TCS ಬಿಟ್ಟು ಮೈಕ್ರೋಸಾಫ್ಟ್ ಸೇರಿದ ಟೆಕ್ಕಿಗೆ ಶಾಕ್... ಕಲ್ಚರ್ ಶಿಫ್ಟ್ ನಿಜಕ್ಕೂ ಸತ್ಯ! | Culture Shift Real

Corporate Life: ಬೆಂಗಳೂರಿನಲ್ಲಿ ತಂತ್ರಜ್ಞಾನ ಕ್ಷೇತ್ರದಲ್ಲಿ ಕೆಲಸ ಮಾಡುವ ಯುವಕರಿಗೆ ದೊಡ್ಡ ಕಂಪನಿಗಳಿಗೆ ಬದಲಾಗುವುದು ಹೊಸದೇನಲ್ಲ. ಆದರೆ ಒಂದು ಸಂಸ್ಥೆಯಿಂದ ಮತ್ತೊಂದು ಸಂಸ್ಥೆಗೆ ಹೋದಾಗ ಅಲ್ಲಿನ ಕೆಲಸದ ಸಂಸ್ಕೃತಿ, ವಾತಾವರಣದಲ್ಲಿ ವ್ಯತ್ಯಾಸ ಎಷ್ಟಿರಬಹುದು ಎಂಬುದನ್ನು ಬೆಂಗಳೂರಿನ ಟೆಕ್ಕಿಯೊಬ್ಬರು ತಮ್ಮ ಅನುಭವದ ಮೂಲಕ ಹಂಚಿಕೊಂಡಿದ್ದಾರೆ.

ವೃತ್ತಿಜೀವನವನ್ನು ಟಿಸಿಎಸ್‌ (TCS)ನಲ್ಲಿ ಆರಂಭಿಸಿ ಬಳಿಕ ಮೈಕ್ರೋಸಾಫ್ಟ್‌ (Microsoft) ಸೇರಿದ ಸೈಲೇಶ್ ಗುರುಂಗ್, ಎರಡೂ ಸಂಸ್ಥೆಗಳಲ್ಲಿ ಕೆಲಸ ಮಾಡಿದ ಅನುಭವವನ್ನು ಸಾಮಾಜಿಕ ಜಾಲತಾಣದಲ್ಲಿ ಬರೆದುಕೊಂಡಿದ್ದಾರೆ. ಅವರ ಪ್ರಕಾರ, ಸೇವಾ ಆಧಾರಿತ ಸಂಸ್ಥೆಯಿಂದ ಉತ್ಪನ್ನ ಸಂಸ್ಥೆಗೆ ಶಿಫ್ಟ್​ ಆದ ಬಳಿಕ ಕೆಲಸದ ಕುರಿತ ಅವರ ದೃಷ್ಟಿಕೋನವೇ ಬದಲಾಗಿದೆ.

ಪದವಿ ಮುಗಿದ ತಕ್ಷಣ ಟಿಸಿಎಸ್‌ಗೆ ಸೇರಿದ ಸೈಲೇಶ್‌ಗೆ ಆಗ ಉದ್ಯೋಗ ಜೀವನ ಅಂದ್ರೆ ನಿಯಮ ಪಾಲಿಸಿ, ಕೊಟ್ಟ ಕೆಲಸ ಮುಗಿಸುವುದಷ್ಟೇ ಆದರೆ ಮೈಕ್ರೋಸಾಫ್ಟ್‌ಗೆ ಸೇರಿದ ಬಳಿಕ ಕೆಲಸದ ವಾತಾವರಣ ಮತ್ತು ಅನುಭವವೇ ಸಂಪೂರ್ಣ ಬದಲಾಗಿದೆ ಎಂದು ಅವರು ಹೇಳಿದ್ದಾರೆ.

​

ಮೈಕ್ರೋಸಾಫ್ಟ್‌ಗೆ ಸೇರಿದ ಬಳಿಕ ಸೈಲೇಶ್‌ಗೆ ಕೆಲಸದ ವಾತಾವರಣದಲ್ಲಿ ದೊಡ್ಡ ಬದಲಾವಣೆ ಕಾಣಿಸಿದೆ. ಹಿಂದಿನ ಕಂಪನಿಯಲ್ಲಿ ಹುದ್ದೆ, ಸಿನಿಯಾರಿಟಿ ಮತ್ತು ಹಲವು ಹಂತದಲ್ಲಿ ಪರ್ಮಿಷನ್​ಗೆ ಹೆಚ್ಚು ಮಹತ್ವವಿತ್ತು. ಆದರೆ ಮೈಕ್ರೋಸಾಫ್ಟ್‌ನಲ್ಲಿ ಯಾರನ್ನಾದರೂ ಸುಲಭವಾಗಿ ಸಂಪರ್ಕಿಸಿ, ಬೇರೆ ತಂಡಗಳ ಜೊತೆಗೂಡಿ ಕೆಲಸ ಮಾಡಬಹುದು. ತಮ್ಮ ಅಭಿಪ್ರಾಯವನ್ನೂ ಮುಕ್ತವಾಗಿ ಹಂಚಿಕೊಳ್ಳುವ ಸ್ವಾತಂತ್ರ್ಯವಿದೆ ಎಂದು ಅವರು ಹೇಳಿದ್ದಾರೆ.

ಕೆಲಸದ ಉಡುಪಿನಲ್ಲೂ ಟಿಸಿಎಸ್‌ಗೂ ಮೈಕ್ರೋಸಾಫ್ಟ್‌ಗೂ ಸಾಕಷ್ಟು ವ್ಯತ್ಯಾಸವಿದೆ ಎಂದು ಸೈಲೇಶ್ ಹೇಳಿದ್ದಾರೆ. ಟಿಸಿಎಸ್‌ನಲ್ಲಿ ಪ್ರತಿದಿನ ಫಾರ್ಮಲ್ ಉಡುಪು ಸಾಮಾನ್ಯವಾಗಿತ್ತು. ಆದರೆ ಮೈಕ್ರೋಸಾಫ್ಟ್‌ನಲ್ಲಿ ನಿರ್ದಿಷ್ಟ ಡ್ರೆಸ್‌ ಕೋಡ್‌ ಇಲ್ಲ; ಅಚ್ಚುಕಟ್ಟಾಗಿ ಇದ್ದರೆ ಸಾಕು ಎಂದು ಅವರು ತಿಳಿಸಿದ್ದಾರೆ.

ಮೈಕ್ರೋಸಾಫ್ಟ್‌ನ ಆಫೀಸ್‌ ವಾತಾವರಣದಲ್ಲಿರುವ ಹಲವು ಸೌಲಭ್ಯಗಳನ್ನು ಸೈಲೇಶ್ ಮೆಚ್ಚಿಕೊಂಡಿದ್ದಾರೆ. ಹ್ಯಾಕಥಾನ್‌ಗಳು, ಟೀಮ್‌ ಈವೆಂಟ್‌ಗಳು, ಗೇಮಿಂಗ್‌ ಝೋನ್‌ಗಳು, ಚಿಲ್‌ ಸ್ಪೇಸ್‌ಗಳು ಸೇರಿದಂತೆ ಕೆಲಸದ ನಡುವೆ ರೆಸ್ಟ್‌ ತೆಗೆದುಕೊಳ್ಳಲು ಹಲವು ವ್ಯವಸ್ಥೆಗಳಿವೆ. ಇದರಿಂದ ಆಫೀಸ್‌ ವಾತಾವರಣ ಇನ್ನಷ್ಟು ಫ್ರೆಂಡ್ಲಿಯಾಗಿರುತ್ತದೆ ಎಂದು ಅವರು ಹೇಳಿದ್ದಾರೆ.

ಸೌಲಭ್ಯಗಳಿಗಿಂತ ವರ್ಕ್‌ ಓನರ್‌ಶಿಪ್‌ನಲ್ಲೇ ದೊಡ್ಡ ಬದಲಾವಣೆ ಕಂಡಿದೆ ಎಂದು ಸೈಲೇಶ್ ಹೇಳಿದ್ದಾರೆ. ಹಿಂದಿನ ಕಂಪನಿಯಲ್ಲಿ ಒಂದು ಕೆಲಸವನ್ನು ಒಬ್ಬರು ಮಾಡಿ ಮತ್ತೊಬ್ಬರಿಗೆ ಹ್ಯಾಂಡ್‌ಓವರ್‌ ಮಾಡುವ ಸಿಸ್ಟಮ್‌ ಇತ್ತು. ಆದರೆ ಮೈಕ್ರೋಸಾಫ್ಟ್‌ನಲ್ಲಿ ಕೆಲಸವನ್ನು ಆರಂಭದಿಂದ ಕೊನೆಯವರೆಗೂ ತಾವೇ ನೋಡಿಕೊಳ್ಳುವ ಜವಾಬ್ದಾರಿ ಸಿಗುತ್ತಿದೆ. ಜವಾಬ್ದಾರಿ ಹೆಚ್ಚಾದಂತೆ ಬೆಳವಣಿಗೆ ಮತ್ತು ಸಂಬಳವೂ ಹೆಚ್ಚಾಗಿದೆ ಎಂದು ಹೇಳಿದ್ದಾರೆ.

ಒಳ್ಳೆ ಊಟ, ಕಾಫಿ, ಮಸಾಜ್‌ ಚೇರ್‌ಗಳು ಹಾಗೂ ರೆಸ್ಟ್‌ ತೆಗೆದುಕೊಳ್ಳಲು ಇರುವ ಜಾಗದಂತಹ ಸಣ್ಣ ಸೌಲಭ್ಯಗಳೂ ಕೆಲಸದ ಅನುಭವವನ್ನು ಬದಲಿಸುತ್ತವೆ ಎಂದು ಸೈಲೇಶ್ ಹೇಳಿದ್ದಾರೆ. ಅವರ ಪ್ರಕಾರ, ಇಲ್ಲಿನ ಆಫೀಸ್‌ ಅನ್ನು ಕೇವಲ ಉದ್ಯೋಗಿಗಳಿಗಾಗಿ ಅಲ್ಲ, ಮನುಷ್ಯರಿಗಾಗಿ ರೂಪಿಸಿದಂತೆ ಅನಿಸುತ್ತದೆ.

ಸೈಲೇಶ್ ಅವರ ಅನುಭವದ ಪೋಸ್ಟ್‌ ಸಾಮಾಜಿಕ ಜಾಲತಾಣದಲ್ಲಿ ಚರ್ಚೆಗೆ ಕಾರಣವಾಗಿದೆ. ಸೇವಾ ಸಂಸ್ಥೆಗಳಿಂದ ಉತ್ಪನ್ನ ಆಧಾರಿತ ಕಂಪನಿಗಳಿಗೆ ಬದಲಾದ ಹಲವರು, ತಮ್ಮ ಅನುಭವವೂ ಇದೇ ರೀತಿ ಇದೆ ಎಂದು ಪ್ರತಿಕ್ರಿಯಿಸಿದ್ದಾರೆ. ಇಂತಹ ಉತ್ತಮ ವರ್ಕ್‌ ಕಲ್ಚರ್‌ ಮೈಕ್ರೋಸಾಫ್ಟ್‌ಗೆ ಮಾತ್ರ ಸೀಮಿತವಲ್ಲ. ಉತ್ತಮ ವಾತಾವರಣ ಇರುವ ಯಾವುದೇ ಕಂಪನಿಯಲ್ಲೂ ಇಂಥ ಅನುಭವ ಸಿಗಬಹುದು ಎಂದು ಕೆಲವರು ಅಭಿಪ್ರಾಯಪಟ್ಟಿದ್ದಾರೆ.(ಏಜೆನ್ಸೀಸ್).