ಕುಶಾಲನಗರ: ಮಾದಾಪುರದ ಶ್ರೀಮತಿ ಡಿ. ಚೆನ್ನಮ್ಮ ಜೂನಿಯರ್ ಕಾಲೇಜು, ಪ್ರೌಢಶಾಲಾ ವಿಭಾಗದಲ್ಲಿ 2003-04ರ ಸಾಲಿನಲ್ಲಿ 10ನೇ ತರಗತಿ ಮುಗಿಸಿ ಹೊರಬಂದಿದ್ದ ಹಳೇ ವಿದ್ಯಾರ್ಥಿಗಳ ಬಳಗದ ಪುನರ್ಮಿಲನ ಕಾರ್ಯಕ್ರಮ ಭಾನುವಾರ ಇಲ್ಲಿನ ರೆಸಾರ್ಟ್ ಒಂದರಲ್ಲಿ ನಡೆಯಿತು. ಗುರುವಂದನಾ ಹಾಗೂ ಸ್ನೇಹ ಸಮ್ಮಿಲನ ಹೆಸರಿನಲ್ಲಿ ಹಮ್ಮಿಕೊಂಡಿದ್ದ ಈ ಕಾರ್ಯಕ್ರಮದಲ್ಲಿ ಒಂದೇ ತರಗತಿಯಲ್ಲಿ ಕಲಿತಿದ್ದವರು 22 ವರ್ಷಗಳ ಬಳಿಕ ಒಂದೆಡೆ ಸೇರಿ ಹಳೇ ನೆನಪುಗಳಲ್ಲಿ ಮಿಂದೆದ್ದರು. ಗುರುಗಳಾದ ಶ್ರೀಧರ್ ಆರಾಧ್ಯ, ಶಂಕರಯ್ಯ, ರೇವತಿ, ರಾಜಸುಂದರಂ, ಸವಿತಾ ರಾಜಸುಂದರಂ, ಸೋಮಯ್ಯ, ಸತೀಶ್, ಮಂಜುಳಾ ಹಾಗೂ ಪಾಲಾಕ್ಷ ಅವರು ಕಾರ್ಯಕ್ರಮದಲ್ಲಿ ಹಾಜರಿದ್ದು ಶಿಷ್ಯರ ಸಾಧನೆಗಳಿಗೆ ಸಾಕ್ಷಿಯಾದರು.
