಕ್ಕಿಂತ, ಮಾತುಕತೆಯ ಮುತ್ಸದ್ದಿತನದಿಂದ ರಾಜ್ಯದ ನ್ಯಾಯಸಮ್ಮತ ಅಪೇಕ್ಷೆಗಳನ್ನು ಈಡೇರಿಸಿಕೊಳ್ಳುವ ಪ್ರಾಯೋಗಿಕ ತಂತ್ರಗಾರಿಕೆ ಇದರ ಹಿಂದೆ ಅಡಗಿದೆ ಎಂಬ ವಿಶ್ಲೇಷಣೆಗಳಿವೆ.
