ಟೋಲ್​ ಶುಲ್ಕಕ್ಕೆ ತಾತ್ಕಾಲಿಕ ತಡೆ Toll

ದಾಬಸ್​ಪೇಟೆ &ಮಧುಗಿರಿ ಎಸ್​.ಎಚ್​.3 ರಸ್ತೆಯಾಗಿದೆ. ಇದು ಕೆಆರ್​ಡಿಸಿಎಲ್​ ಮತ್ತು ಎಸ್​ಟಿಆರ್​ಆರ್​ಗೆ ಸಂಬಂಧಿಸಿದ್ದಾಗಿದೆ. ಈ ರಸ್ತೆ ಅಭಿವೃದ್ಧಿಗೊಂಡು ಐದಾರು ವರ್ಷಗಳೇ ಕಳೆದಿವೆ.

ಇಂತಹ ದುರಾವಸ್ಥೆಯಿಂದ ಕೂಡಿರುವ ರಸ್ತೆಗೆ ನಿಜಗಲ್​&ಕೆಂಪೋಹಳ್ಳಿ ಬಳಿಯ ಟೋಲ್​ನಲ್ಲಿ ಮಾಡುತ್ತಿರುವ ಶುಲ್ಕ ಸಂಗ್ರಹವನ್ನು ಕೈಬಿಡಬೇಕು ಎಂದು ಒತ್ತಾಯಿಸಿ ಸ್ಥಳಿಯ ನಾಗರಿಕರು ಕೆಶಿಪ್​ ಟೋಲ್​ ಅಧಿಕಾರಿಗೆ ಮಂಗಳವಾರ ಮನವಿ ಸಲ್ಲಿಸಿದರು.

ಕರವೇ ಜಿಲ್ಲಾಧ್ಯಕ್ಷ ನರಸೀಪುರದ ವಿಶ್ವನಾಥ್​ ಬಾಬು ಮಾತನಾಡಿ, ನೆಲಮಂಗಲ ತಾಲೂಕಿನ ಸೋಂಪುರ ಹೋಬಳಿಯ ಬಸವಪಟ್ಟಣದಿಂದ ನರಸೀಪುರದವರಿಗೂ ಸುಮಾರು 20ರಿಂದ 25 ಕಿ.ಮೀ ರಸ್ತೆ ಇದೆ. ಆದರೆ, ಟೋಲ್​ ಸಂಗ್ರಹ ಮಾಡುವವರು ರಸ್ತೆ ದುರಸ್ತಿ ಮಾಡದೆ ಟೋಲ್​ ಸಂಗ್ರಹಕ್ಕೆ ಮುಂದಾಗಿದ್ದಾರೆ ಎಂದು ಆಕ್ರೋಶ ವ್ಯಕ್ತಪಡಿಸಿದರು.

ಸ್ಥಳಿಯರಿಗೆ ಯಾವುದೇ ರಿಯಾಯಿತಿ ನೀಡದಿರುವುದು ಆಕ್ರೋಶಕ್ಕೆ ಮೂಲ ಕಾರಣವಾಗಿದೆ. ರಸ್ತೆ ಗುಂಡಿಗಳಿಂದ ಕೂಡಿದೆ. ಗುಣಮಟ್ಟ ಕೇಳುವಂತಿಲ್ಲ. 24*7 ಆಂಬುಲೆನ್ಸ್​, ಪೆಟ್ರೋಲಿಂಗ್​ ವಾಹನ, ಕ್ರೇನ್​ಸೇವೆಗಳು, ಅಪಘಾತ ಸಮಯದಲ್ಲಿ ತಕ್ಷಣ ನೆರವು, ಶೌಚಗೃಹ ಮತ್ತು ನೀರಿನ ವ್ಯವಸ್ಥೆ, ಇದ್ಯಾವುದೂ ಇಲ್ಲ. ಸ್ಥಳಿಯ ರಿಯಾಯಿತಿಯಂತೆ 20 ಕಿ.ಮೀ ಒಳಗಿನವರಿಗೆ ಉಚಿತ ಪ್ರವೇಶ ಇಲ್ಲವೆ, ಕನಿಷ್ಠ ಶುಲ್ಕದ ಪಾಸ್​ ವ್ಯವಸ್ಥೆ ಮಾಡಬೇಕು ಎಂದು ಆಗ್ರಹಿಸಿದರು.

ಮನವಿ ಸ್ವೀಕರಿಸಿದ ಕೆಶಿಪ್​ ಅಧಿಕಾರಿ ಶಿವಕುಮಾರ್​ ಮಾತನಾಡಿ, ಎಲ್ಲ ವ್ಯವಸ್ಥೆಯನ್ನು ಕಲ್ಪಿಸಿ ಸುಮಾರು 25 ಕಿ.ಮೀ ರಸ್ತೆ ಅಭಿವೃದ್ಧಿಪಡಿಸಲಾಗುವುದು. ಸ್ಥಳಿಯರ ಸಂಚಾರಕ್ಕೆ ಸುಮಾರು 20 ಕಿ.ಮೀ ಅನುಮತಿ ನೀಡಿದ ನಂತರ ಎಲ್ಲ ಸಮಸ್ಯೆಗಳನ್ನು ಸರಿಪಡಿಸಲಾಗುವುದು ಎಂದರು.

ನಿಜಗಲ್​&ಕೆಂಪೋಹಳ್ಳಿ ಟೋಲ್​ನಲ್ಲಿ ಯಾವುದೇ ಅನುಕೂಲಗಳು ಇಲ್ಲ ಎಂಬುದು ಸ್ಥಳಿಯರ ಹೋರಾಟಕ್ಕೆ ಮುಖ್ಯ ಕಾರಣವಾಗಿದೆ ಎಂದು ಗ್ರಾಪಂ ಸದಸ್ಯ ಲೋಕೇಶ್​ ದೂರಿದರು.

ಶುಲ್ಕ ಪಾವತಿ ಪಡೆಯಬೇಕಾದರೆ ಸಾಕಷ್ಟು ನಿಯಮಗಳನ್ನು ಪಾಲಿಸಬೇಕು ಮತ್ತು ಹತ್ತಾರು ಅನುಕೂಲಗಳನ್ನು ಕಲ್ಪಿಸಬೇಕು. ಮುಖ್ಯವಾಗಿ ಸ್ಥಳಿಯರಿಗೆ ಪ್ರವೇಶ ಉಚಿತ ಇಲ್ಲವೆ, ಕನಿಷ್ಠ ಹಣ ಪಡೆಯಬೇಕು ಎಂಬ ನಿಯಮವಿದೆ. ಆದರೆ, ನಿಜಗಲ್​ ಕೆಂಪೋಹಳ್ಳಿ ಟೋಲ್​ಗೇಟ್​ ಒಮ್ಮೆ ದಾಟಬೇಕಾದರೆ 35 ರೂಪಾಯಿ ಶುಲ್ಕ ಪಾವತಿ ಮಾಡಬೇಕು. ನಾವು ಹತ್ತಾರು ಬಾರಿ ಗೇಟ್​ ದಾಟಿ ವ್ಯವಹಾರಕ್ಕೆ ಹೋಗಲೇಬೇಕು. ಪ್ರತಿ ಬಾರಿಯೂ ಹಣ ನೀಡಬೇಕಾ? ನಮ್ಮ ಜಮೀನನ್ನು ರಸ್ತೆ ಅಭಿವೃದ್ಧಿಗೆ ನೀಡಿದ್ದೇವೆ.ಅದಕ್ಕೆ ಪರಿಹಾರವಾಗಿ ಕನಿಷ್ಠ ಹಣ ಪಡೆದಿದ್ದೇವೆ. ಈಗ ನಾವು ಸಹ ಶುಲ್ಕ ನೀಡುವ ದುರ್ಗತಿ ಬಂದಿದೆ ಎಂದು ಬೇಸರ ವ್ಯಕ್ತಪಡಿಸಿದರು.

ಗ್ರಾಪಂ ಸದಸ್ಯರಾದ ಲೋಕೇಶ್​, ಹನುಮಯ್ಯ, ಮುಖಂಡರಾದ ಹರೀಶ್​, ಗಂಗರಾಜು, ಬಿಜೆಪಿ ಕುಮಾರಣ್ಣ, ಸುರೇಂದ್ರ, ಪ್ರಕಾಶ್​, ಮಾಕೇನಹಳ್ಳಿ ವೀರಣ್ಣ, ಬೈರೇಗೌಡ ಇದ್ದರು.