ಡಿಸಿಸಿ ಬ್ಯಾಂಕ್​ ಹಗರಣ ಸಿಬಿಐಗೆ ನೀಡಲು ಸುಪ್ರೀಂ ತಡೆ

ಪ್ರವಾಸಿ ಮಂದಿರದಲ್ಲಿ ಗುರುವಾರಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಸಹಕಾರ ಸಂಘಗಳ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ, ಡಿಸಿಸಿ ಬ್ಯಾಂಕ್​ನ ವ್ಯವಸ್ಥಾಪಕರು, ಮೇಲ್ವಿಚಾರಕರು ಹಾಗೂ ಮಾಜಿ ಅಧ್ಯಕ್ಷರು ಪರಸ್ಪರ ಕೈಜೋಡಿಸಿ ಮಹಿಳಾ ಸ್ವಸಹಾಯ ಸಂಘಗಳ ಹೆಸರಿನಲ್ಲಿ ನಕಲಿ ದಾಖಲೆ ಸೃಷ್ಟಿಸಿ ಸಾಲ ಪಡೆದು ಕೆಲವರು ಮರುಪಾವತಿ ಮಾಡದೆ ವಂಚಿಸಿದ್ದಾರೆ ಎಂದು ಆರೋಪಿಸಿದರು.

ಈ ಸಂಬಂಧ ಬಟ್ಲಹಳ್ಳಿ, ಕೆಂಚಾರ್ಲಹಳ್ಳಿ ಹಾಗೂ ಚಿಂತಾಮಣಿ ಗ್ರಾಮಾಂತರ ಠಾಣೆಗಳಲ್ಲಿ ಆರು ಹಾಗೂ ಶ್ರೀನಿವಾಸಪುರ ತಾಲೂಕಿನ ರಾಯಲ್ಪಾಡು ಠಾಣೆಯಲ್ಲಿ ಒಂದು ಸೇರಿ ಒಟ್ಟು 7 ಎಫ್​ಐಆರ್​ಗಳು 2025ರ ಮಾರ್ಚ್​ನಲ್ಲಿ ದಾಖಲಾಗಿವೆ. ಭೂಮಿಶೆಟ್ಟಿಹಳ್ಳಿ ಸಂಘದಲ್ಲಿ ಮಹಿಳಾ ಸಂಘಗಳಿಗೆ ನೀಡಲಾದ ಸಾಲಗಳನ್ನು ನಿಗದಿತ ಉದ್ದೇಶಕ್ಕೆ ಬಳಸಲಾಗಿಲ್ಲ. ನಿಯಮಾನುಸಾರ ಸಾಲ ವಿತರಣೆ ನಡೆದಿಲ್ಲ ಎಂಬುದು ಮೇಲ್ನೋಟಕ್ಕೆ ಸ್ಪಷ್ಟವಾಗಿದೆ ಎಂದ ಅವರು, ಆರಂಭದಲ್ಲಿ ಹೈಕೋರ್ಟ್​ನಿಂದ ಎಫ್​ಐಆರ್​ಗೆ ತಡೆಯಾಜ್ಞೆ ಪಡೆದಿದ್ದರು.

ನಂತರ ಸುದೀರ್ಘ ವಿಚಾರಣೆ ಬಳಿಕ ಹೈಕೋರ್ಟ್​ ತಡೆಯಾಜ್ಞೆ ತೆರವುಗೊಳಿಸಿತ್ತು. ಕೋಟ್ಯಂತರ ರೂ. ದುರುಪಯೋಗದ ಗಂಭೀರ ಆರೋಪ ಇರುವ ಹಿನ್ನೆಲೆ ಪ್ರಕರಣದ ತನಿಖೆಯನ್ನು ಸಿಐಡಿಗೆ ವರ್ಗಾಯಿಸಲಾಗಿದೆ ಎಂದರು.

ಸಿಐಡಿ ತನಿಖೆಗೆ ಅಗತ್ಯವಿರುವ ಸಾಲದ ಕಡತ ಹಾಗೂ ಪ್ರಮುಖ ದಾಖಲೆಗಳನ್ನು ನೀಡದೆ ಹಗರಣಗಳ ಆರೋಪದ ನಡುವೆ ಸುಪ್ರೀಂಕೋರ್ಟ್​ನಿಂದ ತಡೆಯಾಜ್ಞೆ ತರಲಾಗಿದೆ. ಸಹಕಾರ ಸಂಘಗಳಲ್ಲಿ ತಿಂಗಳಿಗೆ ಕೇವಲ 15 ರಿಂದ 30 ಸಾವಿರ ರೂ.ವರೆಗೂ ಸಂಬಳ ಪಡೆಯುವ ಬೈರಾರೆಡ್ಡಿ ಹಾಗೂ ವೆಂಕಟೇಶ್​ಮೂರ್ತಿ ಮತ್ತಿತರರು ಹೈಕೋರ್ಟ್​ ಅಲ್ಲದೇ ಸುಪ್ರೀಂ ಕೋರ್ಟ್​ನಿಂದಲೂ ತಡೆಯಾಜ್ಜೆ ತಂದಿದ್ದು, ಇಷ್ಟು ದೊಡ್ಡಮಟ್ಟದ ಕಾನೂನು ಹೋರಾಟ ನಡೆಸಲು ಅವರು ಎಲ್ಲಿಂದ ಹಣ ಪಡೆಯುತ್ತಿದ್ದಾರೆ ಎಂಬುದನ್ನು ತನಿಖೆಗೆ ಒಳಪಡಿಸಬೇಕು ಎಂದು ಆಗ್ರಹಿಸಿದರು.

ಬಡ ಮಹಿಳೆಯರಿಗೆ ನ್ಯಾಯ ದೊರಕಿಸುವುದರ ಜತೆಗೆ ಡಿಸಿಸಿ ಬ್ಯಾಂಕ್​ನ ಹಿತಾಸಕ್ತಿ ಕಾಪಾಡಲು ಸಿಐಡಿ ತನಿಖೆ ಮುಂದುವರಿಯುವುದು ಅತ್ಯಗತ್ಯವಾಗಿದೆ ಎಂದರುವ ಪ್ರತಾಪ್​ ಕುಮಾರ್​, ಸುಪ್ರೀಂ ಕೋರ್ಟ್​ನಲ್ಲಿ ಸಮರ್ಥವಾಗಿ ವಾದ ಮಂಡಿಸಿ, ಪ್ರಸ್ತುತ ಇರುವ ತಡೆಯಾಜ್ಞೆಯನ್ನು ತೆರವುಗೊಳಿಸಲು ಕಾನೂನು ಹೋರಾಟ ಮುಂದುವರಿಸಲಾಗುವುದು ಎಂದರು.