ರಾಜ್ಯ

ಕೊಳೆತ ಹಣ್ಣು ಡೆಲಿವರಿ ಮಾಡಿದ ಮಳಿಗೆಗೆ ಬೀಗ ! / HOSAKOTE

ಹೊಸಕೋಟೆಯ ಬ್ಲಿಂಕಿಟ್​ ಮಳಿಗೆ ಮೇಲೆ ದಾಳಿ ನಡೆಸಿದ ನಗರಸಭೆ ಆಯುಕ್ತ ನೀಲಲೋಚನ ಪ್ರಭು, ಆರೋಗ್ಯ ಇಲಾಖೆಯ ಆಂಜಿನಪ್ಪ, ನಗರಸಭೆ ಸದಸ್ಯ ನಿತಿನ್​ ಶ್ರೀನಿವಾಸ್​ ಅವಧಿ ಮೀರಿದ ಸಿದ್ಧ ಆಹಾರ ಪದಾರ್ಥ ಪರಿಶೀಲಿಸಿದರು.
ಹೊಸಕೋಟೆಯ ಬ್ಲಿಂಕಿಟ್​ ಮಳಿಗೆ ಮೇಲೆ ದಾಳಿ ನಡೆಸಿದ ನಗರಸಭೆ ಆಯುಕ್ತ ನೀಲಲೋಚನ ಪ್ರಭು, ಆರೋಗ್ಯ ಇಲಾಖೆಯ ಆಂಜಿನಪ್ಪ, ನಗರಸಭೆ ಸದಸ್ಯ ನಿತಿನ್​ ಶ್ರೀನಿವಾಸ್​ ಅವಧಿ ಮೀರಿದ ಸಿದ್ಧ ಆಹಾರ ಪದಾರ್ಥ ಪರಿಶೀಲಿಸಿದರು.
ಬೆಂಗಳೂರು ಗ್ರಾಮಾಂತರ ಡೆಸ್ಕ್
Published on: 
ಹೊಸಕೋಟೆ : ಆಹಾರ, ತರಕಾರಿ, ಹಣ್ಣು ಹಾಗೂ ಇತರ ಪದಾರ್ಥಗಳನ್ನು ಕೆಲವೇ ನಿಮಿಷಗಳಲ್ಲಿ ಮನೆಗೆ ಸರಬರಾಜು ಮಾಡುವ ಸಂಸ್ಥೆಯ ಮಳಿಗೆಯಿಂದ ಹಳಸಿದ, ಕೊಳೆತ ಹಾಗೂ ಅವಧಿ ಮೀರಿರುವ ಪದಾರ್ಥಗಳನ್ನು ಪಾರ್ಸೆಲ್​ ನೀಡಿರುವುದು ದೃಢಪಟ್ಟ ಹಿನ್ನೆಲೆಯಲ್ಲಿ ಸದರಿ ಮಳಿಗೆಗೆ ಬೀಗ ಜಡಿಯಲಾಗಿದೆ.
ನಗರಸಭೆ ಸದಸ್ಯ ನಿತಿನ್​ ಶ್ರೀನಿವಾಸ್​ ಅವರು ಆನ್​ಲೈನ್​ ಮೂಲಕ ಹಣ್ಣುಗಳನ್ನು ಖರೀದಿ ಮಾಡಿದ್ದರು. ಕೆಲವೇ ನಿಮಿಷಗಳಲ್ಲಿ ಹಣ್ಣು ಪೂರೈಕೆ ಮಾಡಿದ ಡೆಲಿವರಿ ಬಾಯ್​ಗೆ ಹಣ ನೀಡುವ ಮುನ್ನ ಪ್ಯಾಕೆಟ್​ ಚೆಕ್​ ಮಾಡಿದಾಗ ಹಣ್ಣುಗಳು ಕೊಳೆತ ಸ್ಥಿತಿಯಲ್ಲಿದ್ದವು. ಕೂಡಲೇ ಡೆಲಿವರಿ ಬಾಯ್​ಗೆ ತೋರಿಸಿದಕ್ಕೆ "ಸಾರ್​ ಈ ಪಾಸರ್ಲ್​ ವಾಪಸ್​ ಪಡೆಯುತ್ತೇನೆ' ಎಂದಿದ್ದ, ಈ ಬಗ್ಗೆ ವಿತರನಾ ಸಂಸ್ಥೆಯ ಅಧಿಕಾರಿಗಳಿಗೆ ಕರೆ ಮಾಡಿದರೂ ಸ್ಪಂದಿಸದ ಕಾರಣ ನಗರಸಭೆ ಹಾಗೂ ಪೊಲೀಸರಿಗೆ ದೂರು ನೀಡಿದ್ದು, ಮಳಿಗೆ ಮೇಲೆ ದಾಳಿ ನಡೆಸಲಾಯಿತು.
ಈ ಸಂಸ್ಥೆ ವಾಣಿಜ್ಯ ವ್ಯವಹಾರಕ್ಕೆ ನಗರಸಭೆಯಿಂದ ಪರವಾನಗಿ ಪಡೆದಿಲ್ಲ, ಆಹಾರ ಪದಾರ್ಥ ಮಾರಾಟಕ್ಕೆ ಆಹಾರ ಇಲಾಖೆಯಿಂದಲೂ ಪರವಾನಿಗೆ ಪಡೆದಿಲ್ಲ ಎನ್ನಲಾಗಿದೆ. ಈ ಮೇರೆಗೆ ಸ್ಥಳಕ್ಕೆ ಬಂದು ಹಣ್ಣು, ತರಕಾರಿ, ಬ್ರೆಡ್​, ಬಿಸ್ಕತ್​ಗಳನ್ನು ನಗರಸಭೆ ಆಯುಕ್ತ ನೀಲಾ ಲೋಚನ ಪ್ರಭು, ಪರಿಶೀಲಿಸಿದಾಗ ಶೇ.50 ಹಣ್ಣು ಹಾಗೂ ತರಕಾರಿಗಳು ಕೊಳೆತ ಸ್ಥಿತಿಯಲಿದ್ದು, ಅದರಲ್ಲಿ ಚೆನ್ನಾಗಿ ಕಾಣುವ ತರಕಾರಿ ಹಾಗೂ ಹಣ್ಣುಗಳನ್ನು ಆನ್​ಲೈನ್​ ಆರ್ಡರ್​ಗಳಿಗೆ ಕಳಿಸಲಾಗುತಿತ್ತು. ಅದರಲ್ಲಿ ಶೇ.50ಕ್ಕೂ ಹೆಚ್ಚು ಮಾರಾಟಕ್ಕೆ ಯೋಗ್ಯವಲ್ಲದ ಹಾಗೂ ಅವಧಿ ಮೀರಿದ ವಸ್ತುಗಳೇ ಆಗಿವೆ ಎಂಬುದು ದೃಢಪಟ್ಟಿದೆ.
ನಗರಸಭೆಯ ಆರೋಗ್ಯ ಇಲಾಖೆ ಅಧಿಕಾರಿ ಆಂಜಿನಪ್ಪ ನೇತೃತ್ವದಲ್ಲಿ ಸಂಸ್ಥೆಯ ಮಳಿಗೆಗೆ ಬೀಗ ಜಡಿದು, ನೋಟಿಸ್​ ಜಾರಿ ಮಾಡಿದ್ದಾರೆ ಹಾಗೂ ಈ ಸಂಬಂಧ ಆರೋಗ್ಯ ಇಲಾಖೆ ಹಾಗೂ ಆಹಾರ ಪೂರೈಕೆ ಇಲಾಖೆಗೆ ಸೂಕ್ತ ಕ್ರಮ ಕೈಗೊಳ್ಳಲು ಪತ್ರ ಬರೆಯಲಾಗಿದೆ ಎಂದು ಆಂಜಿನಪ್ಪ ತಿಳಿಸಿದ್ದಾರೆ. ಈ ಬಗ್ಗೆ ಹೊಸಕೋಟೆ ಠಾಣೆಯಲ್ಲಿ ದೂರು ದಾಖಲಾಗಿದೆ.
ನಮ್ಮ ಜೀವಕ್ಕೆ ಯಾರು ಹೊಣೆ? : ಅವಧಿ ಮೀರಿದ ಆಹಾರ ಹಾಗೂ ಕೊಳೆತ ಆಹಾರವನ್ನು ತಿಳಿಯದೇ ಯಾರಾದರೂ ಗ್ರಾಹಕರು ತಿಂದು ಆರೋಗ್ಯ ಕೆಡಿಸಿಕೊಂಡರೆ ಅಥವಾ ಜೀವ ಕಳೆದುಕೊಂಡರೆ ಯಾರು ಹೊಣೆ? ಅನಧಿಕೃತವಾಗಿ ನಗರದಲ್ಲಿ ಸಂಸ್ಥೆ ವ್ಯಾಪಾರ ನಡೆಸುತ್ತಿದೆ ಎಂದರೆ ಅಧಿಕಾರಿಗಳು ಹೇಗೆ ಸುಮ್ಮನಿದ್ದಾರೆ? ಈ ಬಗ್ಗೆ ಸಂಸ್ಥೆಯ ಅಧಿಕಾರಿಗಳನ್ನು ಪ್ರಶ್ನಿಸಿದರೆ, ಬನ್ನಿ ಈ ಬಗ್ಗೆ ಮಾತನಾಡೋಣ ಎನ್ನುತ್ತಾರೆ ಎಂದು ಸ್ವತ@ ನಗರಸಭೆಯ ಸದಸ್ಯ ನಿತಿನ್​ ಗಂಭೀರ ಆರೋಪ ಮಾಡಿದರು.
ಉಡಾಫೆ ಉತ್ತರ : ನನ್ನ ಗಮನಕ್ಕೆ ಈಗ ಬಂದಿದೆ, ನಾನು ಬುಧವಾರ ಸ್ಥಳ ಪರಿಶೀಲಿಸಿ ನಂತರ ಕ್ರಮ ಕೈಗೊಳ್ಳುತ್ತೇನೆ ಎಂದು ತಾಲೂಕು ಆರೋಗ್ಯಾಧಿಕಾರಿ ಡಾ.ವೀಣಾ ಉಡಾೆ ಉತ್ತರ ನೀಡಿದ್ದಾರೆ ಎಂದು ತಿಳಿದುಬಂದಿದೆ.
hosakote
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net