ಕುಲಾಲಿ ಸ್ಟೇಷನ್​ನಲ್ಲಿ ಎಲ್ಲ ರೈಲು ನಿಲ್ಲಿಸಿ

ನಿಂಬರ್ಗಾ : ಕುಲಾಲಿ ರೈಲ್ವೆ ಸ್ಟೇಷನ್​ನಲ್ಲಿ ಈ ಹಿಂದೆ ನಿಲ್ಲುತ್ತಿದ್ದ ಎಲ್ಲ ರೈಲುಗಳ ನಿಲುಗಡೆಗೆ ಕ್ರಮಕೈಗೊಳ್ಳಬೇಕು ಎಂದು ಅಧಿಕಾರಿಗಳಿಗೆ ಸಾಕಷ್ಟು ಬಾರಿ ಮನವಿ ಸಲ್ಲಿಸಿದರೂ ಪ್ರಯೋಜನವಾಗಿಲ್ಲ. ಹೀಗಾಗಿ ಅಧಿಕಾರಿಗಳ ನಿರ್ಲಕ್ಷ್ಯ ಖಂಡಿಸಿ ರೈಲು ರೋಕೊ ಹೋರಾಟ ಮಾಡಲಾಗುವುದು ಎಂದು ಮುಖಂಡ ಶಂಕರ ಚವ್ಹಾಣ್​ ಹೇಳಿದರು.

ಕುಲಾಲಿ ರೈಲ್ವೆ ಸ್ಟೇಷನ್​ ಬಳಿಯ ಹನುಮಾನ ಮಂದಿರ ಆವರಣದಲ್ಲಿ ಸೋಮವಾರ ಹಮ್ಮಿಕೊಂಡಿದ್ದ ಸಭೆಯಲ್ಲಿ ಮಾತನಾಡಿ, ಕೋವಿಡ್​ಗಿಂತ ಮುಂಚೆ ಹೈದರಾಬಾದ್​-ವಿಜಯಪುರ, ವಾಡಿ- ಸೋಲಾಪುರ, ರಾಯಚೂರು- ವಿಜಯಪುರ, ಕಲಬುರಗಿ& ಸೋಲಾಪುರ, ಸೋಲಾಪುರ- ರಾಯಚೂರು, ಸೋಲಾಪುರ- ಫಲಕನಾಮ, ವಿಜಯಪುರ- ಹೈದರಾಬಾದ್​ ಸೇರಿ ಹಲವು ಪ್ಯಾಸೆಂಜರ್​ ರೈಲುಗಳು ಸ್ಟೇಷನ್​ ಅಲ್ಲಿ ನಿಲ್ಲುತ್ತಿದ್ದವು. ಜನಜಂಗುಳಿ ಹೆಚ್ಚಿತ್ತು. ಆದರೆ ಇದೀಗ ಒಂದೆರಡು ರೈಲು ಮಾತ್ರ ನಿಲ್ಲುತ್ತಿದ್ದು, ನಿಲ್ದಾಣ ಅಕ್ಷರಶ-ಅನಾಥವಾಗಿದೆ. ಪ್ಯಾಸೆಂಜರ್​ ರೈಲುಗಳ ಓಡಾಟ ನಿಂತಿದ್ದು, ಕೇವಲ ಸೂಪರ್​ ಫಾಸ್ಟ್​ ಗಾಡಿಗಳು ಸಂಚರಿಸುತ್ತಿವೆ. ಇವಾವು ನಿಲುಗಡೆ ಆಗುತ್ತಿಲ್ಲ. ಇದರಿಂದ ಜನರು ಸ್ಟೇಷನ್​ಗೆ ಬರುವುದನ್ನೆ ಬಿಟ್ಟಿದ್ದಾರೆ ಎಂದು ತಿಳಿಸಿದರು.

ಔರಾದ್​&ಸದಾಶಿವಗಡ ರಾಜ್ಯ ಹೆದ್ದಾರಿ ನಿರ್ಮಿಸಿ ದಶಕಗಳಾಗಿದೆ. ಆದರೆ ಕುಲಾಲಿ ರೈಲು ಹಳಿ ಬಳಿ ಕೆಳ ಅಥವಾ ಮೇಲ್ಸೇತುವೆ ನಿರ್ಮಿಸುವೆ ಬೇಡಿಕೆಗೆ ಸ್ಪಂದನೆ ಸಿಕ್ಕಿಲ್ಲ. ಈ ಕುರಿತು ಕೇಂದ್ರದ ರೈಲ್ವೆ ಖಾತೆ ರಾಜ್ಯ ಸಚಿವ ವಿ.ಸೋಮಣ್ಣ, ಬೀದರ್​ ಸಂಸದ ಸಾಗರ ಖಂಡ್ರೆ, ಆಳಂದ ಹಾಗೂ ಅಫಜಲಪುರ ಶಾಸಕರಿಗೆ ಮನವಿ ಮಾಡಿದರೂ ಪ್ರಯೋಜನವಾಗಿಲ್ಲ. ಹೀಗಾಗಿ ಹೋರಾಟಕ್ಕೆ ಇಳಿಯುವುದು ಅನಿವಾರ್ಯವಾಗಿದೆ ಎಂದು ಹೇಳಿದರು.

ಧರ್ಮರಾಜ ಮಾಶಾಳಕರ್​, ಸುರೇಶ ಕುಂಬಾರ, ಬಸವರಾಜ ಪೂಜಾರಿ, ಹಣಮಂತ್ರಾಯ ಪಾಟೀಲ್​, ದತ್ತಾತ್ರೇಯ ಶಿರೂರ, ಗುರುಪಾದಪ್ಪ ಕುಂಬಾರ, ಶಿವಲಾಲ್​ ಗುತ್ತೇದಾರ್​, ಭೀಮರಾಯ ಕುಮಸಗಿ, ಸುರೇಶ ಕಂಬಾರ, ಮಾಯಪ್ಪ ಕಟ್ಟೋಳಿ, ಜಗದೀಶ ಮಠಪತಿ, ಬಾಸು ಚವ್ಹಾಣ್​, ಗುಂಡಪ್ಪ ಕುಲಾಲಿ, ಅನೀಲ್​ ಚವ್ಹಾಣ್​, ಹಣಮಂತ್ರಾಯ ಶಿರೂರ, ಸಂತೋಷ ಚವ್ಹಾಣ್​, ಚಂದ್ರಕಾಂತ ಚವ್ಹಾಣ್​, ರುಕುಂ ತೋಲಾ ಬೈರಾಮಡಗಿ ಇತರರಿದ್ದರು.