ಆನೇಕಲ್ ತಾಲೂಕಿನ ರಾಮಕೃಷ್ಣಪುರ ಪ್ರಸನ್ನ ವೆಂಕಟೇಶ್ವರಸ್ವಾಮಿ ದೇವಾಲಯದ ಮುಖ್ಯದ್ವಾರದ ಬಳಿ ಕಳೆದ ಒಂದು ವಾರದಿಂದ ಚರಂಡಿ ನೀರು ರಸ್ತೆಯ ಮೇಲೆ ಹರಿಯುತ್ತಿದೆ. ಮರಸೂರು ಮಾರ್ಗವಾಗಿ ಬರುತ್ತಿರುವ ಕೊಳಚೆ ಹರಿಯಲು ಚರಂಡಿ ವ್ಯವಸ್ಥೆ ಇಲ್ಲ. ಇಗ್ಗಲೂರು ಬಳಿ ಖಾಸಗಿ ಕಂಪನಿ, ಚರಂಡಿ ಮುಚ್ಚಿ ಕಂಪನಿಯ ಗೇಟ್ ಹಾಗೂ ರಸ್ತೆ ನಿಮಾರ್ಣ ಮಾಡಿದೆ. ಇದರಿಂದಾಗಿ ನೀರು ಹೋಗದೆ ದೇವಾಲಯದ ಮುಖ್ಯದ್ವಾರದ ಬಳಿ ಸಂಗ್ರಹವಾಗುತ್ತಿದೆ. ಅದು ಉಕ್ಕಿ ಇಗ್ಗಲೂರು ಮುಖ್ಯರಸ್ತೆಯಲ್ಲೂ ಹರಿಯುತ್ತಿದೆ. ಇದರ ಮೇಲೆಯೇ ಸಂಚಾರ ಮಾಡಬೇಕಾದ ಅನಿವಾರ್ಯತೆ ಸಾರ್ವಜನಿಕರಿಗೆ ಎದುರಾಗಿದೆ. ಕಾರು ಹಾಗೂ ಬಸ್&ಲಾರಿಗಳು ಸಂಚಾರ ಮಾಡುವ ಸಂದರ್ಭದಲ್ಲಿ ಅಕ್ಕಪಕ್ಕದಲ್ಲಿ ಓಡಾಡುವ ದ್ವಿಚಕ್ರ ವಾಹನ ಸವಾರರ ಮೇಲೆ ಕೊಳಚೆ ನೀರಿನ ಅಭಿಷೇಕವಾಗುತ್ತಿದೆ. ಪ್ರತಿದಿನ ದೇವಾಲಯಕ್ಕೆ ಹೋಗುವವರು ಈ ತ್ಯಾಜ್ಯ ಮೆಟ್ಟಿಕೊಂಡು ಹೋಗುವ ದುಸ್ಥಿತಿ ಇದೆ.
