ದುಷ್ಪರಿಣಾಮ ಅರಿವು ಮೂಡಿಸಿದ ವಿದ್ಯಾರ್ಥಿಗಳು

ಸಿಂದಗಿ: ತಾಲೂಕಿನ ರಾಂಪೂರ ಪಿಎ ಗ್ರಾಮದಲ್ಲಿ ವಿಶ್ವ ತಂಬಾಕು ದಿನ ನಿಮಿತ್ತ ಭಾನುವಾರ ಭೀಮಾ ಯೂನಿವರ್ಸಲ್ ಸೆಂಟ್ರಲ್ ಸ್ಕೂಲ್‌ನ ವಿದ್ಯಾರ್ಥಿಗಳು ಕಿರು ನಾಟಕದ ಮೂಲಕ ತಂಬಾಕು ಉತ್ಪನಗಳಿಂದಾಗುವ ದುಷ್ಪರಿಣಾಮದ ಕುರಿತು ಜಾಥಾ ನಡೆಸಿ, ಜಾಗೃತಿ ಸಂದೇಶ ನೀಡಿದರು.

ವಿದ್ಯಾರ್ಥಿಗಳು ಕಿರು ನಾಟಕದ ಮೂಲಕ ತಂಬಾಕು ಉತ್ಪನ್ನಗಳ ಸೇವನೆಯಿಂದ ಕ್ಯಾನ್ಸರ್, ಹೃದಯರೋಗ, ಶ್ವಾಸಕೋಶದ ಸಮಸ್ಯೆ, ನರ ದೌರ್ಬಲ್ಯಕ್ಕೀಡಾಗುವ ಮತ್ತು ಸುತ್ತಲಿನ ಆರೋಗ್ಯಕರ ಪರಿಸರಕ್ಕೂ ಹಾನಿಯಾಗುವ ಬಗೆಯನ್ನು ಮಾರ್ಮಿಕವಾಗಿ ಪ್ರದರ್ಶಿಸಿದರು.

ಅದರಲ್ಲೂ ಯುವ ಪೀಳಿಗೆ ಸಿಗರೇಟ್, ಬೀಡಿ, ಗುಟ್ಕಾ ಹಾಗೂ ಪಾನ್ ಮಸಾಲಾಗಳ ಬಳಕೆಯಿಂದ ಎದುರಿಸುವ ಅನಾರೋಗ್ಯದ ಕುರಿತು ಅರಿವು ಮೂಡಿಸಿ, ಕಾಲೇಜು ಹಂತದಲ್ಲಿನ ವಿದ್ಯಾರ್ಥಿಗಳು ಡ್ರಗ್ಸ್ ಬಳಸುವುದು ಅವರ ಭವಿಷ್ಯಕ್ಕೆ ಮಾರಕ ಎಂಬ ಸಂದೇಶ ಸಾರಿ, ಯುವಕರು ದಾರಿ ತಪ್ಪದಂತೆ ಎಚ್ಚರಿಕೆ ವಹಿಸಬೇಕು. ತಂಬಾಕು ಉತ್ಪನ್ನಗಳ ಸೇವನೆಯನ್ನು ಬಿಡಬೇಕು ಎಂಬ ಅರಿವು ಮೂಡಿಸಿದರು.

ತಂಬಾಕು ಗುಟ್ಕಾ ಸೇವನೆ ಕುರಿತು ವಿದ್ಯಾರ್ಥಿ ಪವಿತ್ರಾ ಬಾಗೇವಾಡಿ ಹಾಡನ್ನು ಹಾಡಿದರು, ವಿದ್ಯಾರ್ಥಿನಿ ಪ್ರಿಯಾಂಕಾ ಚನ್ನಮಲ್ಲಪ್ಪಗೋಳ, ಭಕ್ತಿ ಭುವನ್ನವರ ನಿರೂಪಿಸಿದರು. ಶಿಕ್ಷಕ ಮಂಜುನಾಥ ಪಾಟೀಲ, ಸಂಜುಕುಮಾರ ರಾಠೋಡ, ನಾಗಭೂಷನ್ ಬಡೇಗಾರ, ರತ್ನಾ ಎನ್. ನಾಯ್ಕ, ವಿದ್ಯಾ ಪೂಜಾರಿ, ವಿದ್ಯಾರ್ಥಿಗಳು ಇತರರಿದ್ದರು.