ಸ್ವಾಮೀಜಿ ಬಂಧನಕ್ಕೆ ತೀವ್ರ ಖಂಡನೆ, ಪರ-ವಿರೋಧ ಚರ್ಚೆ ಜೋರು, ತಾರಕಕ್ಕೇರಿದ ಮೆಡಿಕಲ್ ಕಾಲೇಜ್ ಹೋರಾಟ

ಸಚಿವ ಎಂ.ಬಿ. ಪಾಟೀಲರ ಕುಮ್ಮಕ್ಕಿನಿಂದ ಧರಣಿ ನಿರತರ ಮೇಲೆ ದೌರ್ಜನ್ಯ ಎಸಗಿದ ಪೊಲೀಸರ ಕ್ರಮ ಖಂಡನೀಯ. ಸ್ವಾಮೀಜಿಗಳ ಜೊತೆ ಅನುಚಿತವಾಗಿ ವರ್ತಿಸಿದ್ದು ಸರಿಯಲ್ಲ. ಕೂಡಲೇ ಸಿಎಂ ಸಿದ್ದರಾಮಯ್ಯ ಧರಣಿ ನಿರತರ ಕ್ಷಮೆ ಯಾಚಿಸಬೇಕೆಂದು ಪಂಚಮಸಾಲಿ ಸಮಾಜದ ಹಿರಿಯ ಮುಖಂಡ ಹಾಗೂ ರೈತ ಭಾರತ ಪಕ್ಷದ ರಾಜ್ಯಾಧ್ಯಕ್ಷ ಮಲ್ಲಿಕಾರ್ಜುನ ಕೆಂಗನಾಳ ಆಗ್ರಹಿಸಿದರು.

ಸರ್ಕಾರಿ ವೈದ್ಯಕೀಯ ಕಾಲೇಜು ಸ್ಥಾಪನೆಗೆ ಆಗ್ರಹಿಸಿ ನಡೆಯುತ್ತಿರುವ ಹೋರಾಟ ತಪ್ಪಲ್ಲ; ಆದರೆ, ಪೊಲೀಸರ ಮೇಲೆ ಕೈ ಎತ್ತಿದ್ದು ತಪ್ಪು. ಹೀಗಾಗಿ ತಪ್ಪಿತಸ್ಥರನ್ನು ಹೊರತುಪಡಿಸಿ ಉಳಿದ ಹೋರಾಟಗಾರರನ್ನು ಬಿಡುಗಡೆಗೊಳಿಸಬೇಕೆಂದು ಕಾಂಗ್ರೆಸ್ ಮುಖಂಡ, ಮಾಜಿ ಶಾಸಕ ರಾಜು ಆಲಗೂರ ಆಗ್ರಹಿಸಿದ್ದಾರೆ.

ಕೆಲವು ಸ್ವಾಮೀಜಿಗಳು ಕಾನೂನಿಗಿಂತ ತಾವೇ ಮೇಲು ಎಂಬಂತೆ ವರ್ತಿಸುತ್ತಿದ್ದಾರೆ. ಕಾಂಗ್ರೆಸ್ ಪಕ್ಷ ಸ್ವಾಮೀಜಿಗಳ ವಿರೋಧಿ ಎಂಬಂತೆ ಬಿಂಬಿಸುವ ಕೆಲಸವನ್ನು ಬಿಜೆಪಿ ಮಾಡುವುದು ಖಂಡನೀಯ. ಇತ್ತೀಚಿಗೆ ಬಬಲೇಶ್ವರದಲ್ಲಿ ಸ್ವಾಮೀಜಿಯೊಬ್ಬರ ಪರ ಸಮಾವೇಶ ಮಾಡಿದರು. ಇಲ್ಲೂ ಸಚಿವ ಎಂ.ಬಿ.ಪಾಟೀಲರನ್ನು ತಪ್ಪಿತಸ್ಥ ಸ್ಥಾನದಲ್ಲಿ ನಿಲ್ಲಿಸುವ ಕೆಲಸ ಬಿಜೆಪಿಯವರು ಮಾಡಿದರು. ಆದರೆ, ಕಾಂಗ್ರೆಸ್ ಪಕ್ಷ, ಸಚಿವರು ಹಿಂದೂಗಳು ಸೇರಿ ಎಲ್ಲ ಧರ್ಮಗಳು ಹಾಗೂ ಎಲ್ಲ ಸ್ವಾಮೀಜಿಗಳನ್ನು ಪ್ರೀತಿಸಿ ಗೌರವಿಸುತ್ತೇವೆ ಎಂದು ಸ್ಪಪ್ಟನೆ ನೀಡಿದರು.

‘ಧರಣಿ ವೇಳೆ ಪೊಲೀಸರು ಎದೆಗೆ ಹೊಡೆದಿದ್ದು ಪೆಟ್ಟಾಗಿದೆ. ಆಸ್ಪತ್ರೆಗೆ ದಾಖಲಿಸಿದ್ದಾರೆ. ಇನ್ನೂ ಚೇತರಿಕೆ ಕಂಡಿಲ್ಲ, ಆಗಲೇ ಬಿಡುಗಡೆಗೊಳಿಸುವುದಾಗಿ ವೈದ್ಯರು ಹೇಳುತ್ತಿದ್ದಾರೆ. ನನಗಂತೂ ನಿಲ್ಲಲಾಗುತ್ತಿಲ. ಅಶಕ್ತತೆ ಆವರಿಸಿದೆ. ಬಲವಂತವಾಗಿ ಹೊರಹಾಕಿದರೆ ಅದಕ್ಕೆ ಆಡಳಿತ ವ್ಯವಸ್ಥೆಯೇ ಜವಾಬ್ದಾರಿ’ ಎಂದು ಹೋರಾಟಗಾರ ಮಲ್ಲಿಕಾರ್ಜುನ ಬಟಗಿ ತಿಳಿಸಿದ್ದಾರೆ.

ಆಸ್ಪತ್ರೆಯಿಂದಲೇ ವಿಡಿಯೋ ಹೇಳಿಕೆ ಬಿಡುಗಡೆಗೊಳಿಸಿರುವ ಅವರು, ಆರೋಗ್ಯದಲ್ಲಿ ಚೇತರಿಕೆ ಇಲ್ಲ. ತೀವ್ರ ಪೆಟ್ಟಾಗಿದೆ. ಹೀಗಾಗಿ ಚಿಕಿತ್ಸೆ ಮುಂದುವರಿಸಭೇಕೆಂದು ಮನವಿ ಮಾಡಿದ್ದಾರೆ.