ಸಕಾಲಕ್ಕೆ ಕಬ್ಬು ಅರೆಯದೆ ಸಂಕಷ್ಟ

ಕೊಳ್ಳೇಗಾಲ:

ತಾಲೂಕಿನ ಕುಂತೂರು ಬಣ್ಣಾರಿ ಅಮ್ಮನ್ ಸಕ್ಕರೆ ಕಾರ್ಖಾನೆ ಯೂನಿಟ್-3 ರಲ್ಲಿ ಕಟಾವು ಮಾಡಿದ ಕಬ್ಬನ್ನು ಸಕಾಲಕ್ಕೆ ಅರೆಯದ ಪರಿಣಾಮ ಕಬ್ಬಿನ ತೂಕ ಹಾಗೂ ಇಳುವರಿ ಕಡಿಮೆಯಾಗಿ ನಷ್ಟ ಉಂಟಾಗುತ್ತಿದೆ ಎಂದು ರೈತರು ಆಕ್ರೋಶ ಹೊರಹಾಕುತ್ತಿದ್ದಾರೆ.

ಜಮೀನಿನಲ್ಲಿ ಕಟಾವು ಮಾಡಿದ ಕಬ್ಬನ್ನು ಆರೇಳು ದಿನವಾದ ಬಳಿಕ ತೂಕ ಮಾಡಲಾಗುತ್ತಿದ್ದು, ಅಷ್ಟರಲ್ಲಾಗಲೇ ಕಬ್ಬು ಒಣಗಿ ತೂಕ ಕಡಿಮೆಯಾಗುವುದರ ಜತೆಗೆ ಇಳುವರಿ ಕುಗ್ಗುತ್ತಿದೆ. ಇದರಿಂದ ಈ ಭಾಗದ ರೈತರಿಗೆ ಸಾವಿರಾರೂ ರೂ. ನಷ್ಟವಾಗುತ್ತಿದೆ ಎಂಬುದು ರೈತರ ಆರೋಪ. ಕಬ್ಬನ್ನು ಕಟಾವು ಮಾಡಿದ ನಂತರ ಲಾರಿ ಮತ್ತು ಟ್ರ್ಯಾಕ್ಟರ್‌ಗಳಿಗೆ ಕಬ್ಬು ತುಂಬಿಕೊಳ್ಳುವ ಕಾರ್ಖಾನೆ ಅಧಿಕಾರಿಗಳು ತಕ್ಷಣವೇ ವೇಬ್ರಿಡ್ಜ್‌ನಲ್ಲಿ ತೂಕ ಮಾಡದೆ ಫ್ಯಾಕ್ಟರಿ ಮುಂಭಾಗ ನಿಲ್ಲಿಸಿಕೊಳ್ಳುತ್ತಿದ್ದಾರೆ. ಇದ್ದರಿಂದ ಅನ್ಯಾಯ ಆಗುತ್ತಿದೆ ಎಂಬುದು ರೈತರ ಅಳಲು.

ಕುಂತೂರು ಸಕ್ಕರೆ ಕಾರ್ಖಾನೆಯಲ್ಲಿ ದಿನಕ್ಕೆ 3500 ರಿಂದ 4500 ಟನ್‌ಗಳಷ್ಟು ಕಬ್ಬು ನುರಿಯುವ ಸಾಮರ್ಥ್ಯವಿದೆ. ಈ ನಡುವೆ ನಂಜನಗೂಡಿನಲ್ಲಿರುವ ಬಣ್ಣಾರಿ ಅಮ್ಮನ್ ಸಕ್ಕರೆ ಕಾರ್ಖಾನೆ ಯೂನಿಟ್-2 ನಿಂದ ಬರುವ ಕಬ್ಬನ್ನು ಕುಂತೂರು ಸಕ್ಕರೆ ಕಾರ್ಖಾನೆಯಲ್ಲಿ ಅರೆಯಲಾಗುತ್ತಿದೆ. ಇದರಿಂದ ಈ ಭಾಗದ ರೈತರ ಕಬ್ಬನ್ನು ಸಕಾಲಕ್ಕೆ ಅರೆಯಲು ತಡವಾಗುತ್ತಿದೆ.

ಪರಿಹಾರ ನೀಡಲು ಒತ್ತಾಯ:

ಕಬ್ಬು ಕಟಾವು ಬಳಿಕ ಹಸಿ ಸೋಗಿನಲ್ಲಿ ಕಬ್ಬನ್ನು ಕಟ್ಟಿ ಬ್ಯಾಡಿಂಗ್ ಮಾಡುವುದರಿಂದ ಕಾರ್ಖಾನೆ ವತಿಯಿಂದ ತೂಕದಲ್ಲಿ ತೊಂಡೆ ಮತ್ತು ಸೋಗು (ಶೇ.7ರಷ್ಟು ವೇಸ್ಟೇಜ್) ಕಳೆಯುತ್ತಾರೆ. ಇದರಿಂದ ಕನಿಷ್ಠ 1 ಟನ್ ಕಬ್ಬಿಗೆ 10 ಕೆಜಿ ಕಬ್ಬು ವ್ಯರ್ಥವಾಗುತ್ತದೆ. ಅದಲ್ಲದೆ, ಕಬ್ಬು ಕಟಾವು ಮಾಡಿಕೊಂಡ ಬಳಿಕ ಸಕಾಲಕ್ಕೆ ಅರೆಯದೆ ಆರೇಳು ದಿನವಾದರೂ ಲಾರಿಯಲ್ಲಿಯೇ ಫ್ಯಾಕ್ಟರಿ ಮುಂದೆ ನಿಲುಗಡೆ ಮಾಡಲಾಗುತ್ತಿದೆ. ಇದರಿಂದ ಕಬ್ಬು ಒಣಗಿ ಟನ್‌ಗಟ್ಟಲೇ ಕಬ್ಬಿನ ತೂಕ ಕಡಿಮೆಯಾಗುತ್ತದೆ. ಈ ನಷ್ಟವನ್ನು ಕಟ್ಟಿ ಕೊಡಿ ಎಂದು ಕಾರ್ಖಾನೆ ಅಧಿಕಾರಿಗಳನ್ನು ರೈತರು ಪ್ರಶ್ನೆ ಮಾಡುತ್ತಿದ್ದರೂ ಪ್ರಯೋಜನವಾಗುತ್ತಿಲ್ಲ. ಹಾಗಾಗಿ ಜಿಲ್ಲಾಡಳಿತ ರೈತರಿಗೆ ಆಗಿರುವ ನಷ್ಟಕ್ಕೆ ಪರಿಹಾರ ಕೊಡಿಸಬೇಕು ಎಂಬುದು ರೈತರ ಆಗ್ರಹ.